រាជធានីភ្នំពេញ៖ តារាភេទទី៣មួយចំនួនដែលមានលទ្ធភាពបានវះកាត់កែប្រដាប់ភេទ និងសុដន់ ឲ្យខ្លួនមានលក្ខណៈជាមនុស្សស្រី ។ ទោះបីពួកគេដឹងថាអាចប្រឈមនឹងគ្រោះថ្នាក់ និងការឈឺចាប់ក្តី តែនៅតែធ្វើ ដើម្បីបំពេញបំណងរបស់ពួកគេ ។
នាងប៉ុបពី តារាសម្តែងភេទទីបីដែលវះកាត់បានសម្រេចក្លាយជាមនុស្សស្រីពេញលក្ខណៈនោះធ្វើឲ្យមហាជនលាន់មាត់សរសើរថា« នាងពិតជាមានសម្រស់ស្រស់ស្អាតជាងតារាស្រីមួយចំនួនពេលនាងតុបតែងខ្លួន ម្តងៗ»។ ជាពិសេសទៅទៀតនោះ ប៉ុបពីមានទីផ្សារសិល្បៈដោយសារសម្រស់ និងទេពកោសល្យរបស់នាង ។ ប៉ុបពីនិយាយកាលពីពេល ថ្មីៗកន្លងមកថានាងជាភេទទី៣ដំបូងគេដែលបានចំណាយលុយរាប់ម៉ឺនដុល្លារ កាត់ប្រដាប់ភេទបុរសចោល កែទៅជាស្រីទោះបីជាត្រូវទ្រាំនឹងការឈឺចាប់បែបណាក្តី។
នាងថាធ្វើបែបនេះមកពីចិត្តនាងចង់ក្លាយជាស្រី១០០% ។ នាងបានសិក្សាពីគ្លីនិកច្បាស់លាស់នៅប្រទេសថៃ ដឹងថាមានប្រវត្តិត្រឹមត្រូវ ទាំងតួ ល្បីៗរបស់ថៃក៏វះកាត់ទីនោះដែរ ទើបនាងហ៊ានឲ្យកែភេទ ។
ប៉ុបពីថាកន្លែងវះកាត់ សំខាន់ៗលែងឈឺចាប់ទៀតហើយ ព្រោះពេលវេលាកន្លងផុតទៅ៧ទៅ៨ឆ្នាំមកហើយ ។ ទោះជាយ៉ាងណាក្តីនាងមិនអាចមានកូនទេ ។ ប៉ុបពីថា បើចង់កែភេទ សម្រាប់ភេទទី៣ទាំងឡាយត្រៀម១ម៉ឺនដុល្លារឡើងទៅសម្រាប់ចំណាយ ។
មិនខុសពីប៉ុបពី តារាភេទទី៣រលកក្រោយទើបល្បីឈ្មោះរាងម៉ាប់ទ្រលុកទ្រលន់ កម្ពស់បានដែលគេហៅថាកញ្ញា ផេន ខេក ក៏បានកាត់ប្រដាប់ភេទចេញ កែទៅជាស្រីដែរ ។ ផេកខេកបានឲ្យដឹងក្នុងពិធីខួបកំណើតអ្នកសិល្បៈមួយរូបកាលពីថ្ងៃទី១១ ធ្នូ ២០១៨ថានាងសម្រេចកាត់ប្រដាប់ភេទចោល ព្រមទាំងទាំងវះកាត់ពង្រីកដើមទ្រូង និងវះកាត់ប្រដាប់ភេទចេញ ដោយវេជ្ជបណ្ឌិត ជំនាញៗនៅគ្លីនិកមួយក្នុងប្រទេសថៃ ។
