ខេត្តព្រៃវែង ៖ នាព្រឹកថ្ងៃទី១២ វិច្ឆិកា ឆ្នាំ២០១៨នេះ គឺជាពេលវេលាដ៏វិសេសវិសាលបំផុត សំរាប់ប្រជាពលរដ្ឋខេត្តព្រៃវែង ក៏ដូចជាប្រជាជាតិកម្ពុជា ដែលមានមន្ត្រីអង្គការកំណត់ត្រាពិភពលោក (…
ខេត្តព្រៃវែង ៖ នាព្រឹកថ្ងៃទី១២ វិច្ឆិកា ឆ្នាំ២០១៨នេះ គឺជាពេលវេលាដ៏វិសេសវិសាលបំផុត សំរាប់ប្រជាពលរដ្ឋខេត្តព្រៃវែង ក៏ដូចជាប្រជាជាតិកម្ពុជា ដែលមានមន្ត្រីអង្គការកំណត់ត្រាពិភពលោក ( World Guinness Record ) បានចុះមកវាយតម្លៃលើទូកងឈ្មោះ «កម្ពោជិកបុត្តាខេមរាតរី» ដែលសហភាពសហពន្ធ័យុវជនកម្ពុជា សហការជាមួយអាជ្ញាធរខេត្តព្រៃវែង បានបង្កើតឡើងក្នុងគោលបំណងដើម្បីបំបែកឯតទគ្គកម្មពិភពលោក ។
អាជ្ញាធរខេត្តព្រៃវែងបានបញ្ជាក់អោយដឹងថា ក្រោយពីមន្ត្រីជំនាញតំណាងស្ថាប័ន ( World Guinness Record ) ធ្វើការត្រួតពិនិត្យនិងវាយតម្លៃរួចមក លោកបានសម្រេចទទួលស្គាល់ទូកង កម្ពោជិកបុត្តាខេមរាតរី បានបំបែកឯតទគ្គកម្មពិភពលោកថ្មី ដោយជោគជ័យ ដោយជាប់ជាទូកងដែលវែងជាងគេបំផុតក្នុងលោក មានប្រវែង៨៧,៤៧ម៉ែត្រ ឈ្នះទូកនាគរបស់ប្រទេសចិន ម្ចាស់ជ័យលាភីមុន ដែលមានប្រវែង៧៧,៨០ម៉ែត្រ។
ថ្លែងក្នុងពិធីបំបែកឯតទគ្គកម្មពិភពលោកនេះ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានថ្លែងនូវការកោតសរសើរដល់យុវជនខ្មែរ គ្រប់ស្រទាប់វណ្ណៈទាំងអស់ ដែលបានចូលរួមផ្ដួចផ្ដើមគំនិត និងកសាងទូក «ង» វែងជាងគេលើនៅពិភពលោក រហូតឈានដល់ការបំបែកបាននូវឯតទគ្គកម្ម World Guinness Record។
សម្ដេចក្រឡាហោម ស ខេង ក៏បានចាត់ទុកថា ការធ្វើទូក «ង» ដែលវែងជាងគេ រហូតបំបែកឯតទគ្គកម្មបាននោះ មិនមែនជារឿងសាមញ្ញនោះទេ ព្រោះបើគ្មានការផ្ដួចផ្ដើមគំនិត គ្មានឆន្ទៈ គ្មានការរួបរួមគ្នា គ្មានការតស៊ូ អត់ទ្រាំចំពោះការលំបាក ហើយគ្មានបុព្វហេតុច្បាស់លាស់ទេនោះ គឺមិនអាចធ្វើទូកនេះបានទេ។
ហើយបើតាមការគ្រោងទុក ទូក «ង» ដែលវែងជាងគេនេះ នឹងត្រូវយកទៅដាក់បង្ហាញ នៅក្នុងព្រះរាជពិធីបុណ្យអុំទូក នៅមុខព្រះបរមរាជវាំង ដើម្បីអោយជនរួមជាតិខ្មែរទាំងអស់ ដែលមកកម្សាន្ដបានទស្សនាដោយផ្ទាល់ ក៏ដូចជាឲ្យភ្ញៀវទេសចរអន្ដរជាតិ បានឃើញថែមទៀតផង ដែលនេះជាបញ្ហាមួយទាក់ទាញភ្ញៀវទេសចរផងដែរឲ្យយល់កាន់តែច្បាស់អំពីប្រវត្តិសាស្ដ្រខ្មែរ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