រាជធានីភ្នំពេញ ៖ ក្នុងវិស័យពាណិជ្ជកម្មវាងកម្ពុជា និងបណ្ដាប្រទេសជាដៃគូលើពិភពលោកកាន់តែមានភាពជិតស្និទ្ធនឹងគ្នា ហើយកម្ពុជាក៏បានពង្រីកទីផ្សាររបស់ខ្លួនកាន់តែទូលំទូលាយផងដែរ ។ ជាក់ស្ដែងក្នុងឆ្នាំ២០១៨នេះ កម្ពុជាបាននាំចេញទំនិញរបស់ខ្លួនទៅកាន់ទីផ្សារចំនួន១៤៧ប្រទេសលើពិភពលោក និងនាំចូលមកវិញពីបណ្ដាប្រទេសចំនួន១៣៥ ។
បើតាមប្រសាសន៍លោកអគ្គបណ្ឌិត សភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានលើកឡើងថា កម្ពុជាបានបើកទីផ្សារ និងនាំចេញទំនិញទៅកាន់១៤៧ប្រទេស ក្នុងទំហំធំជាង៦០%នៃផលិតផលក្នុងស្រុកសរុប(ផ.ស.ស) និងនាំចូលទំនិញមកបម្រើការផលិត និងប្រើប្រាស់ពី១៣៥ប្រទេស ក្នុងទំហំប្រមាណ៦៥%នៃផ.ស.សផងដែរ ។
លោកឧបនាយករដ្ឋមន្ត្រី បានបន្ដថា ទំហំពាណិជ្ជកម្មរបស់កម្ពុជាមានការវិវត្តកើនឡើងជាលំដាប់ពីមួយឆ្នាំទៅមួយឆ្នាំ ដែលក្នុងនោះ កំណើននៃការនាំចេញក្រោមប្រព័ន្ធអនុគ្រោះពន្ធ បានសម្រេចរហូតដល់១៣ពាន់លានដុល្លារនៅឆ្នាំ២០១៨ គឺកើនឡើងជិត១៨% បើធៀបនឹងតម្លៃក្នុងឆ្នាំ២០១៧កន្លងទៅ ។
លោកបន្តថា វិស័យពាណិជ្ជកម្ម គឺជាចលករមួយក្នុងចំណោមកម្លាំងចលករដទៃទៀត ក្នុងការធ្វើឱ្យកម្ពុជាអាចរក្សាបាននូវកំណើនសេដ្ឋកិច្ច ដែលមានចីរភាព។ លោកថ្លែងថា ៖« ក្នុងរយៈពេលពីរទសវត្សរ៍ចុងក្រោយ ស្ថានភាពម៉ាក្រូសេដ្ឋកិច្ចកម្ពុជា មានភាពល្អប្រសើរ ដោយសេដ្ឋកិច្ចសម្រេចបាននូវកំណើនប្រចាំឆ្នាំជាមធ្យមក្នុងរង្វង់៧% ដែលកំណើននេះ ប្រកបដោយបរិយាប័ន្ន និងសមធម៌ » ។
លោកបន្ថែមថា បច្ចុប្បន្ននេះ កម្ពុជា សម្រេចបាននូវបង្គោលចរជាប្រវត្តិសាស្ត្រ គឺបានឆ្លងផុតពីឋានៈនៃប្រទេសមានចំណូលទាប ទៅជាប្រទេសមានចំណូលមធ្យមកម្រិតទាបជាផ្លូវការក្នុងឆ្នាំ២០១៥ ហើយត្រូវបានចាត់ទុកថាជា ខ្លាសេដ្ឋកិច្ចថ្មីនៅអាស៊ី ក្នុងឆ្នាំ២០១៦ ដោយធនាគារអភិវឌ្ឍន៍អាស៊ីផងដែរ ។
ជាមួយនឹងកំណើនសេដ្ឋកិច្ចប្រកបដោយសុទិដ្ឋិនិយមនេះ កម្ពុជាសម្រេចបាននូវការផ្លាស់ប្តូរគួរជាទីមោទនៈ ទាំងរចនាសម្ព័ន្ធសេដ្ឋកិច្ច និងសង្គម ។ ក្នុងឆ្នាំ២០១៨នេះ តាមការប៉ាន់ស្មានជាបឋមរបស់រាជរដ្ឋាភិបាល អត្រាកំណើនសេដ្ឋកិច្ចរបស់កម្ពុជានឹងសម្រេចបានក្នុងរង្វង់៧,៣% ដែលកំណើននេះ ទទួលបានពីការកើនឡើងយ៉ាងរឹងមាំនៃវិស័យសំណង់ ការបន្តកើនឡើងនៃវិស័យកាត់ដេរ និងការនាំចេញ ព្រមទាំងកំណើនជាមធ្យមទទួលបានពីវិស័យកសិកម្ម ការងើបឡើងយ៉ាងខ្លាំងនៃវិស័យទេសចរណ៍ និងកំណើននៃវិស័យលក់ដុំ-លក់រាយ ព្រមទាំងវិស័យបន្ទាប់បន្សំដទៃទៀតផងដែរ ។
លោក ប៉ាន សូរស័ក្តិ រដ្ឋមន្ត្រី ក្រសួងពាណិជ្ជកម្មបានមានប្រសាសន៍ផងដែរថា ទោះបីជាក្នុងរយៈពេលមួយឆ្នាំកន្លងទៅនេះ ក្រសួងពាណិជ្ជកម្ម សម្រេចបាននូវសមិទ្ធផលជាច្រើនក៏ដោយ ប៉ុន្តែយើងនៅតែជួបប្រទះនូវប្រឈមជាច្រើនទៀតនៅឆ្នាំខាងមុខ ជាពិសេសប្រឈមនឹងការរឹតត្បិតរបស់សហភាពអ៊ឺរ៉ុបលើការគំរាមដកហូតប្រព័ន្ធអនុគ្រោះ EBA ពីកម្ពុជា បច្ច័យអវិជ្ជមានពីសង្គ្រាមពាណិជ្ជកម្មរវាងសហរដ្ឋអាមេរិក និងចិន និងចលនាការពារនិយម និងការបែងចែកប៉ូលនយោបាយភូមិសាស្ត្រ ជាដើម ។ ដូច្នេះហើយ វិស័យពាណិជ្ជកម្មរបស់កម្ពុជាចាំបាច់ត្រូវតែពង្រឹងបន្ថែមទៀត ដើម្បីបង្កើនលទ្ធភាពប្រកួតប្រជែង នៃសហគ្រាស និងផលិតផលរបស់កម្ពុជានៅលើទីផ្សារក្នុងស្រុក និងលើទីផ្សារអន្តរជាតិ ។
លោករដ្ឋមន្ត្រីថ្លែងថា ៖« ក្នុងន័យនេះ ខ្ញុំសន្យាថា នឹងធ្វើការយ៉ាងសកម្មជាមួយថ្នាក់ដឹកនាំ និងមន្ត្រីរាជការក្រសួងពាណិជ្ជកម្ម ក៏ដូចជាសហការជាមួយបណ្តាក្រសួង-ស្ថាប័នពាក់ព័ន្ធ ដើម្បីអនុវត្តទិសដៅការងារពាណិជ្ជកម្ម ឆ្នាំ២០១៩ ដែលបានអនុម័តដោយអង្គសន្និបាត ដោយប្រសិទ្ធភាពខ្ពស់ និងឲ្យសម្រេចបាននូវសមិទ្ធផលធំធេងជូនរដ្ឋាភិបាល និងប្រទេសជាតិ »៕
ចែករំលែកព័តមាននេះ