រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោក សុខ ឥសាន បានបន្តអះអាងថាលោក សម រង្ស៊ី ត្រូវនៅឯកោម្នាក់ឯងក្នុងចំណោមមន្ត្រីបក្សសង្គ្រោះជាតិ១១៨នាក់ ដែលជាប់បម្រាមតុលាការកំពូល…
រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោក សុខ ឥសាន បានបន្តអះអាងថាលោក សម រង្ស៊ី ត្រូវនៅឯកោម្នាក់ឯងក្នុងចំណោមមន្ត្រីបក្សសង្គ្រោះជាតិ១១៨នាក់ ដែលជាប់បម្រាមតុលាការកំពូល ។
ការលើកឡើងរបស់អ្នកនាំពាក្យនេះ ខណៈសមាជិកសភាគណបក្សប្រជាជនកម្ពុជាជាង៨០នាក់ធ្វើសំណើវិសោធនកម្មច្បាប់ស្តីពីគណបក្សនយោបាយ ដើម្បីបើកផ្លូវឲ្យអ្នកនយោបាយបក្សប្រឆាំងត្រូវតុលាការកំពូលហាមឃាត់មិនឲ្យធ្វើនយោបាយរយៈពេល៥ឆ្នាំ ។ លោក សុខ ឥសាន បានឲ្យដឹងតាមប្រពន្ធតេឡេក្រាម នៅថ្ងៃទី៩ ធ្នូនេះថា ទណ្ឌិត សម រង្ស៊ី ត្រូវនៅឯកោ ព្រោះនៅក្នុងសេចក្តីថ្លែងការណ៍របស់រាជរដ្ឋា ភិបាលកម្ពុជា ចុះថ្ងៃទី៣ ខែធ្នូ ឆ្នាំ២០១៨ ស្តីពីដំដោះស្រាយនយោបាយក្នុងការពង្រឹងលទ្ធិប្រជាធិបតេយ្យ នីតិរដ្ឋ និងការអនុវត្តនយោបាយបង្រួបបង្រួមជាតិ មិនមានជាប់ពាក់ព័ន្ធនឹងឈ្មោះ សម រង្ស៊ីទេ ។
លោកបន្តថា ក្នុងចំណោមមន្ត្រីអតីតបក្សប្រឆាំងទាំង១១៨រូប ដែលសាលដីកាតុលាការកំពូលហាមធ្វើនយោបាយរយៈពេល៥ឆ្នាំ ក៏គ្មានឈ្មោះ សម រង្ស៊ីដែរ ។ លោកបន្តថា លោកសម រង្ស៊ី លែងមានតួនាទីអ្វីសំខាន់នៅក្នុងអតីតបក្សប្រឆាំងទៀតហើយ ដោយសារបានលាលែងអស់ហើយ ។ ទោះបីទណ្ឌិត សម រង្ស៊ី នៅតែចង់ផ្សារភ្ជាប់ខ្លួនជាមួយ កឹម សុខា តាមពាក្យស្លោកថា សម រង្ស៊ី និងកឹម សុខា ជាមនុស្សតែមួយយ៉ាងណាក្តី ក៏មិនអាចជួយបានដែរ ពីព្រោះមនុស្សពីរនាក់ដាច់ដោយឡែកពីគ្នា ។ លោកបន្ថែមថា ហេតុនេះទណ្ឌិត សម រង្ស៊ី គឺជាមនុស្សនៅក្រៅសង្វៀននៃដំណោះស្រាយនយោបាយតាមស្មារតីនៃសេចក្តីថ្លែងការណ៍របស់រាជរដ្ឋាភិបាលកម្ពុជា ។ ដូច្នេះទណ្ឌិត សម រង្ស៊ី គឺជាមនុស្សឯកោ ។
សូមជម្រាបថា សម្តេច ស ខេង ឧបកនាយករដ្ឋមន្ត្រីធ្លាប់បានឲ្យដឹងថា ក្រសួងមហាផ្ទៃកំពុងសិក្សាក្នុងការដកបម្រាមចំពោះអ្នកនយោបាយបក្សប្រឆាំងដែលត្រូវតុលាការហាមឃាត់ផងដែរ ។ សម្តេចក៏បានលើកឡើងថា ការស្នើសុំដកបម្រាមនយោបាយអតីតបក្សប្រឆាំងអាចធ្វើបាននៅពេលសេចក្តីស្នើច្បាប់ស្តីពីគណបក្សត្រូវបានរដ្ឋសភាអនុម័តជាស្ថានពរសិន ។ សម្តេចក៏បានឲ្យដឹងថា ក្រសួងមហាផ្ទៃនឹងស្នើសុំដកបម្រាមចំពោះអ្នកនយោបាយណាដែលត្រូវបានតុលាការហាមឃាត់ គោរពតាមសាលដីការបស់តុលាការកំពូលតែប៉ុណ្ណោះ ។ បើតាមការអះអាងរបស់សម្តេចទំនងបង្ហាញថា ក្រុមលោក កឹម សុខា អាចទំនងនឹងត្រូវបានក្រសួងមហាផ្ទៃស្នើសុំដកបម្រាម ដើម្បីឲ្យមាននីតិសម្បទាធ្វើនយោបាយវិញ ព្រោះក្រុមលោក កឹម សុខា ភាគច្រើនគោរពតាមសាលក្រមតុកាការ ។ ចំណែកក្រុមលោក សម រង្ស៊ី វិញគេសង្កេតឃើញថា មិនបានគោរពតាមសាលក្រមតុលាការនោះទេ ។
សូមជម្រាបថា រដ្ឋសភាកំពុងប្រញាប់ក្នុងការពន្លឿនពិភាក្សាលើកសេចក្តីស្នើវិសោធនកម្មច្បាប់ស្តីពីគណបក្សនយោបាយ ដែលគម្រោងនោះអចិន្ត្រៃយ៍រដ្ឋសភានឹងបើកកិច្ចប្រជុំពិនិត្យឡើងវិញ បន្ទាប់ពីគណបក្សជំនាញរដ្ឋសភាបានសិក្សារួចនៅថ្ងៃទី១១ ខែធ្នូ ខាងមុខនេះ ។ សេចក្តីស្នើច្បាប់នេះបញ្ជាក់ស្រាប់វិសោធនកម្មខាងលើមានគោលដៅសំខាន់ៗ គឺបញ្ជាក់ឲ្យច្បាប់តាមផ្លូវច្បាប់អំពីករណីបុគ្គលដែលត្រូវបានតុលាកាហាមឃាត់ការធ្វើសកម្មភាព នយោបាយ ។ បើកលទ្ធភាពឲ្យបុគ្គលប្រភេទខាងលើកអាចទទួលបាននីតិសម្បទាឡើងវិញ តាមច្បាប់នេះ ។ វិសោធកម្មច្បាប់នេះក៏មានគោលបំណងពង្រឹងលទ្ធិប្រជាធិតេយ្យសេរីពហុបក្សនីតិរដ្ឋព្រមទាំងលើកកម្ពស់ស្មារតីបង្រួបបង្រួមជាតិផងដែរ ៕
ចែករំលែកព័តមាននេះ