ខេត្តកំពង់ស្ពឺ ៖ នារីវ័យក្មេងម្នាក់បើកម៉ូតូវ៉ាគោយន្ត ស្រាប់តែជ្រុលចង្កូតបុកម៉ូតូ១គ្រឿងទៀតដែលកំពុងបើកបញ្ច្រាសទិសគ្នា ដែលជិះឌុបគ្នាដោយបុរស២នាក់ បណ្តាលឲ្យខ្ទាតបុរសអ្នកបើកម៉ូតូចូលក្រោមកង់គោយន្ត កិនចំក្បាលស្លាប់នៅនឹងកន្លែង។ គ្រោះថ្នាក់ចរាចរណ៍នេះបានកើតឡើងនៅម៉ោង៥ និង១០នាទីល្ងាចថ្ងៃទី៩ ខែវិច្ឆិកា ឆ្នាំ២០១៨ ស្ថិតតាមផ្លូវលំក្រាលក្រួសក្រហម ត្រង់ចំណុចភូមិភក់ ឃុំមហាសាំង ស្រុកភ្នំស្រួច។
ម៉ូតូរបស់រងគ្រោះម៉ាកហ្សូ៊មមើ អ៊ិច ពណ៌ក្រហមលាយស ស៊េរីឆ្នាំ២០១៦ ពាក់ស្លាកលេខ កំពង់ស្ពឺ ១H-៩០២៦ បើកបរដោយឈ្មោះ អ៊ិន វុត្ថា ភេទប្រុស អាយុ២១ឆ្នាំ រស់នៅភូមិបន្ទាប់ ឃុំមហាសាំង ស្រុកភ្នំស្រួច ខេត្តកំពង់ស្ពឺ បានស្លាប់នៅនឹងកន្លែងកើតហេតុ និងអ្នករួមដំណើរម្នាក់ទៀតឈ្មោះណន សុគង់ ភេទប្រុស អាយុ៣០ឆ្នាំ រស់នៅភូមិជាមួយគ្នា បានរងរបួសស្រាល។
ចំណែកភាគីម៉ូតូមួយគ្រឿងទៀតម៉ាកហុងដាឌ្រីម ធុនសេ១២៥ ស៊េរីឆ្នាំ២០១៣ ពណ៌ខ្មៅ ពាក់ស្លាកលេខភ្នំពេញ ២AC-៥៧៩៣ បើកបរដោយឈ្មោះ ផេង សុខា ភេទស្រី អាយុ២៣ឆ្នាំ រស់នៅភូមិក្រាំងចចាត ឃុំមហាសាំង ស្រុកភ្នំស្រួច ខេត្តកំពង់ស្ពឺ បានរងរបួសស្រាល ។ រីឯគោយន្ត ពណ៌ក្រហម បើកបរដោយឈ្មោះ ឃុន សំបូរ ភេទប្រុស អាយុ៣៧ឆ្នាំ រស់នៅភូមិក្រាំងក្តី ឃុំមហាសាំង ស្រុកភ្នំស្រួចខេត្តកំពង់ស្ពឺ។
ប្រភពព័ត៌មានសាក្សីនៅកន្លែងកើតហេតុ បានឲ្យដឹងថា មុខពេលកើតហេតុ គេឃើញស្ត្រីម្នាក់បើកម៉ូតូហុងដាឌ្រីម ធ្វើដំណើរតាមផ្លូវក្រួសក្រហមក្នុងទិសដៅពីត្បូងទៅជើង លុះមកដល់ចំណុចកើតហេតុ បានបើកវ៉ាគោយន្តដែលបើកបរស្របទិសគ្នា ក៏ជ្រុលចង្កូតបុកម៉ូតូមួយគ្រឿងម៉ាកហ្ស៊ូមមើ កំពុងបើកបរក្នុងទិសដៅបញ្ច្រាស បណ្តាលឲ្យអ្នកបើកបរម៉ូតូដួលខ្ទាតចូលក្រោមកង់គោយន្តខាងក្រោយ កិនចំក្បាលស្លាប់ភ្លាមៗ រីឯអ្នករួមដំណើរបានរងរបួសស្រាល។ ចំណែកស្ត្រីជាអ្នកបើកបរម៉ូតូម៉ាកហុងដាគ្រាន់តែរងរបួសស្រាល។
ក្រោយកើតហេតុ សមត្ថកិច្ចបានចុះអន្តរាគមន៍ ប្រគល់សពឲ្យក្រុមគ្រួសារដឹកយកទៅធ្វើបុណ្យនៅគេហដ្ឋានតាមប្រពៃណី។ ចំណែកម៉ូតូទាំង២គ្រឿង និងគោយន្តត្រូវបានសមត្ថកិច្ចអូសយកមករក្សាទុកនៅអធិការដ្ឋាន រង់ចាំដោះស្រាយតាមច្បាប់៕
ចែករំលែកព័តមាននេះ