ខេត្តបន្ទាយមានជ័យ ៖ នៅត្រង់ចំណុចរង្វង់មូលនៃផ្លូវបំបែកជាបួន នៅបន្ទាត់ព្រំដែក្នុងភូមិ និងឃុំអូរបីជាន់ ស្រុកអូរជ្រៅ រវាងផ្លូវជាតិលេខ៥៨ និងផ្លូវជាតិ២៥៨D ត្រូវបានបំពាក់ភ្លើងសញ្ញាចរាចរ ដើម្បីកាត់បន្ថយអត្រាការស្លាប់ និងរបួសដោយគ្រោះថ្នាក់ចរចរ។ នេះជាសមិទ្ធផលថ្មីមួយទៀត ដែលអ្នករស់នៅបន្ទាត់ព្រំដែនក្នុងខេត្តបន្ទាយមានជ័យទទួលបានក្រោយពីផ្លូវជាតិលេខ៥៨ តភ្ជាប់ពីក្រុងប៉ោយប៉ែតឆ្ពោះទៅកាន់ខេត្តឧត្តរមានជ័យ ត្រូវបានរាជរដ្ឋាភិបាលអភិវឌ្ឍន៍រួចរាល់សម្រាប់ ពលរដ្ឋធ្វើដំណើរយ៉ាងងាយស្រួលដែលពីមុនមិនធ្លាប់មាន។
អ្នករស់នៅក្បែរចំណុចរង្វង់មូលឃុំអូរបីជាន់ និយាយថា ពួកគាត់សប្បាយចិត្តព្រោះមិនព្រួយបារម្ភ និងមិនពិបាកភ្នែកខណៈពីមុនពេលមានករណី គ្រោះថ្នាក់ចរាចរម្តងៗមានស្លាប់មានរបួសដោយសារចំណុចផ្លូវបំបែកជាបួនមួយនេះគ្មានភ្លើងស្តុបដូចពេលនេះ។ ពួកគាត់អះអាងថា រយៈពេលនៃការបំពាក់ភ្លើងស្តុបប៉ុន្មានថ្ងៃចុងក្រោយនេះឃើញថា មានអ្នកដំណើរបានគោរពភ្លើងសញ្ញាហើយអ្វីដែលសំខាន់គឺពុំមានករណីគ្រោះថ្នាក់ចរាចរកើតឡើងនោះទេ។
លោកវរសេនីយ៍ឯក សេស វិបុល អធិការនគរបាលស្រុកអូរជ្រៅលើកឡើងថា លោកនឹងបង្កើតប៉ុស្តិ៍ មួយនៅក្បែរចំណុចរង្វង់មូលអូរបីជាន់នេះដើម្បីឲ្យកម្លាំងប៉ុស្តិ៍រដ្ឋបាលអូរបីជាន់ និងប្រជាការពារ សហការគ្នាការពារសន្តិសុខ និងសណ្តាប់ធ្នាប់ជូនពលរដ្ឋ និងអ្នកធ្វើដំណើរទាំងយប់ថ្ងៃ។ ចំពោះភ្លើងស្តុបដែលកំពុងបំពាក់ខាងលើលោកអះអាងថា ក្រុមហ៊ុនចិនដែលអភិវឌ្ឍន៍ផ្លូវជាតិលេខ៥៨គេដាក់ឲ្យ។
ទោះជាយ៉ាងណាលោកបញ្ជាក់ថា ផ្លូវជាតិលេខ៥ក្នុងស្រុកអូរជ្រៅនឹងបំពាក់ភ្លើងសញ្ញាចរាចរ២កន្លែងថែមទៀតនាពេលខាងមុខ ដែលជាគម្រោងផ្តួចផ្តើម និងចំណាយថវិការរបស់លោកឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងារថ្នាក់ជាតិចុះជួយខេត្តបន្ទាយមានជ័យ តាមរយៈលោកអភិបាលខេត្ត និងលោកឧត្តមសេនីយ៍ស្នងការនគរបាលខេត្ត។ ទីតាំងគ្រោងដាក់ភ្លើងសញ្ញាចរាចរទាំង២កន្លែងខាងលើ ទី១-ចំណុចផ្លូវបំបែកជាបួនសាលាក្រហម ក្នុងឃុំកូប និងទីតាំងទី២-នៅចំណុចផ្លូវបំបែកជា៣រវាងផ្លូវជាតិលេខ៥នឹងផ្លូវជាតិលេខ២៥៨D ព្រំប្រទល់ក្រុងប៉ោយប៉ែត និងស្រុកអូរជ្រៅ(ចំណុចខាងលិចផ្សារគុត្តសត)៕
https://youtu.be/JeTliNX0m6o
ចែករំលែកព័តមាននេះ