ខេត្តឧត្តរមានជ័យ ៖ មានករណីប្រជាពលរដ្ឋបានប្រទះឃើញសពបុរសម្នាក់ដេកស្លាប់ក្នុងព្រៃដែលមានភ្លើងឆេះរួច កាលពីវេលាម៉ោង៣រសៀលថ្ងៃទី៧ ខែមករា ឆ្នាំ២០១៩ ស្ថិតក្នុងភូមិរំចេកកណ្តាល ឃុំលំទង ស្រុកអន្លង់វែង។ ជនរងគ្រោះដែលស្លាប់ឈ្មោះ…
ខេត្តឧត្តរមានជ័យ ៖ មានករណីប្រជាពលរដ្ឋបានប្រទះឃើញសពបុរសម្នាក់ដេកស្លាប់ក្នុងព្រៃដែលមានភ្លើងឆេះរួច កាលពីវេលាម៉ោង៣រសៀលថ្ងៃទី៧ ខែមករា ឆ្នាំ២០១៩ ស្ថិតក្នុងភូមិរំចេកកណ្តាល ឃុំលំទង ស្រុកអន្លង់វែង។
ជនរងគ្រោះដែលស្លាប់ឈ្មោះ បូ ជាតិ ភេទប្រុស អាយុ៣៧ ឆ្នាំ រស់នៅភូមិរំចេកខាងលិច ឃុំអន្លង់វែង ស្រុកអន្លង់ វែង ខេត្តឧត្តរមានជ័យ ។
តាមការបំភ្លឺរបស់ឈ្មោះ រេន ហឿង ភេទស្រី អាយុ៣៥ឆ្នាំ ត្រូវជាប្រពន្ធរបស់ជនរងគ្រោះ និងឈ្មោះប្រុក បូ ភេទប្រុស ត្រូវជាឪពុកបង្កើតរបស់ជនរងគ្រោះ បានរៀបរាប់ប្រាប់ថា កន្លងមកជនរងគ្រោះបានទៅធ្វើការរកស៊ីនៅស្រុកម៉ាល័យ ខេត្តបន្ទាយមានជយ័ លុះនៅពេលត្រឡប់មកផ្ទះវិញ ជនរងគ្រោះក៏មានអាការៈចម្លែកៗដូចជា ឱ្យតែឃើញមនុស្សម្នាចេះតែខ្លាច និងរត់គេច ជាពិសេសពេលផឹកស្រាគឺមានសភាពភ័យៗ ខ្លាចៗ និងចូលចិត្តផឹកស្រាជាប្រចាំ ប៉ុន្តែរយៈពេល២ទៅ៣ថ្ងៃមុនបាត់ខ្លួន ជនរងគ្រោះពុំបានផឹកស្រានោះទេ ហើយតែងតែត្អូញត្អែរប្រាប់ថាមិនសូវស្រួលខ្លួន ចេះតែឈឺក្បាល ឈឺខ្នង ឈឺចង្កេះ ។
ប្រភពដដែលបានបន្តថា រហូតដល់វេលាម៉ោងប្រហែល២រសៀលថ្ងៃទី៤ ខែមករា ឆ្នាំ២០១៩ ជនរងគ្រោះបានកាន់ដំបងឈើជ្រុងរត់តាមវាលស្រែទៅទិសខាងកើត ពេលនោះបងប្អូនសាច់ញាតិបានតាមរកជនរងគ្រោះដែរ តែរកមិនឃើញសោះ រហូតដល់វេលាម៉ោង១រសៀលថ្ងៃទី ៧ ខែមករា ឆ្នាំ២០១៩ ទើបមានបុរសម្នាក់ឈ្មោះ ស៊ឹម វណ្ណះ អាយុ២៨ឆ្នាំ រស់នៅភូមិរំចេកលិច ឃុំអន្លង់វែង ស្រុកអន្លង់វែង បានចូលព្រៃ
រកកាត់ឈើក្រាក់ នៅម្តុំនោះក៏បានប្រទះឃើញសពជនរងគ្រោះ រួចក៏បានទូរសព្ទ័ប្រាប់សាច់ញាតិអោយមកមើល និងបានរាយការណ៍ជូនសមត្ថកិច្ចដើម្បីឱ្យចុះមកពិនិត្យ។
បន្ទាប់ពីទទួលបានព័ត៌មានខាងលើភ្លាមៗ កំលាំងផ្នែកពិនិត្យវិភាគ សហការជាមួយកំលាំងផ្នែកព្រហ្មទណ្ឌកំលាំងប៉ុស្តិ៍នគរបាលស្រុកអន្លង់វែង គ្រូពេទ្យ និងលោកមេភូមិសរុបចំនួន៧ នាក់ បានចុះពិនិត្យសពនៅកន្លែងកើតហេតុ ដែលមានចំងាយពីផ្លូវប្រហែល១៥០០ម៉ែត្រក្នុងព្រៃដែលត្រូវភ្លើងឆេះរួចជាប់វាលស្រែ។
តាមការពិនិត្យនៅកន្លែងកើតហេតុ សមត្ថកិច្ចរកឃើញមានស្នាមជើងដែលជាន់លើកំទេចផេះដែលភ្លើងឆេះព្រៃរួច ជាស្នាមជើងរបស់ជនរងគ្រោះតែម្នាក់ គ្មានដានស្នាមផ្សេងនោះទេ ហើយជនរងគ្រោះបានស្លាប់ក្នុងស្ថានភាពផ្កាប់មុខ ក្បាលបែរទៅទិសខាងត្បូង មានសភាពហើមស្អុយ ពាក់អាវការ៉ូ ពណ៌ប្រផេះ ដៃវែង ស្លៀកខោខៅប៊ូយជើងវែង ពណ៌ក្រម៉ៅមូរជើង ពាក់ខ្សែក្រវ៉ាត់ពណ៌ក្រហម ។ នៅលើរាងកាយសពមិនមានស្លាកស្នាមរបួសអ្វីដែលគួអោយសង្សយ័ថាជាអំពើឃាតកម្មនោះឡើយ។
តាមការសន្និដ្ឋានរបស់សមត្ថកិច្ចបានឱ្យដឹងថា ជនរងគ្រោះអាចស្លាប់ដោយដាច់បាយ ដាច់ទឹក បណ្តាលឱ្យខ្យល់គរស្លាប់តែម្តង គឺពុំមានអ្វីសង្ស័យពាក់ពន្ធ័នឹងករណីឃាតកម្មនោះឡើយ។
បន្ទាប់ពីពិនិត្យរួច សមត្ថកិច្ចបានធ្វើការប្រគល់សពជូនទៅក្រុមគ្រួសារដើម្បីរៀបចំធ្វើបុណ្យតាមប្រពៃណី ៕
ចែករំលែកព័តមាននេះ