ខេត្តបន្ទាយមានជ័យ ៖ ជនសង្ស័យក្នុងករណីរំលោភប្អូនថ្លៃខ្លួនឯងរហូតបានសម្រេចកាលពីយប់ថ្ងៃទី១២ វិច្ឆិកា ហើយរត់គេចខ្លួននោះ ពេលនេះត្រូវកម្លាំងនគរបាលនៃអធិការដ្ឋាននគរបាលស្រុកថ្មពួក ដឹកនាំដោយលោកវរសេនីយ៍ទោ សៅ សារឿន អធិការនគរបាលស្រុកស្រាវជ្រាវចាប់បានហើយ…
ខេត្តបន្ទាយមានជ័យ ៖ ជនសង្ស័យក្នុងករណីរំលោភប្អូនថ្លៃខ្លួនឯងរហូតបានសម្រេចកាលពីយប់ថ្ងៃទី១២ វិច្ឆិកា ហើយរត់គេចខ្លួននោះ ពេលនេះត្រូវកម្លាំងនគរបាលនៃអធិការដ្ឋាននគរបាលស្រុកថ្មពួក ដឹកនាំដោយលោកវរសេនីយ៍ទោ សៅ សារឿន អធិការនគរបាលស្រុកស្រាវជ្រាវចាប់បានហើយ នារសៀលថ្ងៃទី១៥ ខែវិច្ឆិកា ឆ្នាំ២០១៨ នេះ នៅចំណុចវត្តតេជោភ្នំឆ័ត្រ ស្ថិតក្នុងស្រុកស្វាយចេក។
ជនសង្ស័យខាងលើឈ្មោះ កែវ វណ្ណឌី ភេទប្រុស អាយុ២៦ឆ្នាំ មុខរបរកម្មករ មានទីលំនៅភូមិថ្មរមៀលកើត ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ ចំណែកជនរងគ្រោះអាយុ១៧ឆ្នាំ ត្រូវជាប្អូនថ្លៃជនសង្ស័យ។
បើតាមលោក សៅ សារឿន អធិការនគរបាលស្រុក ប្រាប់ថា មុនឃាត់ខ្លួនជនសង្ស័យខាងលើនេះ សមត្ថកិច្ចជំនាញរបស់លោកបានទទួលពាក្យបណ្តឹងពីគ្រួសារមួយ ដោយចោទជនសង្ស័យថា រំលោភកូនស្រីគាត់អាយុ១៧ឆ្នាំ (ប្អូនថ្លៃជនសង្ស័យ) ខណៈពឹងឲ្យជូនទៅផ្ទះកាលពីម៉ោង៨និង៣០នាទីយប់ ថ្ងៃទី12 វិច្ឆិកា។ ពេលនោះជនសង្ស័យបើកបរម៉ូតូដឹកប្អូនថ្លៃទៅផ្ទះ ប៉ុន្តែឆ្លៀតឱកាសពេលដល់កន្លែងស្ងាត់ចំណុចដីក្រុមហ៊ុនជាតិអភិវឌ្ឍន៍ចម្ងាយពីផ្លូវជាតិលេខ៥៨ ប្រហែល៥០០ម៉ែត្រ ក៏ចាប់បង្ខំជនរងគ្រោះជាប្អូនថ្លៃរំលោភ។
ប្រភពបន្តទៀតថា លុះនាងមិនព្រម ជនសង្ស័យក៏ប្រើកណ្តាប់ដៃតប់ពោះជនរងគ្រោះ២ដៃ បណ្តាលឲ្យចុកសន្លប់ ទើបចាប់រំលោភរហូតសម្រេច។ ក្រោយពេលរំលោភរួច ជនរងគ្រោះដឹងខ្លួនវិញ ក៏ព្យាយាមអង្វរបងថ្លៃឲ្យជូនទៅផ្ទះ លុះកំពុងជិះម៉ូតូដល់ពាក់កណ្តាលផ្លូវនាងឃើញអ្នកឆ្លុះសត្វ ក៏លោតចុះស្រែកឲ្យជួយ។
ប្រភពបន្តថា ក្នុងហេតុការណ៍នោះ អ្នកឆ្លុះសត្វរត់ទៅជួយជនរងគ្រោះ និងវាយជនដៃដល់ត្រូវ២ខ្សែក្រវ៉ាត់ទៀតផង។ ចំណែកជនសង្ស័យក្រោយពីត្រូវអ្នកឆ្លុះសត្វវាយត្រូវ ក៏បើកម៉ូតូគេចខ្លួនបាត់តាំងពីយប់កើតហេតុនោះតែម្តង។
លោកអធិការបញ្ជាក់ថា បន្ទាប់ពីមានការស្រាវជ្រាវយ៉ាងយកចិត្តទុកដាក់តាមបទបញ្ជារបស់លោកឧត្តមសេនីយ៍ទោ អាត់ ខែម ស្នងការនគរបាលខេត្ត ក៏ឈានដល់ការឃាត់ខ្លួនជនសង្ស័យបាននៅម៉ោង៣និង៣០នាទីរសៀល ថ្ងៃទី១៥ វិច្ឆិកា ស្ថិតនៅក្នុងស្រុកស្វាយចេក ខណៈជនសង្ស័យគេចខ្លួនទៅសម្ងំនៅទីនោះ។ លោកអធិការបន្តថា ក្រោយឃាត់ខ្លួន និងសាកសួរសមត្ថកិច្ចក៏បញ្ជូនជនសង្ស័យទៅស្នងការដ្ឋាននគរបាលខេត្ត ដើម្បីចាត់ការបន្តតាមនីតិវិធីច្បាប់៕
ចែករំលែកព័តមាននេះ