ខេត្តស្ទឹងត្រែង ៖ នគរបាលព្រហ្មទណ្ឌក្រុងស្ទឹងត្រែង បានឃាត់ខ្លួនយុវជនម្នាក់ដោយចោទពីបទជំរិតទារប្រាក់តាមរយៈទូរស័ព្ទ នៅក្រុងស្ទឹងត្រែង កាលពីព្រឹកថ្ងៃទី៧ ខែវិច្ឆិកា ។
យោងតាមប្រភពព័ត៌មានឱ្យដឹងថា យុវជនរូបនេះ ត្រូវបាននគរបាលចាប់ខ្លួននៅក្នុងហាងកាហ្វេមួយកន្លែងយីហោ១៩៧៩ ក្បែររង្វង់មូលថ្មី ក្រុងស្ទឹងត្រែង បន្ទាប់ពីរូបគេទូរស័ព្ទណាត់ជួបគ្នាជាមួយម្ចាស់អាជីវកម្មប្តូរប្រាក់ និងវេរលុយយីហោ ហេង ឡាយ ទាក់ទងទៅនឹងការបង្ហោះសារតាមហ្វេសប៊ុក ។
ចំពោះសារនោះ គឺយុវជនរូបនេះបានសរសេរនៅក្នុងគណនីផ្ទាល់ខ្លួនថា «លុយរាយខ្មែរទៅទិញកាតទូរស័ព្ទនៅផ្ទះ ហេង ឡាយ គេមិនយកទេ គាត់ថា ខ្ជិលរាប់ ។ ចង់សួរថា បងប្អូនជាកូនខ្មែរអ្នកខេត្តស្ទឹងត្រែងយេីង យល់យ៉ាងណា? មានលុយទៅទិញគេហេីយ គេថាខ្ជិលរាប់» ។
សារនេះ ត្រូវបានអ្នកប្រើប្រាស់បណ្តាញសង្គមហ្វេសប៊ុកស៊ែរតៗគ្នា រហូតម្ចាស់អាជីវកម្មខាងលើមើល ឃើញ ហើយក៏បានទាក់ទងទៅយុវជនរូបនេះ សុំឲ្យលុបចេញវិញ ។ ប៉ុន្តែយុវជនរូបនេះ មិនព្រមលុប ទើបបង្កើតការចរចា ដោយសន្ទនាតាមរយៈទូរស័ព្ទទារប្រាក់ចំនួន១ពាន់ដុល្លារអាមេរិកជាថ្នូរនឹងការលុបសារលើហ្វេសប៊ុករបស់ខ្លួន ដែលជាហេតុនាំឲ្យមានបទល្មើសជំរិតទារប្រាក់នេះតែម្តង ។
ដោយការមិនសុខចិត្ត ម្ចាស់អាជីវកម្មប្តូរប្រាក់និងវេរលុយយីហោ ហេង ឡាយ បានដាក់ពាក្យប្តឹងទៅនគរបាលក្រុងស្ទឹងត្រែង ដើម្បីចាត់ការតាមច្បាប់ ។ ក្រោយពីទទួលពាក្យបណ្តឹងរបស់ជនរងគ្រោះ ដែលជាម្ចាស់ទីតាំងប្តូរប្រាក់ និងវេរលុយ ហេង ឡាយ មានទីលំនៅភូមិត្រពាំងព្រីង សង្កាត់ស្ទឹងត្រែង ក្រុងស្ទឹងត្រែង និងដោយមានបញ្ជាផ្ទាល់ពីលោកវរសេនីយ៍ឯក ឈូក កុម៉ល់ អធិការនគរបាលក្រុងស្ទឹងត្រែង កម្លាំងជំនាញដឹកនាំដោយលោកវរសេនីយ៍ត្រី ប៉ាង ឡុច អធិការរង បានចាប់ខ្លួនយុវជនឈ្មោះ ម៉ៅ ឌីណា ភេទប្រុស អាយុ២១ឆ្នាំ ជាអ្នកលក់ភេសជ្ជៈប្រចាំក្រុងស្ទឹងត្រែង មានទីលំនៅភូមិស្រែក្រសាំង ស្រុកសៀមបូក។
លោកអធិការរង ប៉ាង ឡុច ឲ្យដឹងថា ជនសង្ស័យបានប្រើប្រាស់បណ្តាញសង្គមហ្វេសបុ៊ក (ម៉ៅ ឌីណា) និយាយបំផ្លើសការពិត និងគំរាមទារប្រាក់ពីទីតាំងប្តូរប្រាក់ ហេង ឡាយ ចំនួន១ពាន់ដុល្លារជាថ្នូរនឹងការមិនឲ្យបង្ហោះរូបភាពបន្ត ។
លោកបន្តថា ជននេះបានចរចាតាមរយៈទូរស័ព្ទជាមួយម្ចាស់អាជីវកម្មប្តូរប្រាក់និងវេរលុយនោះ ចាប់ តាំងពីយប់ថ្ងៃទី៦ ខែវិច្ឆិកា មកម្លេ៉ះ តែដោយសារវេលាយប់ទៅហើយ លោកក៏បានរាយការណ៍ជូនព្រះ រាជអាជ្ញា និងអូសបន្លាយ រហូតព្រឹកថ្ងៃទី៧ ខែវិច្ឆិកា ទើបអនុវត្តនីតិវិធី ខណៈម្ចាស់អាជីវកម្មណាត់ជួបជននេះនៅក្នុងហាងកាហ្វេ យីហោ ១៩៧៩ ក្បែររង្វង់មូលថ្មី ក្រុងស្ទឹងត្រែងដើម្បីប្រគល់ប្រាក់ ។ យុវជនខាង លើ ត្រូវបាននគរបាលក្រុងស្ទឹងត្រែង កសាងសំណុំរឿងបញ្ជូនទៅសាលាដំបូងដោយជាប់ចោទពីបទជំរិតទារប្រាក់ ។
នេះជាមេរៀនមួយ សម្រាប់អ្នកលេងហ្វេសប៊ុក ដែលរពឹសដៃក្នុងការបង្ហោះសារបរិហារនានា ដោយខ្វះការពិចារណា ឬការស៊ែរតៗគ្នា ដោយមិនច្បាស់លាស់ខ្លួនឯង ។ សារដែលមានសារសំខាន់អាចបង្ហោះបាននោះ គឺជាសារអប់រំបែបសុភាសិត សាររៀបរាប់ពីបញ្ហាផ្សេងៗ ឬពីរូបភាពដែលផ្តល់អត្ថប្រយោជន៍ដល់សង្គម និងចៀសវាងឲ្យបានការវាយប្រហារបុគ្គលណាម្នាក់ឬក៏ជាការបរិហារកេរ្តិ៍ ។ល។ កុំគប្បីរពឹសដៃអីនាំតែថ្មបាក់លើទេ ៕
ចែករំលែកព័តមាននេះ