រាជធានីភ្នំពេញ ៖ តារាសម្តែង លី ច័ន្ទសីហា ក្រោយរៀបការបានទទួលនូវចំណងដៃកូនស្រីដ៏គួរឲ្យស្រឡាញ់ម្នាក់ដែលកើតចេញពីសេចក្តីស្នេហ៍។ រហូតមកទល់ពេលនេះកូនស្រី លី ច័ន្ទសីហា មានវ័យ១ឆ្នាំ ដោយមានសុខភាពល្អ រូបរាងគួរឲ្យស្រឡាញ់ធ្វើឲ្យម្តាយ និងលោកតាកាន់តែស្រឡាញ់ និងកាន់តែយកចិត្តទុកដាក់មើលថែទាំ។
កាលពីយប់ថ្ងៃទី៩ ខែមករា ឆ្នាំ២០១៩ អ្នកនាង លី ច័ន្ទសីហា និងលោកឪពុកនាង លី សុខជន បានរៀបចំពិធីខួបកំណើតចៅស្រីគម្រប់១ឆ្នាំ នាភោជនីយដ្ឋានមួយកន្លែងតាមបណ្តោយផ្លូវព្រះមុនីវង្ស ក្បែរស្តុបបូកគោដោយមានការចូលរួមពីសិល្បករល្បីៗ និងមិត្តជិតដិត។ នាពិធីដ៏មានសេចក្តីសុខនេះ គេបែរជាមិននឹកស្មានថា បាត់វត្តមានស្វាមីរបស់នាងចំថ្ងៃសំខាន់បែបនេះ នាំឲ្យម្នាក់ៗសួរនាំរឿងស្វាមីមិនមករីករាយជាមួយច្រើនគ្រប់គ្នា។
តាមការពិតនាងបានលែងលះបាត់ឱកាសរស់នៅជាមួយប្តីតាំងពីកូននាងនៅក្នុងពោះ ដោយសារតែពិបាកចិត្តពេក ទើបនាងខំលាក់បាំង ហើយតស៊ូពង្រឹងស្មារតីដើម្បីកូន។ ក្នុងសំដីម៉ាត់ៗ លី ច័ន្ទសីហា បានទទួលស្គាល់ថា រវាងនាងនិងស្វាមីបានលែងលះគ្នាដើរផ្លូវរៀងៗខ្លួនយូរមកហើយ ពោលគឺជាងមួយឆ្នាំ។ មានរឿងជាច្រើនដែលបានកើតឡើងតាំងពីពេលនាងភ្ជាប់ពាក្យមកម្ល៉េះ ប៉ុន្តែនាងនៅតែទុកឱកាស និងមិនចង់ផ្តាច់ពាក្យនាំឲ្យគេថា ទាំងពេលនោះប៉ារបស់នាងក៏ចង់ឲ្យផ្តាច់ដែរ។
នាងលើកឡើងថា តាំងពីការមក គាត់ដើរលេងចោលផ្ទះ មានមិត្តភក្តិ ខ្ញុំក៏មានពួកម៉ាកដែរ តែដល់ពេលមានប្រពន្ធកូនគេគិតគូរមើលគ្រួសារ។ ខ្ញុំបានឲ្យគាត់កែប្រែអត្តចរិកតាំងពីមុនការព្រោះយល់ថា បើគាត់នៅម្នាក់ឯងចេះតែដើរជាទម្លាប់អាចគាត់ប្តូរមកវិញ ក្រោយពេលមានប្រពន្ធ ប៉ុន្តែអត់មាននោះទេ គឺដដែល។
នាងបន្តថា តាំងពីពរពោះយើងបែកខ្ញែកគ្នាណាស់ រហូតទាល់តែនាងសម្រេចចិត្តលែងលះព្រោះមិនដែលយកចិត្តទុកដាក់ពីប្តីឡើយ ហេតុផលណាស់។ នាងបែកគ្នាតាំងពីពរពោះបានប៉ុន្មានខែ តាំងពីកើតរឿងមកនាងមានទម្ងន់អារម្មណ៍គឺពិបាកទទួលយកបំផុត បាក់ទឹកចិត្តបំផុត។ ប៉ុន្តែនាងត្រូវតែរឹងមាំធ្វើខ្លួនឲ្យល្អកុំឲ្យកូនខ្សោយត្រូវធ្វើនេះធ្វើនោះឈ្លាសវៃ ដើម្បីតាមពាក្យថា នារីពរពោះត្រូវមានអារម្មណ៍ល្អ រីករាយសប្បាយខ្លះ ទើបកូនកើតមកឆ្លាត ទីបំផុតកូននាងក៏ឆ្លាតស្អាតតាមបំណង។
លី ច័ន្ទសីហា បន្តថា នាងបែកគ្នាតាមច្បាប់តុលាការ ដោយបានកាត់ក្តីអស់ហើយ ដោយនាងសុំចេញតែខ្លួន និងយកកូន ចំណែករឿងទ្រព្យសម្បត្តិខាងប្រុសសុំមិនទទួល ហើយក៏គ្មានទ្រព្យអ្វីដែរ ក្រៅពីចំណងដៃសល់ពេលការហើយ។ ម្យ៉ាងទៀតនាងក៏មានមុខរបរ ប៉ាម៉ាក់បងប្អូនក៏មានការងារ ចៅមួយចិញ្ចឹមមិនបានឬ?
