រាជធានីភ្នំពេញ ៖ បុរសជនជាតិឥណ្ឌាម្នាក់កំពុងធ្វើដំណើរតាមម៉ូតូកង់បីទៅឡើងយន្តហោះ ក៏ត្រូវបានចោរមហាដៃស្អិតឆក់យកកាបូបដៃយួរទៅបាត់ដោយសុវត្ថិភាព អស់លុយ១ពាន់ដុល្លារ លិខិតឆ្លងដែន ឡែបថប់ កាលពីម៉ោង៦និង៣០នាទីយប់ ថ្ងៃទី១៧ ខែវិច្ឆិកា…
រាជធានីភ្នំពេញ ៖ បុរសជនជាតិឥណ្ឌាម្នាក់កំពុងធ្វើដំណើរតាមម៉ូតូកង់បីទៅឡើងយន្តហោះ ក៏ត្រូវបានចោរមហាដៃស្អិតឆក់យកកាបូបដៃយួរទៅបាត់ដោយសុវត្ថិភាព អស់លុយ១ពាន់ដុល្លារ លិខិតឆ្លងដែន ឡែបថប់ កាលពីម៉ោង៦និង៣០នាទីយប់ ថ្ងៃទី១៧ ខែវិច្ឆិកា ឆ្នាំ២០១៨ ស្ថិតនៅគល់ស្ពានអាកាស៧មករា ខាងកើត សង្កាត់ទឹកល្អក់១ ខណ្ឌទួលគោក ។
ជនរងគ្រោះមានឈ្មោះ CHAKKAR PAHI ភេទប្រុស អាយុ៤៩ឆ្នាំ ជនជាតិឥណ្ឌា កាន់លិខិតឆ្លងដែនលេខ R8748835 ស្នាក់នៅផ្ទះសំណាក់ លីហ័រ ផ្លូវត្រសក់ផ្អែម សង្កាត់ផ្សារថ្មី ខណ្ឌដូនពេញ ចំណែកសម្ភារៈបាត់បង់ ត្រូវបានជនរងគ្រោះអះអាងថា លុយ១ពាន់ដុល្លារ លិខិតឆ្លងដែន និងឡេបថប់មួយគ្រឿង ។
តាមសម្តីជនរងគ្រោះ និយាយភាសារខ្មែរបានមួយមាត់ៗឲ្យដឹងថា គាត់ត្រូវធ្វើដំណើរឡើងយន្តហោះទៅប្រទេសថៃ នៅជើងហោះហើរម៉ោង៨និង៥៥នាទីយប់ ថ្ងៃទី១៧ វិច្ឆិកា ហើយខណៈដែលធ្វើដំណើរចេញពីផ្ទះសំណាក់ ជិះរ៉ឺម៉កម៉ូតូកង់បីតាមផ្លូវកម្ពុជាក្រោម លុះមកដល់ខាងកើតស្ពានអាកាស៧មករា ស្រាប់ជនសង្ស័យ២នាក់ជិះម៉ូតូមួយគ្រឿងមិនស្គាល់ម៉ាក ឆក់យកកាបូបដៃយួរ ដែលដាក់នៅក្បែរខ្លួនទៅបាត់ដោយសុវត្ថិភាព។
ក្រោយកើតហេតុ ទាំងអ្នកបើកម៉ូតូកង់បី ជាជនជាតិខ្មែរ ទាំងជនរងគ្រោះ ជនជាតិឥណ្ឌា រកប៉ុស្តិ៍ប៉ូលិសមិនឃើញ ក៏បន្តដំណើរទៅមុខរហូត មកដល់ប៉ុស្តិ៍កាកាប១ ខណ្ឌពោធិ៍សែនជ័យ គ្រាន់តែក្រឡេកឃើញដឹងថា ប៉ុស្តិ៍ប៉ូលិសក៏ចូលទៅប្តឹង បំណងឲ្យជួយអន្តរាគមន៍ដល់សមត្ថកិច្ចសាកសួរទៅទើបដឹងថា កើតហេតុនៅសង្កាត់ទឹកល្អក់១ ខណ្ឌទួលគោក ឯនោះវិញទេ តែទោះជាយ៉ាងណាក្តី ដើម្បីជួយសម្រួលការងារត្រូវបន្ទាន់របស់ជនរងគ្រោះជាជនបរទេស ដែលចោរឆក់កាបូបទៅបាត់ នគរបាលខណ្ឌពោធិ៍សែនជ័យ បង្ហាញប្រាប់ឲ្យទៅប្តឹងនៅនាយកដ្ឋានអន្តោប្រវេសន៍តែម្តង ៕
ចែករំលែកព័តមាននេះ