រាជធានីភ្នំពេញ ៖ ក្នុងនាមសេនាធិការរាជរដ្ឋាភិបាលក្រសួងការងារ និងបណ្តុះបណ្តាលវិជ្ជាជីវត្រៀមរៀបចំពិធីអបអរសាទរខួប១០០ឆ្នាំ នៃការបង្កើតអង្គការ ILO និងខួប៥០ឆ្នាំនៃការចូលជាសមាជិកអង្គការ ILO របស់កម្ពុជា តើសមិទ្ធិផលអ្វីខ្លះដែលជាកិច្ចសហប្រតិបត្តិការដ៏ល្អរវាងកម្ពុជា និងអង្គការ ILO សម្រេចបាន ។
គ្រោងរៀបចំអបអរសាទនេះត្រូវបានធ្វើឡើងក្នុងកិច្ចប្រជុំត្រីភាគីថ្នាក់ជាតិរបស់គណៈកម្មការជាតិត្រួតពិនិត្យការអនុវត្តអនុសញ្ញាអន្តរជាតិខាងការងារដែលកម្ពុជាបានផ្តល់សច្ចាប័ន ដើម្បីពិភាក្សាការងារស្តីពីវឌ្ឍនភាពនៃការអនុវត្តអនុសញ្ញា និងអនុសាសន៍របស់អង្គការអន្តរជាតិខាងការងារថ្ងៃទី២១ ខែធ្នូ ឆ្នាំ២០១៨ នៅទីស្តីការក្រសួង ។
កិច្ចប្រជុំក្រោមការដឹកនាំដោយរដ្ឋមានការចូលរួមពីសមាគមនិយោជក តំណាងសហជីព តំណាងក្រសួងមហាផ្ទៃទីស្តីការគណៈរដ្ឋមន្ត្រី ក្រសួងយុត្តិធម៌ អគ្គស្នងការដ្ឋាននគរបាលជាតិ ក្រសួងការបរទេស និងសហប្រតិបត្តិការអន្តរជាតិ និងថ្នាក់ដឹកនាំ និងមន្ត្រីជំនាញនៃក្រសួងការងារ និងបណ្តុះបណ្តាលវិជ្ជាជីវៈ ។ កិច្ចប្រជុំបានពិភាក្សាអំពីវឌ្ឍនភាពការងារនាពេលកន្លង ពាក់ព័ន្ធនឹងការអនុវត្តសេរីភាពអង្គការវិជ្ជាជីវៈនៅកម្ពុជា និងដោះស្រាយបញ្ហាប្រឈមនានា ដែលនៅសេសសល់នៅក្នុងអនុសាសន៍នៃរបាយការណ៍បេសកកម្មដោយផ្ទាល់ (DCM) របស់អង្គការ ILO នៅកម្ពុជា ។
ជាលទ្ធផលកិច្ចប្រជុំបានសម្រេចដាក់ចេញនូវផែនការជាជំហានបន្តបន្ទាប់ទៀត ក្នុងការរកដំណោះស្រាយបញ្ហាលើករណីចោទប្រកាន់មេដឹកនាំសហជីព និងការពង្រឹងយន្តការការងារ ក្នុងការចូលរួមសហការពីគ្រប់ភាគីពាក់ព័ន្ធ ដើម្បីធានាថា ការអនុវត្តសិទ្ធិសេរីភាពអង្គការវិជ្ជាជីវៈស្របទៅតាមបទដ្ឋានអន្តរជាតិ និងច្បាប់ជាតិជាធរមាន ។
ជាកិច្ចបញ្ចប់លោក អ៊ិត សំហេង រដ្ឋមន្ត្រីក្រសួងការងារ និងជាប្រធានអង្គប្រជុំបានផ្តល់នូវអនុសាសន៍សំខាន់ៗជូនសមាជិកគណៈកម្មការជាតិក្នុងការធានាការអនុវត្តសេរីភាពអង្គការវិជ្ជាជីវៈដោយស្នើសុំក្រសួងស្ថាប័នពាក់ព័ន្ធ ដើម្បីជំរុញការដោះស្រាយបញ្ហាប្រឈមនានាដែលនៅសេសសល់ឱ្យបានឆាប់រហ័សស្របទៅអនុសញ្ញា និងតាមបញ្ញត្តិនៃព្រះរាជាណាចក្រកម្ពុជា ៕
ចែករំលែកព័តមាននេះ