សហរដ្ឋអាមេរិក-រុស្ស៊ី ៖ មួយម៉ោងក្រោយការវាយតម្លៃថា ការជួបគ្នារបស់លោកជាមួយនឹងប្រធានាធិបតីរុស្ស៊ីជាឱកាសសំខាន់បំផុតមួយ ប្រធានាធិបតីអាមេរិកលោកដូណាល់ត្រាំ ទីបំផុតបានលុបចោលជំនួបនេះវិញ ខណៈមានភាពតានតឹងខ្លាំងរវាងរុស្ស៊ីនិងអ៊ុយក្រែន។ លោកត្រាំកាលពីថ្ងៃទី២៩វិច្ឆិកា ប្រកាសលុបចោល ការជួបគ្នារបស់លោកជាមួយប្រធានាធិបតីរុស្ស៊ីលោកវ្ល៉ាឌីមៀរពូទីន…
សហរដ្ឋអាមេរិក-រុស្ស៊ី ៖ មួយម៉ោងក្រោយការវាយតម្លៃថា ការជួបគ្នារបស់លោកជាមួយនឹងប្រធានាធិបតីរុស្ស៊ីជាឱកាសសំខាន់បំផុតមួយ ប្រធានាធិបតីអាមេរិកលោកដូណាល់ត្រាំ ទីបំផុតបានលុបចោលជំនួបនេះវិញ ខណៈមានភាពតានតឹងខ្លាំងរវាងរុស្ស៊ីនិងអ៊ុយក្រែន។
លោកត្រាំកាលពីថ្ងៃទី២៩វិច្ឆិកា ប្រកាសលុបចោល ការជួបគ្នារបស់លោកជាមួយប្រធានាធិបតីរុស្ស៊ីលោកវ្ល៉ាឌីមៀរពូទីន នៅខាងក្រៅកិច្ចប្រជុំកំពូលG20 ដែលបើកធ្វើនាថ្ងៃទី៣០វិច្ឆិកានៅទីក្រុងប៊ុយណូស៊ែ ប្រទេសអាហ្សង់ទីន។ មួយម៉ោងមុននេះលោកត្រាំវាយតម្លៃថា ការជួបគ្នានោះនឹងប្រព្រឹត្តទៅ នាឱកាសដ៏សំខាន់បំផុតមួយ ពេលមានភាពតានតឹងជាមួយអ៊ុយក្រែន។
តាមTWITTERលោកត្រាំសរសេរថា ដោយសារបណ្ដានាវានិងពួកនាវិក មិនទាន់ត្រូវបានរុស្ស៊ីដោះលែង ឲ្យវិលត្រឡប់ទៅអ៊ុយក្រែនវិញខ្ញុំបានសម្រេចថា យកល្អបណ្ដាភាគីដែលទាក់ទិន លុបចោលជំនួបរបស់ខ្ញុំដែលបានគ្រោងទុក នៅអាហ្សង់ទីនជាមួយប្រធានាធិបតីរុស្ស៊ីលោកវ្ល៉ាឌីមៀរពូទីន។ លោកបានធ្វើការប្រកាសនេះតែប៉ុន្មាននាទីប៉ុណ្ណោះ ក្រោយលោកឡើងឧទ្ធម្ភាគចក្រចេញពីសេតវិមាន ទៅឡើងយន្តហោះ AIR FORCE ONE ទៅកាន់ក្រុងប៊ុយណូស៊ែ។
មុននេះបន្តិចអ្នកនាំពាក្យវិមានក្រឹមឡាំងលោកឌីមីឌ្រីប៉េស្កូវនិយាយថា ក្រុងវ៉ាស៊ិនតោនអះអាងពីការជួបគ្នាទ្វេភាគី នៅខាងក្រៅកិច្ចប្រជុំកំពូលG20 ដោយបញ្ជាក់ថាការជួបគ្នានេះ ត្រូវបានកំណត់យកថ្ងៃទី១ធ្នូហើយអាចមានរយៈពេលជិត១ម៉ោង៕
ចែករំលែកព័តមាននេះ