ប្រទេសឥណ្ឌូណេស៊ី ៖ នាព្រឹកថ្ងៃទី២៩ តុលា យន្តហោះធុនប៊ូអ៊ីង៧៣៧មួយគ្រឿងរបស់ក្រុមហ៊ុនអាកាសចរណ៍ LION AIR បានធ្លាក់ក្នុងសមុទ្រកោះជ្វាឥណ្ឌូណេស៊ី ជាមួយមនុស្ស១៨៩នាក់ជិះក្នុងនោះដែលប្រហែលជាត្រូវស្លាប់ទាំងអស់។
ពួកអ្នកជួយសង្គ្រោះគូសបញ្ជាក់ថា គេពិតជាគ្មានក្ដីសង្ឃឹមរកឃើញអ្នកនៅរស់រានមានជីវិតឡើយ។ បញ្ជីជនរងគ្រោះនឹងមានការកើនចំនួន ប្រសិនបើបុរសម្នាក់ឈ្មោះ SONY SETIAWAN ស្ថិតក្នុងយន្តហោះនោះដែរ។ យោងតាម DAILY MAILថា ប៉ុន្មាននាទីមុនការហោះឡើងរបស់យន្តហោះនេះ អ្នកទទួលខុសត្រូវម្នាក់នោះរបស់ក្រសួងហិរញ្ញវត្ថុឥណ្ឌូណេស៊ី ដោយសារការកកស្ទះចរាចរណ៍នៅក្រុងហ្សាការតា មកជិះយន្តហោះនោះមិនទាន់។
ទីបំផុតលោកជិះយន្តហោះរបស់ក្រុមហ៊ុនផ្សេង។ សារព័ត៌មានអង់គ្លេសនេះបន្តថា ក្នុងក្របខណ្ឌនៃការធ្វើដំណើរវិជ្ជាជីវៈ លោក SONY SETIAWAN ពិតជាអាយុថ្លៃអស្ចារ្យណាស់ ព្រះតាមធម្មតាលោក និងបណ្ដាសហសេវិកតែងធ្វើដំណើររៀងរាល់សប្ដាហ៍តាមយន្តហោះរបស់ក្រុមហ៊ុនLION AIR នោះ។
ដោយមានអារម្មណ៍ញាប់ញ័រខ្លាំងបំផុតចំពោះព័ត៌មាន អំពីការធ្លាក់យន្តហោះនោះ លោក SONY SETIAWAN ត្រូវបានបណ្ដាសារព័ត៌មានក្នុងស្រុក តាមសាកសួរពេលលោកចុះពីយន្តដែលលោកជិះ។ លោកថាខ្ញុំបានអានព័ត៌មានពីការធ្លាក់យន្តហោះ ខ្ញុំយំព្រោះមិត្តភក្ដិច្រើននាក់ជិះក្នុងយន្តហោះនោះ។ គ្រួសារខ្ញុំក្ដុកក្ដួលយ៉ាងខ្លាំងព្រោះគិតថាខ្ញុំស្លាប់ជាមួយគេឯងដែរ ហើយម្ដាយខ្ញុំយំខ្លាំងណាស់។ ប៉ុន្តែខ្ញុំបានប្រញាប់ជូនដំណឹងប្រាប់ពួកគេថា ខ្ញុំសុខសប្បាយទេ។
ពេលធ្វើដំណើរមកកាន់ព្រលានយន្តហោះ ខ្ញុំពុំដឹងហេតុអីក៏ស្ទះចរាចរណ៍ខ្លាំងម្ល៉េះនាព្រឹកនោះ។ តាមធម្មតាខ្ញុំតែងមកដល់ព្រលានយន្តហោះក្រុងហ្សាការតានាវេលាម៉ោង៣ទៀបភ្លឺ តែព្រឹកនោះខ្ញុំមកយឺតរហូតដល់ម៉ោង៦និង២០នាទីទើបមកដល់ ហើយខ្ញុំក៏ខកជើងហោះហើរ។
ក្រោយការធ្លាក់យន្តហោះនេះអាជ្ញាធរឥណ្ឌូណេស៊ីនិយាយថា ពុំមានសង្ឃឹមរកឃើញអ្នកនៅរស់រានមានជីវិតឡើយ ក្នុងចំណោមមនុស្សទាំង១៨៩នាក់ជិះក្នុងយន្តហោះធ្លាក់ក្នុងសមុទ្រនោះ។ពួកអ្នកមុជទឹក បានធ្វើប្រតិបត្តិការមុជទៅកាន់យន្តហោះនៅបាតសមុទ្រ។
ថង់ដាក់បំណែកសាកសពមនុស្សជាច្រើនរយ ត្រូវបានបញ្ជូនមកកាន់បន្ទីរពេទ្យប៉ូលិសដើម្បីពិនិត្យ ខណៈសាច់ញាតិជនរងគ្រោះរង់ចាំដោយអន្ទះសារព័ត៌មានទាក់ទិននឹងវាសនាពួកគេ។
ការិយាល័យជាតិរុករកនិងជួយសង្គ្រោះឥណ្ឌូណេសីុថ្លែងក្នុងសន្និសីទសារព័ត៌មានមួយថា មនុស្សទាំង១៨៩នាក់ជិះក្នុងយន្តហោះ ធ្លាក់ក្នុងសមុទ្រពិតជាស្លាប់អស់ហើយ។ នាយកប្រតិបត្តិការរបស់ការិយាល័យនេះ លោកBAMBANG SURYO AJIគូសបញ្ជាក់ថា ការអះអាងបែបនេះព្រោះផ្អែកលើស្ថានភាពបំណែកសាកសពមនុស្សទាំងឡាយដែលរកឃើញនិងស្រង់ចេញពីទឹក ដែលពុំមានសាកសពណាមួយនៅល្អទាំងដុលឡើយ។
លោកថាអ្នកមុជទឹកជាង៤០នាក់ ពេលនេះកំពុងតែខិតខំប្រឹងប្រែងតាមរកតួយន្តហោះ។ លោកយល់ថាសាកសពមនុស្សច្រើននាក់នៅជាប់ក្នុងយន្តហោះ។ បំណែកសាកសពមនុស្សព្រមទាំងរបស់របរជាច្រើនរកឃើញ ក្នុងទឹកសមុទ្រនៃខេត្តជ្វាខាងលិច។ ពុំទាន់មានព័ត៌មានពីចំនួនសាកសពមនុស្សពិតប្រាកដដែលស្រង់បាននៅឡើយ៕
ចែករំលែកព័តមាននេះ