រាជធានីភ្នំពេញ ៖ យុវជនម្នាក់បានក្លាយជាអ្នកទោសស្នេហា ដោយត្រូវម្តាយក្មេងស្រីចោទថា បានរំលោភកូនស្រីគាត់ដែលទើបមានអាយុ១៤ឆ្នាំ ហើយត្រូវបានចាប់ឃាត់ខ្លួននាំមកប្រគល់ឱ្យនគរបាលខណ្ឌចំការមនចាត់ការទៅតាមផ្លូច្បាប់ ។
ករណីនេះ កើតឡើងក្រោយពីស្ត្រីជាម្តាយបានបាត់កូនស្រីរបស់គាត់ ដែលចេះតែដើរលេងបាត់ៗពីផ្ទះ ហើយតាមរកឃើញពួកគេកំពុងនៅជាមួយគ្នាក៏សួរនាំ ទើបបែកធ្លាយរឿងកូនស្រីរបស់គាត់ធ្លាប់នាំគ្នាចូលផ្ទះសំណាក់ និងរួមរ័កចំនួន២លើកជាមួយសង្សារនាពេលកន្លងមក ។
ការចាប់ឃាត់ខ្លួននេះ បានធ្វើឡើងកាលពីវេលាម៉ោង១ និង១៥នាទីរសៀលថ្ងៃទី១១ ខែមករា កន្លងទៅ នៅចំណុចវិទ្យាល័យបឹងត្របែក មហាវិថីព្រះមុនីវង្ស ក្នុងសង្កាត់ទន្លេបាសាក់ ខណ្ឌចំការមន ។ ប្រភពព័ត៌មានពីនគរបាលបានឱ្យដឹងថា យុវជនដែលត្រូវបានឃាត់ខ្លួននេះ ឈ្មោះ សឿន សុវណ្ណដេត អាយុ១៩ឆ្នាំ ជាបុគ្គលិកក្រុមហ៊ុនរថយន្តតាក់ស៊ី មានទីលំនៅផ្ទះលេខ៧៨A ផ្លូវលេខ៥០៨ ក្នុងសង្កាត់ផ្សារដើមថ្កូវ ខណ្ឌចំការមន ។ ចំណែកក្មេងស្រីមានអាយុ១៤ឆ្នាំ ជាសិស្សវិទ្យាល័យបឹងត្របែក ស្នាក់នៅក្នុងសង្កាត់ផ្សារដើមថ្កូវ ខណ្ឌចំការមន ។
ប្រភពដដែលឱ្យដឹងទៀតថា កាលពីថ្ងៃទី១១ ខែមករា កន្លងទៅ ដោយបាត់កូនស្រីមិនឃើញនៅផ្ទះ ស្ត្រីជាម្តាយក៏បានដើររកឃើញនាងកំពុងនៅជាមួយយុវជនខាងលើ ។ ពេលរកឃើញកូនស្រីរបស់ខ្លួនកំពុងនៅជាមួយនឹងយុវជនរូបនេះ ក៏ធ្វើការសួរនាំហើយកូនស្រីរបស់គាត់និយាយរៀបរាប់ប្រាប់ថា «កាលពីយប់ថ្ងៃទី៣ ខែមករាកន្លងមកនេះ រូបនាងនិងសង្សារនាំគ្នាដើរលេងផឹកស៊ី និងនាំគ្នាចូលដេកនៅផ្ទះសំណាក់ដួងច័ន្ទ រួមរ័កគ្នា១លើក ។ លុះដល់ស្អែកឡើង ថ្ងៃទី៤ ខែមករា ពួកគេទៅដើរលេងនិងនាំគ្នាទៅដេកនៅផ្ទះសំណាក់ខាងលើរួមរ័កគ្នា១លើកទៀត ។
ក្រោយពីឮកូនស្រីនិយាយប្រាប់បែបនេះ ស្ត្រីជាម្តាយក៏ទៅប្តឹងខណ្ឌចំការមន ឲ្យចាប់ឃាត់ខ្លួនយុវជនជាសង្សាររបស់កូនស្រីនោះតែម្តង។ យុវជន សឿន សុវណ្ណដេត សារភាពថា រូបគេពិតជាបានរួមរ័កជាមួយនាង២លើកប្រាកដមែន ដោយពួកគេមានផ្ទះជិតគ្នា ធ្លាប់រៀនសាលាជាមួយគ្នា និងបានស្រឡាញ់គ្នាអស់រយៈពេលជាងកន្លះឆ្នាំមកហើយ ។
នេះជាមេរៀនមួយសម្រាប់យុវជនដែលភ្លើតភ្លើននឹងស្នេហាក្នុងវ័យក្មេងខ្ចីមិនមានអនាគតនោះទេ ដែលទីបំផុតម្ខាងជាប់ចោទ ម្ខាងទៀតធ្វើឱ្យក្រុមគ្រួសារអាម៉ាស់មុខ ៕
ចែករំលែកព័តមាននេះ