រាជធានីភ្នំពេញ ៖ ទំហំពាណិជ្ជកម្មទ្វេភាគីរវាងកម្ពុជា-ថៃបានកើនឡើងរហូតដល់ជាង៧ប៊ីលានដុល្លារ នៅត្រឹមដំណាច់ខែតុលា ឆ្នាំ២០១៨ ដែលជាសញ្ញាណវិជ្ជមានសម្រាប់កិច្ចសហបត្តិការប្រទេសទាំងពីរ ខណៈដែលប្រមុខរាជរដ្ឋាភិបាល គ្រោងបង្កើនទំហំពាណិជ្ជកម្ម ឱ្យបានដល់១៥ប៊ីលានដុល្លារអាមេរិក នៅឆ្នាំ២០២…
រាជធានីភ្នំពេញ ៖ ទំហំពាណិជ្ជកម្មទ្វេភាគីរវាងកម្ពុជា-ថៃបានកើនឡើងរហូតដល់ជាង៧ប៊ីលានដុល្លារ នៅត្រឹមដំណាច់ខែតុលា ឆ្នាំ២០១៨ ដែលជាសញ្ញាណវិជ្ជមានសម្រាប់កិច្ចសហបត្តិការប្រទេសទាំងពីរ ខណៈដែលប្រមុខរាជរដ្ឋាភិបាល គ្រោងបង្កើនទំហំពាណិជ្ជកម្ម ឱ្យបានដល់១៥ប៊ីលានដុល្លារអាមេរិក នៅឆ្នាំ២០២ ។
នៅក្នុងជំនួបពិភាក្សាទ្វេភាគីជាមួយលោក ផាន់យ៉ារ៉ាក់ ប៉ុលធូប ឯកអគ្គរាជទូតថៃប្រចាំនៅកម្ពុជា នាឱកាសចូលរួមពិធីបុណ្យជាតិថៃ ដែលរៀបចំឡើងនៅស្ថានទូតថៃប្រចាំនៅកម្ពុជា កាលពីថ្ងៃទី៣០ ខែវិច្ឆិកា កន្លងមក លោករដ្ឋមន្ត្រី ប៉ាន សូរស័ក្តិ បានបង្ហាញសុទិដ្ឋិនិយមថា ទំហំពាណិជ្ជកម្មកម្ពុជា-ថៃ នឹងបន្តកើនឡើងថែមទៀត ហើយឈានទៅសម្រេចតាមផែនការដែលបានកំណត់ ដោយសារប្រទេសទាំងពីរ មានទំនាក់ទំនង និងកិច្ចសហប្រតិបត្តិការល្អលើគ្រប់វិស័យ ។
លោករដ្ឋមន្ត្រី ក៏បានអះអាងថា ៖« កម្ពុជានឹងបន្តធ្វើការយ៉ាងជិតស្និទ្ធជាមួយប្រទេសថៃ ជាពិសេសក្នុងពេលដែលប្រទេសថៃធ្វើជាប្រធានអាស៊ាន នៅក្នុងឆ្នាំ២០១៩ ខាងមុខ សំដៅធ្វើ ឱ្យការចរចាកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ RCEP អាចបញ្ចប់ដោយជោគជ័យនៅក្នុងឆ្នាំក្រោយ ដើម្បីធានាការធ្វើពិពិធកម្មវិស័យនាំចេញរបស់កម្ពុជា »។ បន្ថែមលើនោះ ក្នុងនាមរាជរដ្ឋាភិបាលកម្ពុជា លោករដ្ឋមន្ត្រី ក៏បានសម្តែងនូវការអបអរសាទរ និងបានជូនពរដល់រាជរដ្ឋាភិបាល និងប្រជាជននៃព្រះរាជាណាចក្រថៃ ដែលកំពុងប្រារព្ធបុណ្យជាតិទូទាំងប្រទេស ដើម្បីរំលឹកដល់ថ្ងៃកំណើតរបស់អតីតព្រះមហាក្សត្រថៃ Bhumibol Adulyadej ដែលមានគុណូបការៈយ៉ាងលើសលប់ និងទទួលបានការគោរពស្រឡាញ់ពីសំណាក់ប្រជាជនថៃគ្រប់ស្រទាប់វណ្ណៈ ។
ជាការឆ្លើយតប លោកផាន់យ៉ារ៉ាក់ ប៉ុលធូប បានថ្លែងអំណរគុណដល់រាជរដ្ឋាភិបាលកម្ពុជា ដែលតែងតែគាំទ្រ និងជួយជំរុញទំនាក់ទំនងពាណិជ្ជកម្មទ្វេភាគីរវាងកម្ពុជា និងថៃ ឱ្យកាន់តែរីកចម្រើនឥតឈប់ឈរ ។
លោកឯកអគ្គរាជទូត ក៏បានសន្យាបន្តពង្រីកការតភ្ជាប់ព្រំដែនរវាងកម្ពុជា និងថៃ និងពង្រឹងកិច្ចសហប្រតិបត្តិការលើវិស័យអប់រំ តាមរយៈការផ្តល់អាហារូបករណ៍ដល់និស្សិតកម្ពុជា ក៏ដូចជាការបង្កើត និងអភិវឌ្ឍន៍វិទ្យាស្ថានបច្ចេកវិទ្យាកំពង់ឈើទាល និងវិទ្យាស្ថានបច្ចេកវិទ្យាកំពង់ស្ពឺ ដោយប្រើប្រាស់មូលនិធិរបស់ម្ចាស់ក្សត្រី មហាចក្រី ស៊ូរិនដន ៕
ចែករំលែកព័តមាននេះ