រាជធានីភ្នំពេញ ៖ កម្លាំងសមត្ថកិច្ចនគរបាលការិយាល័យព្រហ្មទណ្ឌកម្រិតស្រាលក្រសួងមហាផ្ទៃ កាលពីថ្ងៃទី៣០ តុលា បានធ្វើការឃាត់ខ្លួនស្ត្រីវ័យក្មេងស្រស់ស្អាតម្នាក់ ពាក់ព័ន្ធលើបណ្តឹងរំលោភទំនុកចិត្ត ក្នុងទឹកប្រាក់ប្រមាណជិត២លានដុល្លារអាមេរិក ។ ស្ត្រីជាប់សង្ស័យរូបនេះ ឈ្មោះ ភឿង សុភ័ន អាយុ២៤ឆ្នាំ មុខរបរជាអ្នកលើកដាក់លុយតាមធនាគារ មានទីលំនៅភូមិព្រះខែ ឃុំកាហែង ស្រុកសំរោងទង ខេត្តកំពង់ស្ពឺ និងបានមកស្នាក់នៅម្តុំផ្លូវវេងស្រេង រាជធានីភ្នំពេញ ។
ដើមចមនៃការចាប់ឃាត់ខ្លួនស្ត្រីវ័យក្មេងខាងលើនេះ ត្រូវបានសមត្តកិច្ចឲ្យដឹងថា ធ្វើឡើងតាមពាក្យបណ្តឹងរបស់ឈ្មោះ ឌុក ច័ន្ទរស្មី ដែលមានទីលំនៅសង្កាត់ស្ទឹងមានជ័យ រាជធានីភ្នំពេញ ។ មន្ត្រីនគរបាលបានបង្ហើបឲ្យដឹងតាមពាក្យបណ្តឹងថា កាលពីអំឡុងឆ្នាំ២០១៧ នារីឈ្មោះ ភឿង សុភ័ន បានទៅនិយាយបញ្ចុះបញ្ចូលលួងលោម ដើម្បីយកប្រាក់ទៅបើកមុខរបររកស៊ីបញ្ចាំអចលនទ្រព្យផ្សេងៗ ដែលបានចំណេញយកមកចែកគ្នា និងបានសន្យាសងទាំងដើមទាំងការវិញ ។
ដោយសារមានការជឿទុកចិត្ត ដើមបណ្តឹងបានប្រគល់ប្រាក់ជាបន្តបន្ទាប់ឲ្យទៅនារីរូបនេះ សរុបរហូតដល់ទៅ(១.៩១០.០០០) ១លាន ៩សែន ១ម៉ឺនដុល្លារអាមេរិក និង១ពាន់៥៣០លានរៀល ។ ក្រោយពីទទួលយកប្រាក់ហើយ រហូតមកដល់ថ្ងៃនេះនារីឈ្មោះ ភឿង សុភ័ន មិនដែលបានចែកប្រាក់ចំណេញ ឬសងប្រាក់ដើមឲ្យមកដើមបណ្តឹងវិញឡើយ ដោយឈ្មោះនេះចេះតែកុហក់ថ្ងៃនេះថ្ងៃនោះ និងគេចវេសមិនព្រមជួបចរចាជាមួយដើមបណ្តឹងទៀតផង ។
អង្គហេតុដូចបានរៀបរាប់ខាងលើនេះ ទើបបានជាជនរងគ្រោះកើតទុក្ខមិនសុខចិត្ត បានដាក់ពាក្យបណ្តឹងទៅសមត្ថកិច្ច និងទៅស្ថាប័នអយ្យការសាលាដំបូងរាជធានីភ្នំពេញ ដើម្បីឲ្យជួយចាត់ការលើសំណុំរឿងស្ត្រីវ័យក្មេងពាក់ព័ន្ធពីបទរំលោភលើទំនុកចិត្តនេះ ។ បើតាមការអះអាងរបស់សមត្តកិច្ចបានឱ្យដឹងថាសំណុំរឿងនេះ ត្រូវបាននឹងកំពុងកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ នៅរសៀលថ្ងៃទី១ វិច្ឆិកា ។
ម្សិលមិញកោះសន្តិភាព មិនអាចសុំការបំភ្លឺពីស្ត្រីជនជាប់ចោទបានទេ ព្រោះនាងស្ថិតក្នុងកណ្តាប់ដៃសមត្ថកិច្ចមិនអាចសួរបាន ។តាមអ្នកវិភាគខ្លះនិយាយថា រឿងខ្ចីប្រាក់បានប្រមាណ២លានដុល្លារស្រួលៗបែបនេះ ទំនងសង្ស័យមានអាថ៌កំបាំងជ្រៅជាងនេះទៀត ដែលគ្មានព័ត៌មានទម្លាយឲ្យដឹង ។ ប្រសិនបើបានជួបសួរនាង ឬសុំការបំភ្លឺបានប្រហែលជាអាចធ្លាយរឿងផ្សេងៗទៀតជាមិនខាន ទើបធ្លាក់លុយច្រើនម្លឹងៗ
ផុយស្រួយពេក ៕
ចែករំលែកព័តមាននេះ