រាជធានីភ្នំពេញ ៖ តំណាងរាស្ត្រហត្ថលេខីចំនួន៨៧រូប បានផ្តួចផ្តើមធ្វើសេចក្តីច្បាប់ស្តីពីវិសោធនកម្មមាត្រា៤៥ថ្មី (ស្ទួន) នៃច្បាប់ស្តីពីគណបក្សនយោបាយដោយផ្តល់សិទ្ធិឲ្យនាយករដ្ឋមន្ត្រីស្នើសុំផ្តល់នីតិសម្បទានដល់អ្នកនយោបាយដែលត្រូវតុលាការហាមឃាត់ឲ្យមានសិទ្ធិធ្វើនយោបាយឡើងវិញ ។
យោងតាមសេចក្តីជូនដំណឹងរបស់អគ្គលេខាធិការដ្ឋានរដ្ឋសភាបានឲ្យដឹងថា តំណាងរាស្ត្រហត្ថលេខីចំនួន៨៧រូប បានផ្តួចផ្តើមធ្វើសេចក្តីស្នើច្បាប់ស្តីពីវិសោធនកម្មមាត្រា៤៥ថ្មី (ស្ទួន) នៃច្បាប់ស្តីពីគណបក្សនយោបាយទៅមាត្រា៤៥ថ្មី(ស្ទូនមួយ) ។ មាត្រា៤៥ថ្មី(ស្ទួនមួយ)មានខ្លឹមសារយ៉ាងដូច្នេះថា បុគ្គលដែលត្រូវតុលាការសម្រេចហាមឃាត់ការធ្វើសកម្មភាពនយោបាយមិនអាចបង្កើតគណបក្សនយោបាយ ឬចូលរួមក្នុងគណបក្សនយោបាយណាមួយ ឬឈរឈ្មោះឲ្យគេបោះឆ្នោត ឬធ្វើសកម្មភាពណាមួយគាំទ្រ ឬប្រឆាំងគណបក្សណាមួយបានឡើយ ។
បុគ្គលដែលបានតុលាការសម្រេចហាមឃាត់ការធ្វើសកម្មភាពនយោបាយនេះនឹងអាចទទួលបានវិញ នូវសិទ្ធិនយោបាយពេញលេញដោយពេញច្បាប់បន្ទាប់ពីផុតរយៈពេលនៃការហាមឃាត់ដែលកំណត់ដោយសាលដីការរបស់តុលាការកំពូល ឬក្នុងករណីដែលបុគ្គលនោះត្រូវបានផ្តល់នីតិសម្បទាឡើងវិញដោយព្រះមហាក្សត្រតាមដំណើរបស់នាយករដ្ឋមន្ត្រី តាមសេចក្តីស្នើសុំរបស់រដ្ឋមន្ត្រីក្រសួងមហាផ្ទៃ ។
ប្រភពបន្តថា ដូចសេចក្តីថ្លែងហេតុនៃសេចក្តីស្នើច្បាប់នេះបញ្ជាក់ស្រាប់វិសោធនកម្មខាងលើមានគោលដៅសំខាន់ៗ គឺបញ្ជាក់ឲ្យច្បាប់តាមផ្លូវច្បាប់អំពីករណីបុគ្គលដែលត្រូវបានតុលាកាហាមឃាត់ការធ្វើសកម្មភាពនយោបាយ ។ បើកលទ្ធភាពឲ្យបុគ្គលប្រភេទខាងលើកអាច ទទួលបាននីតិសម្បទាឡើងវិញតាមច្បាប់នេះ ។ វិសោធកម្មច្បាប់នេះក៏មានគោលបំណងពង្រឹងលទ្ធិប្រជាធិតេយ្យសេរីពហុបក្សនីតិរដ្ឋព្រមទាមងទាំងលើកកម្ពស់ស្មារតីបង្រួបបង្រួមជាតិផងដែរ ។
