ខេត្តសៀមរាប ៖ ក្រុមអ្នកជំនាញការអាដហុកនៃអង្គការយូណេស្កូចំនួន៤រូប មន្ត្រីអាជ្ញាធរជាតិអប្សរា រួមទាំងមន្ត្រីបរិស្ថាន និងភាគីក្រុមហ៊ុនសាងសង់ផ្លូវ បានចុះពិនិត្យមើលការសាង់សង់ផ្លូវថ្មីលើភ្នំគូលែន ដើម្បីត្រៀមទទួលយោបល់កែលម្អនៅក្នុងកិច្ចប្រជុំបច្ចេកទេសអាយស៊ីស៊ី-អង្គរលើកទី៣១ ដែលនឹងប្រព្រឹត្តទៅនៅថ្ងៃទី៤-៥ ខែធ្នូ ឆ្នាំ២០១៨ ខាងមុខនេះ។ លោកបណ្ឌិត ឈាន រដ្ឋា ប្រធានស្តីទី នៃនាយកដ្ឋានអភិរក្សប្រាសាទក្រៅឧទ្យានអង្គរ បានឱ្យដឹងថា ក្នុងដំណើរចុះពិនិត្យរបស់ក្រុម អ្នកជំនាញ ការអាដហុក គឺក្នុងគោលបំណងពិនិត្យមើល និងតាមដានការងារធ្វើផ្លូវនេះ ថាតើបានអនុវត្តន៍ត្រឹមត្រូវ ស្របតាមអនុសាសន៍កន្លងមកដែរឬទេ?
ដើម្បីចៀសវាងផលប៉ះពាល់ធ្ងន់ធ្ងរដល់ព្រៃឈើ និងទីតាំង បុរាណដ្ឋាន មួយចំនួនត្រូវការពារ ហើយបន្ថែមពីនោះ អ្នកជំនាញបានចុះពិនិត្យមើលរណ្តៅកំណាយ ចំនួន០៩កន្លែង ដែលក្រុមការងាររបស់អាជ្ញាធរជាតិអប្សរាបាននឹងកំពុងធ្វើកំណាយ ដើម្បីឱ្យដឹងថា តើនៅក្រោមដីដែលត្រូវធ្វើផ្លូវពីលើ និងនៅសងខាងផ្លូវដែលត្រូវធ្វើផ្លូវនោះ មានបុរាណដ្ឋាន ឬរចនាសម្ពន្ធ អ្វីដែលគួរចៀសវាងឬអត់។
លោកបណ្ឌិត ឈាន រដ្ឋា បានឱ្យដឹងទៀតថា រណ្តៅចំនួន០៩កន្លែង នៅភូមិអន្លង់ធំនោះ ក្រុមការងារបានប្រទះឃើញមានបំណែកកុលាលភាជន៍តិចតួច និងបានប្រទះ ឃើញរចនាសម្ពន្ធធ្វើអំពីឥដ្ឋចំនួនមួយរណ្តៅ តែមិនទាន់អាចសន្និដ្ឋានបានថា ជាអ្វីឱ្យប្រាកដនៅឡើយទេ គឺត្រូវការពេលវេលាដើម្បីសិក្សាបន្ថែម រីឯចំណែកយោបល់លើការធ្វើផ្លូវ ភាគច្រើនគឺគោរពតាម អនុសាសន៍កន្លងមក និងមានកន្លែងតិចតួចប៉ុណ្ណោះដែលត្រូវពង្រីកធំ ដោយយោងទៅលើស្ថានភាព ផ្លូវកោង ហើយយោបល់កែតម្រូវយ៉ាងណានោះ នឹងដឹងពិស្តារនៅក្នុងអង្គប្រជុំអាយស៊ីស៊ី-អង្គរ នាពេលខាងមុខនេះ។
សូមបញ្ជាក់ដែរថា ដំណើរចុះពិនិត្យទីតាំង សមិទ្ធផលការងារការដ្ឋាន សាង់សង់ហេដ្ឋារចនាសម្ពន្ធសំណង់ បរិស្ថានផ្សេងៗរបស់អ្នកជំនាញការអាដហុកនៃអង្គការយូណេស្កូ គឺតែងធ្វើឡើងជាប្រចាំមុនបើកកិច្ចប្រជុំអាយស៊ីស៊ី-អង្គរ ដើម្បីតាមដានរាល់សកម្មភាព ការងារ ថាដំណើរទៅតាមអនុសាសន៍ និងគោរពច្បាប់បេតិកភណ្ឌពិភពលោកឬអត់៕
ចែករំលែកព័តមាននេះ