ខេត្តកំពង់ឆ្នាំង ៖ ឈើប្រភេទរាជកុលចំនួន២ដើមមានមុខកាត់ចាប់ពី៧ទៅ៨តឹក និងមានប្រវែងរហូតទៅដល់ជាង១០ម៉ែត្រដាក់បង្កប់ក្រោមបាវអង្កាមដឹកតាមរថយន្តត្រូវបានកងរាជអាវុធហត្ថស្នាក់ការ៥០០ ខេត្តកំពង់ឆ្នាំងធ្វើការចាប់ឃាត់ នៅតាមបណ្ដោយផ្លូវជាតិលេខ៥ ចំណុចភូមិចំការស្វាយ ឃុំសេដ្ឋី ស្រុកសាមគ្គីមានជ័យ កាលពីវេលាម៉ោង៤និង៣០នាទីល្ងាចថ្ងៃទី១១…
ខេត្តកំពង់ឆ្នាំង ៖ ឈើប្រភេទរាជកុលចំនួន២ដើមមានមុខកាត់ចាប់ពី៧ទៅ៨តឹក និងមានប្រវែងរហូតទៅដល់ជាង១០ម៉ែត្រដាក់បង្កប់ក្រោមបាវអង្កាមដឹកតាមរថយន្តត្រូវបានកងរាជអាវុធហត្ថស្នាក់ការ៥០០ ខេត្តកំពង់ឆ្នាំងធ្វើការចាប់ឃាត់ នៅតាមបណ្ដោយផ្លូវជាតិលេខ៥ ចំណុចភូមិចំការស្វាយ ឃុំសេដ្ឋី ស្រុកសាមគ្គីមានជ័យ កាលពីវេលាម៉ោង៤និង៣០នាទីល្ងាចថ្ងៃទី១១ ខែវិច្ឆិកា ឆ្នាំ២០១៨ ។
ក្រោយការចាប់ឃាត់រថយន្តខាងលើក៏បានបញ្ជូនមកស្នាក់ការផ្នែករដ្ឋបាលព្រៃឈើកំពង់ត្រឡាច ដើម្បីចាត់ការបន្តតាមនីតិវិធីច្បាប់ ។
លោក កុល វិចិត្រ នាយផ្នែករដ្ឋបាលព្រៃឈើកំពង់ត្រឡាចបាននិយាយឲ្យដឹងថា ឈើពីរដើម ដែលមានមុខកាត់ធំៗប្រវែងជាង១០ម៉ែត្រ បង្កប់ក្រោមបាវអង្កាមដឹកតាមរថយន្តខាងលើ គឺជាប្រភេទឈើរាជកុល ។ តាមការប្រមាណអាយុកាលរបស់វា គឺចាប់ពីជាង១០០ឆ្នាំឡើង ។ ឈើខាងលើត្រូវបានឈ្មួញដឹកតាមរថយន្តម៉ាកហ្វុយហ្យូ ពាក់ស្លាកលេខ តាកែវ 3A- 2154 ចេញពីស្រុកវាលវែងនៃទឹកដីខេត្តពោធិ៍សាត់ឆ្លងកាត់ទឹកដីខេត្តកំពង់ឆ្នាំងសំដៅទៅរាជធានីភ្នំពេញ តែត្រូវបានស្នាក់ការកងរាជអាវុធហត្ថចាប់បាន រួចប្រគល់ឲ្យមន្ត្រីជំនាញ ប៉ុន្តែអ្នកបើកបរត្រូវបានមន្ត្រីកងរាជអាវុធហត្ថប្រាប់ថា រត់បាត់ ។ លោកបានបញ្ជាក់ថា ឈើខាងលើមានមុខកាត់ចាប់ពី៧ទៅ៨តឹកមានប្រវែងជាង១០ម៉ែត្រ ដែលតាមការប្រមាណឈើទាំងពីរដើមនេះសរុបមានចំនួនជាង១០ ម៉ែត្រគូប ។ ពេលនេះកំពុងរក្សាទុកនៅផ្នែករដ្ឋបាលព្រៃឈើ ដើម្បីរង់ចាំឲ្យម្ចាស់ចូលខ្លួនមកដោះស្រាយតាមនីតិវិធីច្បាប់នៃព្រៃឈើ ។
គួរបញ្ជាក់ដែរថា ជំនួញឈើប្រណីត និងឈើមានមុខកាត់ធំៗនៅតែបន្តដឹកតាមផ្លូវជាតិលេខ ៥ជារៀងរាល់ថ្ងៃ ក្រោមរូបភាពគ្រប់បែបយ៉ាង ។ ប៉ុន្តែយូរៗម្តងទើបគេឃើញសមត្ថកិច្ចចាប់ឃាត់បានដែលករណីបែបនេះត្រូវបានរកស៊ីឈើទាំងនោះប្រាប់ថា ការដែលចាប់ឃាត់ចាប់បាននេះ គឺមកពីម្ចាស់មិនព្រមឲ្យបង់លុយឲ្យសមត្ថកិច្ចនៅតាមដងផ្លូវទើបសមត្ថកិច្ចចាប់ ។ ប៉ុន្តែរថយន្តជាច្រើនគ្រឿងផ្សេងទៀតដែលមានផ្ទុកឈើខុសច្បាប់នៅតែអាចបន្តដំណើរទៅបានរលូន ព្រោះបានបង់លុយតាមសមត្ថកិច្ចតាមដងផ្លូវគ្រប់ទីកន្លែងអស់ហើយ ៕
ចែករំលែកព័តមាននេះ