តារាស្រីរូបនេះបញ្ជាក់ថា ក្រោយមានផ្ទៃពោះ៥ខែនាងបានចេញទៅរស់នៅផ្ទះដែលខាងប្តីទិញនាតំបន់ចម្ការដូង ក្រោយរស់នៅទីនោះបានប្រមាណមួយខែ នាងក៏លេចចេញរឿងរ៉ាវរកាំរកូស ជាពិសេសមិនសូវបាននៅជុំប្តី។ នាងទទួលស្គាល់ថា ក្រោយភ្ជាប់ពាក្យនាងក៏ធ្លាប់មានលេចចេញភាពរកាំរកូសខ្លះៗដែរ ប៉ុន្តែនាងរំពឹងថា ក្រោយរៀបការរួចរស់នៅក្រោមដំបូលផ្ទះតែមួយ និងក្រោយមានកូនជាតំណក់ឈាមរួមគ្នា នឹងអាចធ្វើឲ្យស្វាមីកែប្រែទើបនាងចេះតែទ្រាំ ប៉ុន្តែគឺមិនមានអ្វីដែលធ្វើឲ្យនាងកក់ក្តៅដូចការរំពឹងទុក។
នាងថា នាងគឺជាមនុស្សស្រីមានផ្ទៃពោះនៅផ្ទះតែឯង ដែលជាសម្ពាធផ្លូវចិត្តមួយដ៏ធ្ងន់ពិសេសនាងបារម្ភប៉ះពាល់ដល់សុខភាពកូនក្នុងផ្ទៃ។ កន្លងមក នាងតែងលាក់មិនបង្ហាញជាសាធារណៈអំពីរឿងរ៉ាវលែងលះស្វាមីនោះទេ ប៉ុន្តែការពិតមិនអាចលាក់ជិតនោះដែរ ហើយក៏អាចបញ្ចៀសការចោទសួរជាញឹកញាប់ពីអ្នករួមអាជីព និងអ្នកសារព័ត៌មានអំពីការបាត់វត្តមានអតីតស្វាមីនាង។
តារាស្រីរូបនេះលើកឡើងថា ថ្ងៃសម្រាលកូនស្រីស្វាមីនាងក៏បានទៅមើលមុខកូនស្រីដែរ តាមការហៅទូរស័ព្ទផ្តល់ដំណឹងពីឪពុកនាង ហើយក្រោយពេលសម្រាលស្វាមីនាងក៏បានផ្តល់ប្រាក់តិចតូចប្រចាំខែសម្រាប់កូនស្រីផងដែរ។ នាងមិនបានចោទប្តីថា មានស្រីថ្មីនៅខាងក្រៅទេ ប៉ុន្តែក្រោយចែកផ្លូវគ្នាអតីតស្វាមីនាងក៏មានប្រពន្ធក្រោយដែរ ដែលពេលនេះគេក៏មានផ្ទៃពោះ៦ខែហើយដែរ។ នាងទទួលស្គាល់ថា ក្នុងថ្ងៃខួបកំណើតកូនស្រីអតីតស្វាមីនាងក៏បានផ្តល់របស់ខ្លះដល់កូនស្រីដែរ គឺខ្សែដៃ និងក្រវិល៕
ចែករំលែកព័តមាននេះ