រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានប្រកាសធ្វើបុណ្យ៣យប់៣ថ្ងៃឆ្លងឆ្នាំ នៅវិមានឈ្នះឈ្នះ ដើម្បីអបអរសាទខួបលើកទី២០ នៃថ្ងៃបញ្ចប់សង្គ្រាមតាមរយៈនយោបាយឈ្នះឈ្នះនៅកម្ពុជា ។…
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានប្រកាសធ្វើបុណ្យ៣យប់៣ថ្ងៃឆ្លងឆ្នាំ នៅវិមានឈ្នះឈ្នះ ដើម្បីអបអរសាទខួបលើកទី២០ នៃថ្ងៃបញ្ចប់សង្គ្រាមតាមរយៈនយោបាយឈ្នះឈ្នះនៅកម្ពុជា ។
សម្តេចតេជោ ហ៊ុន សែន បានលើកឡើងក្នុងជំនួបសំណេះសំណាលជាមួយកម្មករ៦,៧៨៥នាក់ នៅឃុំព្រែកអញ្ចាញ ស្រុកមុខកំពូល ខេត្តកណ្តាល នៅថ្ងៃទី៣១ តុលា ឆ្នាំ២០១៨ ថា ឆ្នាំនេះយើងនៅដល់បុណ្យធំៗមួយចំនួនទៀតដូចជា ទី១- បុណ្យឯករាជ្យជាតិដែលនឹងប្រព្រឹត្តិទៅនៅថ្ងៃទី៩ វិច្ឆិកា ទី២- ថ្ងៃបុណ្យអ៊ុំទូក បន្ទាប់ទៅពិធីរំលឹកខួបលើកទី៤០ នៃថ្ងៃបង្កើតរណៈសិរ្សសង្គ្រោះជាតិកម្ពុជា នៅស្រុកស្នួល ខេត្តក្រចេះ ដែលជាចំណុចចាប់ផ្តើមសំខាន់នៃការគួសជួងនៃការបង្កើតថ្ងៃទី៧ មករា ឆ្នាំ១៩៩៧ ។
ជាមួយគ្នានោះដែរសម្តេចតេជោក៏បានឲ្យដឹងថា បន្ទាប់ពីមានបុណ្យជាបន្តបន្ទាប់រាជរដ្ឋាភិបាលនឹងធ្វើបុណ្យនៅវិមានឈ្នះឈ្នះ៣យប់៣ថ្ងៃតែម្តង ។ សម្តេចតេជោបញ្ជាក់ថា «៣យប់ ៣ថ្ងៃ អញ្ជើញអ្នកមុខកំពូលទៅរាំងវង់នៅនឹងតែម្តង ។ មិនមែនលេងតែពេលយប់ទេទាំងពេលថ្ងៃ ក៏រាំងវង់រាំឲ្យពេញតែម្តង ។ ទូរទស្សន៍ PNN នៅនឹងស្រាប់ផ្សាយទៅ ហើយទូរទស្សន៍ណា ចង់ផ្សាយទៅ ដាក់ឲ្យពេញនឹងតែម្តង» ។ សម្តេចក៏បានលើកឡើងថា ការធ្វើបុណ្យរំលឹកខួបលើកទី២០ ឆ្នាំនៅវិមានឈ្នះឈ្នះនេះ គឺធ្វើចំថ្ងៃឆ្លងឆ្នាំ គឺថ្ងៃទី២៩ ,៣០,៣១ ឆ្លងឆ្នាំ យើងរួមគ្នាមកបាញ់កាំជ្រូចឆ្លងឆ្នាំនៅទៅនឹងទៅ ។
សម្តេចគូសបញ្ជាក់ថា «ខួបទី២០ គឺជាថ្ងៃដែលយើងបញ្ចប់នៃសង្គ្រាម តាមរយៈនយោបាយឈ្នះឈ្នះ ។ នយោបាយឈ្នះឈ្នះ គឺជានយោបាយដែលធ្វើឲ្យប្រទេសកម្ពុជារបស់យើងទ ទួលបានសន្តិភាព និងឯកភាពទឹកដីរបស់យើង ហើយនយោបាយនេះបាននាំមកនូវការ អភិវឌ្ឍន៍ទាំងសេដ្ឋកិច្ចសង្គមដែលមិនឲ្យប្រជាជនស្លាប់ទៀត ។ ជាមួយគ្នានោះដែរ សម្តេចតេជោក៏បានឲ្យដឹងថា បន្ទាប់ពីធ្វើបុណ្យវិមានឈ្នះឈ្នះ រួចក៏នៅខួបលើកទី៤០ឆ្នាំនៃថ្ងៃរំដោះជាតិ៧ មករា ឆ្នាំ១៩៧៩ -២០១៩ ។ សម្តេចតេជោលើកឡើងទៀតថា សម្រាប់ការអភិវឌ្ឍន៍ប្រទេសមកដល់សព្វថ្ងៃនេះមិនមែនតែ ហ៊ុន សែន , ហេងសំរិន ជា ស៊ីម និងអ្នកផ្សេងទៀតនោះទេ ក៏មានបាតដៃរបស់ជូនជីតារបស់ឪពុកម្តាយក្មួយៗ ដែលបានបន្សល់ទុកជាមរតកនូវការអភិវឌ្ឍន៍រហូតមកដល់សព្វថ្ងៃនេះ ។
សូមជម្រាបវិមានឈ្នះ-ឈ្នះ ដែលជានិម្មិតរូបនៃសុខសន្តិភាពកម្ពុជា និងជាតិលេចចេញពីនយោបាយឈ្នះ-ឈ្នះ បានសាងសង់នៅខណ្ឌជ្រោយចង្វារ រាជធានីភ្នំពេញ គ្រោងសម្ពោធជាផ្លូវការដ៏ធំនៅថ្ងៃទី២៩ ខែធ្នូ ឆ្នាំ២០១៨ ខាងមុខនេះ ចំនឹងថ្ងៃដែលរាជរដ្ឋាភិបាលកម្ពុជាប្រារព្ធពិធីខួប២០ឆ្នាំនៃគោលនយោបាយឈ្នះ-ឈ្នះ(ឆ្នាំ១៩៩៨-ឆ្នាំ២០១៨) ផងដែរ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ។ វិមានឈ្នះឈ្នះនេះបានចាប់ផ្តើមសាងសង់ឡើង កាលពីខែកុម្ភៈ ឆ្នាំ២០១៦ ដោយទំហំដី៨ហិកតា ស្ថិតនៅខណ្ឌជ្រោយចង្វារ រាជធានីភ្នំពេញ ។
ការសាងសង់វិមានឈ្នះឈ្នះនេះ គឺដើម្បីរំឭកដល់គុណូបការៈរបស់បុព្វបុរសខ្មែរគ្រប់សម័យ កាល ដែលបានលះបង់ជីវិតក្នុងបុព្វហេតុជាតិមាតុភូមិ ។ ម្យ៉ាងទៀតវិមាននេះក៏ជានិម្មិតរូបនៃសុខសន្តិភាពដែលកម្ពុជាទទួលបាន ក្រោយពីបញ្ចប់សង្គ្រាមស៊ីវិលដ៏រ៉ាំរ៉ៃជាច្រើនទសវត្សរ៍កន្លងមក ។ ជាងនេះទៀតវិមាននេះនឹងក្លាយជាកេរមរតកសម្រាប់កូនចៅជំនាន់ក្រោយផងដែរ ៕
ចែករំលែកព័តមាននេះ