ខេត្តបាត់ដំបង៖ សេចក្តីរាយការណ៍បឋមឱ្យដឹងថា យុវជនម្នាក់ទំនងស្រវឹងស្រាផង បានជិះម៉ូតូធ្លាប់ទឹកក្បែរផ្លូវរហូតលង់ស្លាប់ ហើយត្រូវក្រុមគ្រួសារស្វែងរកឃើញ នៅព្រឹកថ្ងៃទី០៤ វិច្ឆិកា ស្ថិតនៅក្នុងទឹកប្រឡាយក្បែរផ្លូវមួយកន្លែង នៅក្នុងភូមិក្បាលអាង ឃុំព្រៃខ្ពស់ ស្រុកបវេល ។
អធិការនគរបាលស្រុកបវេល លោកសុខ សារិន បានឲ្យដឹងថា យុវជនរងគ្រោះនោះ ឈ្មោះរ៉ាត ភូមិរិន អាយុ១៧ឆ្នាំ រស់នៅភូមិ-ឃុំកើតហេតុខាងលើ ។ លោកអធិការបានប្រាប់ថា ជនរងគ្រោះបានបាត់ខ្លួនកាលពីយប់ថ្ងៃទី០៣ វិច្ឆិកា ក្រោយពីជិះម៉ូតូចេញពីក្នុងហ្វូងផឹកស៊ីនៅក្នុងវត្តមួយកន្លែង លុះនៅវេលាម៉ោងជាង១០ព្រឹកថ្ងៃទី០៤វិច្ឆិកា ទើបក្រុមគ្រួសារស្វែងរកឃើញសាកសពនៅក្នុងប្រឡាយទឹក រួមទាំងម៉ូតូផង ដែលទំនងជិះដួលហើយជ្រុកធ្លាក់ទឹកតែម្ដង។
នៅកន្លែងកើតហេតុសាក្សីបាននិយាយថា នៅល្ងាចថ្ងៃទី០៣វិច្ឆកា ជនរងគ្រោះបានផឹកស៊ីជាមួយក្រុមគ្រួសារ ក្នុងពិធីភ្ជាប់ពាក្យបងប្អូន តែនៅយប់បន្តិច គេឃើញជនរងគ្រោះហាក់មានសភាពស្រវឹងទៅហើយ។ ប្រភពដដែលបានបន្តទៀតថា គ្រាហ៏នោះជនរងគ្រោះបានខ្ចីម៉ូតូបងប្អូនជិះចេញទៅផឹកជាមួយមិត្តភក្ដិបន្តទៀត ដែលនៅចាំក្នុងវត្តព្រៃខ្ពស់ ដែលក្នុងវត្តនេះមានរៀបចំធ្វើបុណកថិនទានផង។
សាក្សីបានបញ្ជាក់ថា ពេលនោះ គេឃើញជនរងគ្រោះអង្គុយផងជាមួយគូកន៣នាក់នៅក្នុងវត្ត ប៉ុន្តែនៅម៉ោងប្រហែល៩យប់ ជនរងគ្រោះបានជិះម៉ូតូចេញមកផ្ទះដោយនិយាយថា ទៅផ្ទះមួយភ្លែត ព្រោះឈឺពោះខ្លាំង ហើយក៏ជិះចេញបាត់ទៅរហូត រីឯគួរកន២នាក់អង្គុយផឹកចាំរហូតដែរ ដោយមិនឃើញជនរងគ្រោះត្រឡប់មកវិញឡើយ។
ព័ត៌មានលម្អឹតនឹងមានផ្សាយជូនលើទំព័រកាសែតកោះសន្តិភាព ។
ចែករំលែកព័តមាននេះ