ការវះកាត់នេះបន្ទាប់ពីតាមដានយ៉ាងលម្អិតពីទីនោះ។ ២ឆ្នាំហើយដែលនាងវះកាត់ចំណាយជាង១មុឺនដុល្លារ ។ «ក្រោយពេលវះកាត់អារម្មណ៍ស្លុតណាស់ ព្រោះតែធ្លាប់ឮព័ត៌មានគេថាវះកាត់ប្រឈមមហារីក តែពេលយើងជួបពេទ្យគេល្អ ច្បាស់ៗ ចេះរបៀបពន្យល់ ក៏លែងអី ដោយអនុវត្តតាមថ្នាំគេឲ្យប្រើរយៈពេល ប៉ុន្មានៗរាល់ថ្ងៃទៅលែងអី ។
គ្មានអ្នកណាចង់ទៅជះលុយចោលអត់ប្រយោជន៍បែបនេះទេ ធ្វើម៉េចនេះជាកម្រិតតាក់តែងពីធម្មជាតិ សំខាន់នាងខ្ញុំបានធ្វើអ្វីដែលល្អសង្គមទទួលស្គាល់ »។
ផ្ទុយពីគេកញ្ញាយេយេដែលវះកាត់ពង្រីកដើមទ្រូង តែមិនវះកាត់កែប្រដាប់ភេទទេ បើទោះជានាងមានប្រាក់អាចច្នៃបានក្តី ។ យេយេនិយាយថា«មិនចង់ទេធ្វើតែដើមទ្រូង គឺគ្រប់គ្រាន់ ។ ណាមួយស្តាយលុយព្រោះនឹកឃើញថាមិនទុកចិត្ត ម្យ៉ាងស្រួលដែរពេលយើងបត់ដៃបត់ជើង បើទៅជាស្រីវិញគឺពិបាក ។
ខ្ញុំសុខចិត្តរស់នៅបែបនេះ និងសរសើរដល់អ្នកដែលហ៊ានកាត់របស់ពិតចោល នាងខ្ញុំវិញដំបូងគិតដែរ តែអត់ហ៊ានប្រថុយសោះចេះតែ ខ្លាចៗមកពីឃើញមានអ្នករងគ្រោះ ទើបក្លាយជារូបភាពមិនល្អនៅក្នុងចិត្តមកដល់សព្វថ្ងៃនេះ»។
តារាភេទទី៣កញ្ញាភី សម័យ ក្នុងថ្ងៃខួបកំណើតកាលពីថ្ងៃទី១១ ធ្នូ បាននិយាយថា នាងមានគម្រោងវះកាត់ប្ដូរភេទទៅជាមនុស្សស្រីក្នុងពេល ឆាប់ៗខាងមុខ ។ ការវះកាត់ប្ដូរភេទ នាងគ្មានរអាឡើយ ។ ភី សម័យ និយាយថា៖ «ខ្ញុំធ្លាប់ឆ្លងកាត់ការវះកាត់ ខ្លះៗហើយ ដូចជានៅលើដងខ្លួន និងផ្ទៃមុខ ។ ដូច្នេះការវះកាត់ប្ដូរភេទនេះខ្ញុំអត់ខ្លាចទេ បើមានលុយខ្ញុំទៅវះកាត់ភ្លាម។
ធ្វើម៉េចបើយើងមានទំនោរទៅជាបែបនេះ បើទោះមានអ្នកនៅរើសអើង តែគ្មានបុគ្គលណាចង់លំបាកឡើយ កុំមើលស្រាលពួកយើងខ្ញុំ ។ ត្រូវដឹងថាកូនចៅរបស់យើងមានប្រុស មានស្រី អ៊ីចឹងមិនដឹងថាធម្មជាតិបែបណាទេប្រយ័ត្នធ្លាក់មកដូចយើង»។
ភី សម័យ បានប្រឡូកសិល្បៈរយៈពេល៣ឆ្នាំមកហើយ ។ នាងបានកែកុនសម្រស់នៅលើផ្ទៃមុខដោយចាក់ចង្កា ធ្វើត្របកភ្នែក និងចាក់មុខអក្សរV ជាដើម ៕
ចែករំលែកព័តមាននេះ