កំពូលតារាចម្រៀងសិចស៊ីអាមេរិក Beyonce, Madonna រួមជាមួយក្រុមសកម្មជនសប្បុរសធម៌ដូចជា Gloria Steinem និងក្រុមតារាស្រី ទូទូ (Tu Tu) គ្រោងនឹងបង្ហាញវត្តមានក្នុងព្រឹត្តិការណ៍ប្រគំតន្ត្រីប៉ុបសប្បុរសធម៌ដ៏ធំបំផុតមួយនៅទីក្រុងឡុង ប្រទេសអង់គ្លេស ដែលមានអ្នកចូលរួមគាំទ្ររហូតដល់មួយពាន់លាននាក់ ដើម្បីបញ្ជូនសារលើកទឹកចិត្តទៅកាន់ស្ត្រីនៅទូទាំងភពផែនដីឱ្យកាន់តែមានភាពក្លាហានឡើង ហើយការប្រគំតន្ត្រីសប្បុរសធម៌របស់ស្តេចចម្រៀងប៉ុបទាំង២នេះ គឺផ្តោតជួយស្ត្រី និងកុមារ ។
ប្រធានបទសំខាន់របស់ Beyonce និង Madonna គឺ «សំឡេងនៃការផ្លាស់ប្តូរជីវិត» ហើយជាមួយនេះតារា Florence, Jennifer ក៏ចូលរួមសម្តែងនូវឈុតឆាកបទចម្រៀងមួយចំនួនផងដែរ ដោយផ្សាយផ្ទាល់ពីទីលាន Twickenham ទៅកាន់១៥០ប្រទេសលើពិភពលោក ដែលនឹងនាំឱ្យរញ្ជួយជាងពេលមុនៗទាំងអស់ ហើយបន្ទាប់មកនឹងផ្សាយឡើងវិញតាមកញ្ចក់ទូរទស្សន៍នៅសហរដ្ឋអាមេរិក។ គេរំពឹងថា ប្រសិនបើសំបុត្រអាចលក់បានទាំងអស់ក្នុង៤កម្មវិធីប្រគំតន្ត្រីលើកនេះ យ៉ាងហោចណាស់ក៏អាចរកមូលនិធិជួយទ្រទ្រង់គម្រោងគាំពារស្ត្រី និងកុមារបាន១២០គម្រោងគ្របដណ្តប់លើ៧០ប្រទេសផងដែរ ។
ចំពោះតម្លៃសំបុត្រចូលទស្សនា ទស្សនិកជនអាចជ្រើសរើសតម្លៃប្រភេទណាមួយក៏បានតាមដែលពួកគេពេញចិត្ត ស្របតាមគម្រោងនីមួយៗ ហើយប្រាក់ទាំងអស់ដែលបានពីការលក់សំបុត្រនេះនឹងក្លាយជាមូលនិធិសប្បុរសធម៌លើស្ត្រី និងកុមារក្នុងពិភពលោក។ កំពូលតារាលេងសុដន់ និងត្រគាក Madonna បានប្តេជ្ញាថា បន្ទាប់ពីកម្មវិធីដ៏កក្រើកនេះទៅ នាងនឹងនៅតែចូលរួមកម្មវិធីដទៃៗទៀតជាសាធារណៈរួមជាមួយសកម្មជនសប្បុរសធម៌ អ្នកថតកុនល្បីៗ អ្នកដឹកនាំរឿង និងតារាល្បីៗរបស់ឥណ្ឌាដូចជា Aishwarya Rai និង Abhishek Bachchan ដើម្បីគាំទ្រដល់បេសកកម្មសប្បុរសធម៌នេះ ។
Modonna បញ្ជាក់ទៀតថា «កុមារីជាង៦០% នៅលើពិភពលោកមិនបានចូលរៀនទេ ហើយកុមារ២ភាគ៣លើពិភពលោកក៏មិនចេះអក្សរដែរ ពួកគេគឺជាស្ត្រីទៅទៀត ដូច្នេះខ្ញុំមិនអាចទទួលយកបានឡើយ ។ ពួកយើងត្រូវតែចូលរួមផ្លាស់ប្តូរស្ថានភាពបែបនោះចេញ យើងជឿជាក់ថា ពិតជាអាចផ្លាស់ប្តូរបាន» ៕
ចែករំលែកព័តមាននេះ