រាជធានីភ្នំពេញ ៖ ក្នុងជំនួបសម្តែងការគួរសម ពិភាក្សាការងារជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នារសៀលថ្ងៃទី១៤ មិថុនា នៅវិមានសន្តិភាព លោកតាកាហាស៊ី ហ្វូ៊មីអាគី អតីតឯកអគ្គរាជទូតជប៉ុនប្រចាំកម្ពុជា និងជាអគ្គនាយកប្រតិបត្តិក្រុមហ៊ុនGJCបានមានប្រសាសន៍ថា លោកបានចាកចេញពីប្រទេសកម្ពុជាកាលពីឆ្នាំ២០០៧
រាជធានីភ្នំពេញ ៖ ក្នុងជំនួបសម្តែងការគួរសម ពិភាក្សាការងារជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នារសៀលថ្ងៃទី១៤ មិថុនា នៅវិមានសន្តិភាព លោកតាកាហាស៊ី ហ្វូ៊មីអាគី អតីតឯកអគ្គរាជទូតជប៉ុនប្រចាំកម្ពុជា និងជាអគ្គនាយកប្រតិបត្តិក្រុមហ៊ុនGJCបានមានប្រសាសន៍ថា លោកបានចាកចេញពីប្រទេសកម្ពុជាកាលពីឆ្នាំ២០០៧ និងបានទៅបំពេញការងារជាឯកអគ្គរាជទូតជប៉ុនប្រចាំប្រទេសអេស្បា៉ញ ហើយកាលពី២ឆ្នាំកន្លងទៅ លោកបានចូលនិវត្តន៍ពីការងារ ។ ប៉ុន្តែនៅពេលនេះលោកកំពុងបម្រើការងារក្នុងវិស័យឯកជនក្នុងន័យជួយជំរុញអ្នកវិនិយោគទុនជប៉ុនមកកាន់ប្រទេសកម្ពុជាឱ្យកាន់តែច្រើនថែមទៀត ។
លោកអតីតអគ្គរាជទូតជប៉ុនបន្តថា លោកបានជួបជាមួយអ្នកវិនិយោគទុនជាច្រើន ពួកគេសុទ្ធតែបានបញ្ជាក់ពីការចាប់អារម្មណ៍ពីបរិយាកាសវិនិយោគនៅកម្ពុជា ពិសេសបន្ទាប់ពីមានទស្សនកិច្ចរបស់អ្នកវិនិយោគជប៉ុននៅកម្ពុជា និងការលើកទឹកចិត្តដ៏ខ្ពស់បំផុត ពីសំណាក់រាជរដ្ឋាភិបាលកម្ពុជា ។ លោកតាកាហាស៊ី ហ្វូ៊មីអាគី បញ្ជាក់ថា ក្រុមហ៊ុនរបស់លោកដែលមានបទពិសោធន៍ខ្ពស់លើការងារសាងសង់រោងចក្រប្រេង-ឧស្ម័ន កំពុងមានចំណាប់អារម្មណ៍មកបណ្តាក់ទុនវិនិយោគនៅក្នុងប្រទេសកម្ពុជា ។
សម្តេចតេជោ នាយករដ្ឋមន្ត្រី បានស្វាគមន៍ចំពោះវត្តមានលោកតាកាហាស៊ី ហ៊្វូមីអាគី ជាថ្មីម្តងទៀតនៅកម្ពុជា និងបានបញ្ជាក់ថា ឥឡូវនេះស្ថានភាពនៅក្នុងប្រទេសកម្ពុជា មានការខុសប្លែកពីពេលមុន ជាពិសេសអ្នកវិនិយោគបរទេសជាច្រើន បានមកបណ្តាក់ទុននៅក្នុងប្រទេសកម្ពុជា ហើយនៅពេលនោះទៀតសោតទោះបីជាជិតបោះឆ្នោតសាកលពិតមែន ប៉ុន្តែកម្ពុជាមានបរិយាកាសអំណោយផលខ្លាំងណាស់ ដល់ដំណើរការវិនិយោគ ។ តាមរយៈនេះ សម្តេចតេជោ នាយករដ្ឋមន្ត្រីបានស្នើឱ្យលោកអតីតឯកអគ្គរាជទូតជប៉ុន បន្តជួយជំរុញអ្នកវិនិយោគទុនជប៉ុនឱ្យមកបណ្តាក់ទុននៅកម្ពុជាឱ្យបានកាន់តែច្រើនថែមទៀត ។