លោក ឡេង ប៉េងឡុង អ្នកនាំពាក្យរដ្ឋសភាបានឲ្យដឹងក្នុងសន្និសីទសារព័ត៌មានល្ងាចថ្ងៃទី៣ ខែធ្នូ បានឲ្យដឹងថា សេចក្តីវិសោធនកម្មច្បាប់ស្តីពីគណបក្សនយោបាយមាត្រា៤៥ថ្មី (ស្ទូយមួយ) ជាវិសោធនកម្មច្បាប់ដែលមានការប្រញាប់ ហើយអចិន្ត្រៃយ៍រដ្ឋសភានឹងបើកកិច្ចប្រជុំ ពិភាក្សាក្នុងពេលឆាប់ៗនេះ ដើម្បីដាក់ចូលសម័យប្រជុំរដ្ឋសភាពេញអង្គអនុម័តផងដែរ ។ អ្នកនាំពាក្យរដ្ឋសភាបានឲ្យដឹងសេចក្តីវិសោធនកម្មច្បាប់នេះក៏មានការជាប់ពាក់ព័ន្ធនឹងការមន្ត្រីអតីតគណបក្សសង្គ្រោះជាតិដែលត្រូវបានតុលាការកំពូលហាមឃាតមិនឲ្យធ្វើនយោបាយផងដែរ ។
លោកបញ្ជាក់ថា «អីចឹងច្បាប់នេះធ្វើវិសោធនកម្មគិតគូរដល់ដែលត្រូវបានតុលាការហាមឃាត់ធ្វើនយោបាយមិនឲ្យធ្វើសកម្មភាពនយោបាយរបស់តុលាការកំពូល ។ យើងគិតគូរយ៉ាងម៉េច គឺថាធ្វើឲ្យច្បាប់ពាក់ព័ន្ធនឹងអាលូវយើងធ្វើហើយ ។ អ្នកដែលច្បាប់ហាមឃាត់គឺ អាចទទួលបាននីតិសម្បទា អាចទទួលបានសិទ្ធិធ្វើនយោបាយវិញ បន្ទាប់ពីមានសំណើរពីនាយករដ្ឋមន្ត្រីស្នើព្រះមហាក្សត្រតាមដំណើររបស់រដ្ឋមន្ត្រីក្រសួងមហាផ្ទៃ» ។ លោកបន្ថែមថា វិសោធនកម្មច្បាប់នេះក៏ដោយសារតែពេលកន្លងមកច្បាប់មិនបានគិតគូរដល់អ្នកដែលត្រូវតុលាការហាមឃាត់នោះទេ ប៉ុន្តែពេលនេះការធ្វើវិសោធនកម្មច្បាប់នេះ គឺបានគិតគូដល់អ្នកត្រូវតុលាការកំពូលហាមឃាត់ផងដែរ ។
សូមជម្រាបថា នៅថ្ងៃទី១០ ខែកក្កដា ឆ្នាំ២០១៧ រដ្ឋសភាបានអនុម័តទាំងស្រុងលើសេចក្តីស្នើច្បាប់ស្តីពីវិសោធនកម្មច្បាប់គណបក្សនយោបាយដោយសំឡេង៦៦ លើ៦៦រូប ដែលជាសំឡេងភាគច្រើនដាច់ខាតទោះបីជាអវត្តមានតំណាងរាស្ត្រគណបក្សប្រឆាំងក៏ដោយ ។ ចំនួន៥មាត្រាក្នុងនោះមាត្រា៦ថ្មី (ពីរ) មាត្រា១១(ថ្មី) មាត្រា៤៤ថ្មី(ពីរ) មាត្រា៤៥ថ្មី(ស្ទួន) និងមាត្រា ៤៨ថ្មី (សួន) ។ មាត្រា៦ថ្មី (ពីរ) ដែលកែប្រែឡើងវិញនេះបានកំណត់ថា គណបក្សនយោបាយមិនត្រូវប្រើប្រាស់សារជាសំឡេងរូបភាពឯកសារជាលាយលក្ខណ៍អក្សរ ឬសកម្មភាពរបស់ទណ្ឌិតជាប់ទោសបទឧក្រិដ្ឋ ឬពីបទមជ្ឈិម ដើម្បីជាផលប្រយោជន៍នយោបាយខ្លួនឡើយ ហើយគណបក្សនយោបាយទាំងអស់មិនត្រូវយល់ព្រមដោយចំហរ ឬឃុបឃិតជាមួយទណ្ឌិតជាប់ទោសបទឧក្រិដ្ឋ ឬពីបទមជ្ឈិមឱ្យធ្វើសកម្មភាពណាមួយ ដើម្បីជាប្រយោជន៍ផងដែរ ៕
ចែករំលែកព័តមាននេះ