រាជធានីភ្នំពេញ ៖ ប្រទេសចិនបានជួយពង្រឹងភាពជាម្ចាស់ការ និងឯករាជ្យភាពដល់ប្រទេសកម្ពុជា ខណៈកម្ពុជាអនុវត្តនយោបាយទន់ភ្លន់ជាមួយបរទេស ។ នេះបើតាមការអះអាងរបស់សម្តេចប្រធានព្រឹទ្ធសភា ។
ខណៈដែលអនុញ្ញាតឲ្យឯកអគ្គរដ្ឋទូតសាធារណរដ្ឋសប្រធាមានិតចិនថ្មីប្រចាំនៅកម្ពុជា លោកWang wentian កាលពីពីថ្ងៃទី២៦ ខែធ្នូ នៅវិមានសម្តេចវិបុលសេនាភក្តីសាយ ឈុំ ប្រធានព្រឹទ្ធសភាបានលើកឡើងថា បេសកកម្មការទូតរបស់ឯកឧត្តមឯអគ្គរដ្ឋទូតនៅព្រះរាជាណាចក្រកម្ពុជានាពេលនេះស្របពេលដែលរដ្ឋាភិបាលនៃប្រទេសទាំងពីរបាននឹងកំពុងអបអរសាទរខួបអនុស្សាវរីយ៍លើកទី៦០ ថ្ងៃបង្កើតទំនាក់ទំនងការទូតរវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន (ឆ្នាំ១៩៥៨-២០១៨) ហើយទំនាក់ទំនងការទូតនេះត្រូវបានបង្កើតឡើងដោយស្នាព្រះហស្ថ ព្រះករុណាព្រះបាទសម្តេចព្រះ នរោត្តមសីហនុ «ព្រះបរមរតនកោដ្ឋ» ជាមួយថ្នាក់ដឹកនាំចិនជំនាន់មុន ។
សម្តេចប្រធានព្រឹទ្ធសភាក៏បានសម្តែងនូវសេចក្តីរីករាយដែលបានឃើញនូវទំនាក់ទំនងមិត្តភាព សាមគ្គីភាព និងសហប្រតិបត្តិការរវាងប្រទេសទាំងពីរត្រូវបានលើកកម្ពស់ឥតឈប់ឈររហូតឈានដល់កម្រិតកំពូលនាពេលបច្ចុប្បន្ននេះ គឺទំនាក់ទំនងកិច្ចសហប្រតិបត្តិការនៃភាពជាដៃគូជាយុទ្ធសាស្ត្រគ្រប់ជ្រុងជ្រោយ ។ ជាមួយគ្នានេះសម្តេចក៏បានថ្លែងអំណរគុណចំពោះសាធារណរដ្ឋប្រជាមានិតចិនដែលបានរួមវិភាគទានយ៉ាងធំធេងក្នុងការកសាង និងអភិវឌ្ឍព្រះរាជាណាចក្រកម្ពុជាឲ្យមានការរីកចម្រើនដូចបច្ចុប្បន្ននេះ ។
ការរីកចម្រើនលើគ្រប់វិស័យរបស់ព្រះរាជាណាចក្រកម្ពុជាមិនអាចកាត់ផ្តាច់បានពីការជួយឧបត្ថម្ភគាំទ្រយ៉ាងទាន់ពេលវេលា និងមានប្រសិទ្ធភាពពីសាធារណរដ្ឋប្រជាមានិតចិនបានឡើយ ។ សម្តេចបានគូសបញ្ជាក់ថា «ការជួយឧបត្ថម្ភគាំទ្រ និងកិច្ចសហប្រតិបត្តិការលើគ្រប់ វិស័យរវាងប្រទេសទាំងពីរមិនគ្រាន់តែនាំមកនូវការរីកចម្រើនខាងសេដ្ឋកិច្ច និងសង្គមរបស់ព្រះរាជាណាចក្រកម្ពុជាប៉ុណ្ណោះទេ គឺថែមទាំងបានជួយដល់ការពង្រឹងភាពជាម្ចាស់ និងឯករាជ្យភាពរបស់ព្រះរាជាណាចក្រកម្ពុជាទៀតផងដែរ ។
កម្ពុជា និងចិន គឺជាអ្នកជិតខាងល្អជាមិត្តល្អជាបងប្អូនល្អ និងជាដៃគូរល្អ» ។ សម្តេចប្រធានព្រឹទ្ធសភាបានគូសបញ្ជាក់ថា ព្រះរាជាណាចក្រកម្ពុជានឹងបន្តអនុវត្តគោលនយោបាយការបរទេសទន់ភ្លន់សុភាពរាបសារ ដើម្បីបម្រើផលប្រយោជន៍ប្រជាជនកម្ពុជា លើមូលដ្ឋាននៃការថែរក្សាឯករាជ្យ អធិបតេយ្យភាព និងការអភិវឌ្ឍព្រះរាជាណាចក្រកម្ពុជាប្រកបដោយចីរភាព ។
សម្តេចប្រធានព្រឹទ្ធសភា ក៏បានថ្លែងអំណរគុណយ៉ាងជ្រាលជ្រៅចំពោះសភាប្រឹក្សានយោបាយប្រជាជនចិន និងរដ្ឋាភិបាលចិន ដែលបានផ្តល់ជំនួយដល់ព្រឹទ្ធសភាកម្ពុជាតាំងពីនីតិកាលទី១ រហូតមកទល់បច្ចុប្បន្ននេះ ។លោកបានបញ្ជាក់ថា ថ្នាក់ដឹកនាំជាន់ខ្ពស់នៃសាធារណរដ្ឋប្រជាមានិតចិន នៅតែបន្តការគាំ ទ្រចំពោះការខិតខំរបស់រាជរដ្ឋាភិបាលកម្ពុជា ក្នុងការអភិវឌ្ឍសេដ្ឋកិច្ចសង្គម ដើម្បីពង្រឹងឯករាជ្យអធិបតេយ្យភាពរបស់ខ្លួន និងជ្រើសរើសមាគ៌ាអភិវឌ្ឍប្រទេស សមស្របតាមសភាពការណ៍ជាក់ស្តែងរបស់ព្រះរាជាណាចក្រកម្ពុជា ។
លោកបានសម្តែងក្តីសង្ឃឹមថា តាមរយៈបេសកកម្មការទូត របស់លោក នៅព្រះរាជាណាចក្រកម្ពុជានឹងនាំមកនូវការផ្លាស់ប្តូបទពិសោធន៍ និងស្វែងយល់ពីគ្នាទៅវិញទៅមករវាងយុវជននៃប្រទេសទាំងពីរឲ្យកាន់តែមានសកម្មភាពច្រើនថែមទៀត ក្នុងការជំរុញនូវទំនាក់ទំនង មិត្តភាព សាមគ្គីភាព និងកិច្ចសហប្រតិបត្តិការវាងប្រជាជន និងប្រទេសពីរ ៕
ចែករំលែកព័តមាននេះ