រាជធានីភ្នំពេញ ៖ លោកតាម្នាក់អាយុ៧១ឆ្នាំជាអនុប្រធានភូមិ បានគាំងបេះដូងស្លាប់ភ្លាមៗ ក្រោយពីរូបគាត់ណាត់ជួបស្រីស្នេហ៍ចូលទៅរួមមេត្រីនៅក្នុងផ្ទះសំណាក់មួយកន្លែងពេញមួយរាត្រី លុះដល់វេលាជិតភ្លឺ បន្ទាប់ពីរួមរ័ក ចុងក្រោយរួចស្រាប់តែគាត់មានអាការមិនស្រួសខ្លួន ។ ពេលនោះ ស្រីស្នេហ៍កោសខ្យល់ឲ្យរួចរាល់ នាងក៏ចូលទៅងូតទឹក លុះពេលចេញមកវិញ ស្រាប់តែឃើញលោកតាដេកស្លាប់ចំហមាត់ធ្លុងបាត់ទៅហើយ ។ សមត្ថកិច្ចដែលទៅពិនិត្យបញ្ជាក់ថា លោកតាស្លាប់ដោយជំងឺគាំងបេះដូង ។
ហេតុការណ៍ខាងលើនេះ ធ្វើឲ្យមានការចាប់អារម្មណ៍យ៉ាងខ្លាំង កាលពីវេលាម៉ោង៤និង២០នាទីទៀបភ្លឺថ្ងៃទី២៤ ខែតុលា នៅផ្ទះសំណាក់យីហោ«ភ្នំមាស» ស្ថិតនៅតាមផ្លូវជាតិលេខ៣ ក្នុងភូមិទួលកី សង្កាត់ភ្លើងឆេះរទេះ ខណ្ឌពោធិ៍សែនជ័យ ។ លោកតាដែលស្លាប់នេះ ឈ្មោះ ខៀវ ឃឺនជាអនុប្រធានភូមិព្រៃបឹង សង្កាត់កន្ទោក ខណ្ឌពោធិ៍ពោធិ៍សែនជ័យ រាជធានីភ្នំពេញ ។
មិនមានអ្នកណាដឹងឡើយថា លោកតាមានថាមពលរួមរ័កជាមួយស្រីស្នេហ៍បានប៉ុន្មានដងទេ ប៉ុន្តែសមត្ថកិច្ចបានប្រទះឃើញស្រោមអនាម័យដែលប្រើរួចចំនួន២ ដាក់ក្នុងកន្ត្រកសំរាមក្នុងបន្ទប់នោះ ។ នៅក្នុងរបាយការណ៍របស់នគរបាលបានបញ្ជាក់ថា លោកតារូបនេះមានទំនាក់ទំនងស្នេហាជាមួយស្ត្រីវ័យ៣២ឆ្នាំម្នាក់ ដែលជាចុងភៅប្រចាំហាងមួយនៅម្ដុំផ្សារថ្នល់ទទឹង ឃុំដំណាក់អំពិល ស្រុកអង្គស្នួលខេត្តកណ្ដាល ។
កន្លងមក ពួកគាត់ទាំង២នាក់ តែងណាត់ជួបគ្នានៅផ្ទះសំណាក់ភ្នំមាសនេះជាបន្តបន្ទាប់ មិនមែនទើបតែលើកទី១នោះឡើយ ។ ប្រភពដដែលបន្តទៀតថា ដោយឡែកនៅវេលាម៉ោង៥ល្ងាចថ្ងៃទី២៣ ខែតុលា ពួកគាត់បានណាត់ជួបគ្នានៅផ្ទះសំណាក់ភ្នំមាសទៀត ប៉ុន្តែទាល់តែដល់វេលាម៉ោងប្រហែលជា៧និង៣០នាទីយប់ទើបពួកគាត់ទៅជួបគ្នានៅផ្ទះសំណាក់នោះ ។
ពួកគាត់បានដេកនៅជាមួយគ្នាពេញ១យប់ រហូតដល់វេលាទៀបភ្លឺគឺក្រោយពេលរួមរ័ករួច ដែលរបាយការណ៍សរសេរតាមការផ្តល់ចម្លើយពីស្រីស្នេហ៍របស់លោកតាថាពេលរួមរ័ករួចរាល់ លោកតាបានត្អូញប្រាប់នាងថាមិនសូវស្រួលខ្លួន ។ ពេលនោះនាងបានកោសខ្យល់ឲ្យគាត់ រួចរាល់ហើយទើបនាងចូលទៅងូតទឹកនៅក្នុងបន្ទប់ទឹក ដោយឲ្យលោកតាអង្គុយលើគ្រែពូកម្នាក់ឯង ។
ពេលងូតទឹករួចចេញមកវិញ ស្រាប់តែនាងឃើញលោកតាជាប្រុសស្នេហ៍ដេកហាមាត់ទទឹងគ្រែដោយសំយុងជើងចុះក្រោម ។ ភ្លាមៗ នាងបានចាប់អង្រួនប៉ុន្តែលោកតានៅតែមិនដឹងខ្លួន ទើបនាងរត់ទៅហៅម្ចាស់ផ្ទះសំណាក់ឲ្យមកជួយមើល ហើយម្ចាស់ផ្ទះសំណាក់ប្រាប់ថា លោកតាស្លាប់ហើយ ។ ហេតុការណ៍ធ្វើឲ្យមានការភ្ញាក់ផ្អើលយ៉ាងខ្លាំង ហើយបន្តិចក្រោយមក នគរបាលបច្ចេកទេសនៃស្នងការដ្ឋានរាជធានីភ្នំពេញ និងលោកវេជ្ជបណ្ឌិត នង សុវណ្ណារ័ត្ន បានមកពិនិត្យនិងធ្វើកោសល្យវិច័យ ។
ជាលទ្ធផលបង្ហាញថា ជនរងគ្រោះស្លាប់ដោយសារជំងឺគាំងបេះដូង ហើយក៏បានប្រគល់ឲ្យក្រុមគ្រួសារដើម្បីយកទៅធ្វើបុណ្យតាមប្រពៃណី ៕
ចែករំលែកព័តមាននេះ