ខេត្តបន្ទាយមានជ័យ ៖ លោកតាម្នាក់វ័យ៨០ឆ្នាំម្នាក់បានរងរបួសធ្ងន់បាក់ភ្លៅ ក្នុងគ្រោះថ្នាក់ចរាចរណ៍រវាងម៉ូតូបុកជាមួយកង់ ។ ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង៦និង៣០ នាទីយប់ថ្ងៃទី១២ខែធ្នូ ឆ្នាំ២០១៨ នៅចំណុចមុខមន្ទីរអប់រំយុវជន និងកីឡាខេត្ត…
ខេត្តបន្ទាយមានជ័យ ៖ លោកតាម្នាក់វ័យ៨០ឆ្នាំម្នាក់បានរងរបួសធ្ងន់បាក់ភ្លៅ ក្នុងគ្រោះថ្នាក់ចរាចរណ៍រវាងម៉ូតូបុកជាមួយកង់ ។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង៦និង៣០ នាទីយប់ថ្ងៃទី១២ខែធ្នូ ឆ្នាំ២០១៨ នៅចំណុចមុខមន្ទីរអប់រំយុវជន និងកីឡាខេត្ត ស្ថិតក្នុងភូមិខ្លាកូនថ្មី សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ។
ប្រភពព័ត៌មានពីនគរបាលមូលដ្ឋានបានឲ្យដឹងថា ជនរងគ្រោះជាអ្នកជិះកង់ឈ្មោះ ណក ហម ភេទប្រុស អាយុ៨០ឆ្នាំ រស់នៅភូមិសូភី សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ។ ចំណែកអ្នកបើកបរម៉ូតូឈ្មោះ តូ ប៊ុនណារ៉ូ ភេទប្រុស អាយុ១៧ឆ្នាំ រស់នៅភូមិ ជំទាវ ឃុំឫស្សីក្រោក ស្រុកមង្គលបូរី ខេត្តបន្ទាយមានជ័យ។
នគរបាលបានប្រាប់ទៀតថា មុនពេលកើតហេតុ គេបានឃើញលោកតាវ័យ៨០ឆ្នាំខាងលើបានជិះកង់ ធ្វើដំណើរក្នុងទិសដៅពីកើតទៅលិច លុះមកដល់ចំណុចកើតហេតុ គាត់បានបត់មកឆ្វេងដៃចូលមន្ទីរអប់រំ យុវជននិងកីឡាខេត្ត ពេលនោះស្រាប់តែមានម៉ូតូ១គ្រឿងបើកបរក្នុងទិសបញ្ច្រាសគ្នាពីលិចទៅកើតក្នុងល្បឿនលឿនបានបុកអ្នកជិះកង់ បណ្តាលឲ្យលោកតាដែលជាអ្នកជិះកង់ដួលរងរបួសធ្ងន់បាក់ភ្លៅខាងស្តាំ ចំណែកអ្នកបើកបរម៉ូតូរងរបួសស្រាល ។
ក្រោយពេលកើតហេតុ ជនរងគ្រោះទាំង២ត្រូវបានគេដឹកយកទៅសង្គ្រោះនៅមន្ទីរពេទ្យ ។
បច្ចុប្បន្នវត្ថុតាងកង់និងម៉ូតូត្រូវបានសមត្ថកិច្ចយកមករក្សាទុកនៅអធិការដ្ឋាននគរបាលក្រុងសិរីសោភ័ណ រង់ចាំធ្វើការដោះស្រាយនៅពេលក្រោយ៕
ចែករំលែកព័តមាននេះ