ដោយឡែកនាល្ងាចថ្ងៃទី១៤ មិថុនា នោះដែរ នៅវិមានសន្តិភាពសម្តេចអគ្គមហាសេនាបតីតេជោ ហ៊ុន សែន បានទទួលជួបលោកជំទាវ អាលីសាន ប៊ូសរ៉ូស ដែលទើបត្រូវបានតែងតាំងជាឯកអគ្គរាជទូតថ្មីប្រទេសអូស្ត្រាលីប្រចាំនៅកម្ពុជា ។ លោកជំទាវឯកអគ្គរាជទូតថ្មី អូស្ត្រាលី ប្រចាំកម្ពុជា បានជម្រាបសម្តេចតេជោនាយករដ្ឋមន្ត្រីថា ក្នុងអាណត្តិបេសកកម្មការទូតរបស់លោកជំទាវនៅប្រទេសកម្ពុជា លោកជំទាវនឹងខិតខំជំរុញពាណិជ្ជកម្មរវាងប្រទេសទាំងពីរឱ្យកាន់តែមានការរីកចម្រើនទ្វេឡើងថែមទៀត ទាំងក្នុងក្របខណ្ឌទ្វេភាគីក៏ដូចជាអាស៊ាននិងASEM ។
លោកជំទាវបន្តថា លោកជំទាវនឹងធ្វើការយ៉ាងជិតស្និទ្ធជាមួយរាជរដ្ឋាភិបាលកម្ពុជា ពិសេសជាមួយសាលាក្តីកាត់ទោសអតីតមេដឹកនាំខ្មែរក្រហម និងស្ថាប័នពាក់ព័ន្ធដទៃទៀត សំដៅធ្វើយ៉ាងណាឱ្យទំនាក់ទំនងរវាងប្រទេសទាំងពីរកាន់តែជិតស្និទ្ធ និងរីកចម្រើនឡើងថែមទៀត ។ លោកជំទាវឯកអគ្គរាជទូតថ្មី ជម្រាបសម្តេចតេជោថា លោកជំទាវ នាយករដ្ឋមន្ត្រីអូស្ត្រាលី មានមហាកិត្តិយសខ្លាំងណាស់ ក្នុងការអញ្ជើញមកចូលរួមកិច្ចប្រជុំកំពូលអាស៊ីបូពា៌ក្នុងប្រទេសកម្ពុជា កាលពីពេលកន្លងទៅថ្មីៗនេះ ។
ជាការឆ្លើយតប សម្តេចតេជោ នាយករដ្ឋ មន្ត្រី បានស្វាគមន៍បេសកកម្មការទូតរបស់លោកជំទាវអាលីសាន ប៊ូសរ៉ូស និងបានថ្លែងអំណរគុណប្រទេសអូស្រា្តលី ដែលបានជួួយដល់ប្រទេសកម្ពុជា ទាំងក្នុងការស្វែងរកសន្តិភាព និងការផ្តល់ជំនួយដល់ការអភិវឌ្ឍប្រទេសកម្ពុជាឡើងវិញ ដែលធ្វើឱ្យកំណើនសេដ្ឋកិច្ចរបស់ប្រទេសកម្ពុជា មានការកើនឡើងយ៉ាងខ្លាំង ពិសេសបានរួមចំណែកដល់ការកាត់បន្ថយភាពក្រីក្រនៅកម្ពុជា។ សម្តេចតេជោ មានប្រសាសន៍ថា ប្រទេសអូស្ត្រាលី គឺជាអ្នកផ្តល់ជំនួយដ៏ធំបំផុតនៅក្នុងការចូលរួមចំណែកដល់ការបោសសម្អាតគ្រាប់មីននិងយុទ្ធភណ្ឌមិនទាន់ផ្ទុះនៅកម្ពុជា និងរួមចំណែកដល់វិស័យកសិកម្មតាមរយៈការជួយដល់វិទ្យាស្ថានស្រាវជ្រាវកសិកម្មនៅកម្ពុជា ។
ពាក់ព័ន្ធនឹងទំហំពាណិជ្ជកម្មនៃប្រទេសទាំងពីរសម្តេចបានលើកឡើងថា ជាការពិតទំហំពាណិជ្ជកម្មនៃប្រទេសទាំងពីរមានការកើនឡើងខ្លាំងណាស់ ប៉ុន្តែយើងនៅមានសក្តានុពលជាច្រើនក្នុងការពង្រីកពាណិជ្ជកម្មរវាងប្រទេសទាំងពីរឱ្យបានកាន់តែកើនខ្ពស់ឡើងថែមទៀត ៕
ចែករំលែកព័តមាននេះ