ខេត្តព្រះសីហនុ ៖ ម្ចាស់តូបលក់ម្ហូបអាហារនៅតាមបណ្តោយឆ្នេរអូរឈើទាល និងអ្នកប្រកបរបររែក
អម្រែកលក់មឹកអាំងតាមឆ្នេរសមុទ្រ បានត្អូញត្អែរដូចៗគ្នាថា មួយរយ:ពេលចុងក្រោយនេះ បន្ទាប់ពីលំហូរចូលនៃជនជាតិចិនដ៏សន្ធឹកសន្ធាប់រាប់ម៉ឺននាក់ មកធ្វើការវិនិយោគ និងប្រកបមុខរបរលើវិស័យផ្សេងៗជាច្រើននោះ ធ្វើឲ្យអ្នកប្រកបរបរខ្មែរប្រឈមនឹងការលំបាកកាន់តែស្រួចស្រាល់ ។
ជនជាតិចិនដែលចូលចូលមកកាន់ក្រុងមាត់សមុទ្រខ្មែរនេះ បានជួលផ្ទះសំណាក់ឬសណ្ឋាគារពេញណែនទាំងអស់ ហើយទីតាំងរមណីយដ្ឋាន និងតូបលក់ដូរនៅតាមតំបន់ឆ្នេរកម្សាន្តស្ទើរទាំងអស់ ត្រូវបានជនជាតិចិនជួលបន្តដោយឲ្យតម្លៃខ្ពស់ប្រចាំខែ ។ ដោយសារបែបនេះ ជាហេតុធ្វើឲ្យប៉ះពាល់ដល់មុខរបរតូចតាចដូចជា អ្នករែកអម្រែកលក់នៅតាមឆ្នេរកម្សាន្តស្ទើរតែដាច់បាយទៅហើយ ព្រោះតែការធ្លាក់ចុះនៃចំនួនភ្ញៀវទេសចរជាតិនិងអន្តរជាតិដែលឈប់មកកម្សាន្តដូចមុន ។
ប្រភពខាងលើបានកត់សម្គាល់ថា អ្វីៗខុសប្លែកពីកាលឆ្នាំមុនៗ ព្រោះចំនួនភ្ញៀវទេសចរជាតិនិងអន្តរជាតិមានការធ្លាក់ចុះស្ទើរតែមិនគួរឲ្យជឿ ខណៈវិថីនានាក្នុងក្រុងក៏រងការខូចខាតធ្ងន់ដោយសារទឹកជំនន់នារដូវវស្សាកន្លងមក ដែលតម្រូវការពេលវេលាវែងសម្រាប់ការជួសជុលវិថីទាំងនោះឡើងវិញ ។
មួយវិញទៀត ដោយសារតែលំហូរចូលនៃជនជាតិចិនមានការកើនឡើងជាបន្តបន្ទាប់ បង្កឲ្យកកស្ទះចរាចរណ៍ជាប្រចា ំដែលជាប្រភពដើមចមប៉ះពាល់ដល់អារម្មណ៍ភ្ញៀវទេសចរជាតិនិងអន្តរជាតិ ដែលធ្វើដំណើរទៅកម្សាន្តនៅតាមតំបន់ឆ្នេរនិងរមណីយដ្ឋាននានា លែងចង់ទៅកម្សាន្តបន្តទៀត ធ្វើឲ្យតំបន់ឆ្នេរនិងរមណីយដ្ឋាននានានៅក្នុងក្រុងព្រះសីហនុ មានសភាពស្ងប់ស្ងាត់ប្លែកខុសពីឆ្នាំមុនៗ ។
ការឃ្លាតឆ្ងាយពីទឹកដីមាត់សមុទ្រ កំពុងបង្ហាញនូវលក្ខខណ្ឌមិនច្បាស់លាស់មួយនៃអនាគតមាត់សមុទ្រក្រុងព្រះសីហនុ ដែលជាតារារះនាទិសនិរតី ។ មតិខ្លះបានគិតថា ប្រសិនបើមិនរិះរកវិធីកែលម្អស្ថានការណ៍ដែលកំពុងកើតមាននេះឲ្យប្រសើរឡើងវិញទេ នោះពិតណាស់ថានឹងគ្មានអ្វីផ្លាស់ប្តូរនោះឡើយ ។
ក្នុងទឹកមុខស្រងូតស្រងាត់ ពលរដ្ឋខ្មែរជាអាជីវករលក់ដូរម្ហូបអាហារនៅតាមតំបន់ឆ្នេរអូរឈើទាល ដែលជាទីពេញនិយមសម្រាប់អ្នកទេសចរទៅមុជទឹកលេងកម្សាន្តពីមុនមក មានតូបលក់ដូរប្រមាណជាង២០តូប រហូតមកដល់សព្វថ្ងៃនេះម្ចាស់តូបជាងពាក់កណ្តាលនៃចំនួនខាងលើបានជួលទៅឲ្យជនជាតិចិនក្នុងតម្លៃចាប់ពី៥.០០០ដុល្លាររហូតដល់២០.០០០ដុល្លារក្នុង១ខែ សម្រាប់ប្រកបរបរលក់ដូរនៅពេលយប់រហូតដល់ភ្លឺ ។ ជាមួយនេះ ពួកគេបានចាក់ធុងបាស់រាំ ដោយបំពងសំឡេងខ្លាំងៗ ហើយកន្លងមកក៏ធ្លាប់មានជម្លោះហិង្សាវាយតប់គ្នាជាមួយភ្ញៀវជាជនជាតិបរទេសនិងជនជាតិខ្មែរថែមទៀតផង តែត្រូវបានសមត្ថកិច្ចបង្ក្រាបទាន់ពេលវេលា ។
ពួកគាត់បន្តទៀតថា សព្វថ្ងៃនៅឆ្នេរអូរឈើទាលនៅសល់តែ៨តូបតែប៉ុណ្ណោះដែលមិនទាន់ជួលឲ្យជនជាតិចិន ហើយកំពុងតែជួបនឹងហានិភ័យខ្ពស់លើអាជីវកម្មរបស់ខ្លួន ខណៈចំនួនភ្ញៀវទេសចរជាតិ-អន្តរជាតិបានបន្តធ្លាក់ចុះ ។ ដូច្នេះ ចាំបាច់ពួកគាត់អាចជួលឲ្យជនជាតិចិន ដោយចាំតែយកលុយឈ្នួលប្រចាំខែក៏ល្អដែរ ។
ដោយឡែក អាជីវករដែលបានជួលខ្យូស(តូប)ពីក្រុមហ៊ុន ស៊ាង ឈុនហេង ចំនួន៨ខ្យូស(តូប)នៅតាមបណ្តោយឆ្នេរឯករាជ្យ ឆ្នេរសណ្ឋាគារ៧ជាន់ ពេលនេះកំពុងតែព្រួយបារម្ភពីការបាត់បង់មុខរបរលក់ដូររបស់ខ្លួនដែរ ខណៈតំណាងក្រុមហ៊ុនខាងលើបានជូនដំណឹងថា ឈប់ជួលឲ្យអាជីវករលក់ដូរបន្តទៀតហើយ ទៅតាមពេលវេលាកំណត់នៃការចុះហត្ថលេខាដែលត្រូវបញ្ចប់នៅថ្ងៃទី១ ខែមករា ឆ្នាំ២០២០ខាងមុខ ។
ពួកគាត់ឲ្យដឹងថា ដោយសារតែខ្យូសដែលក្រុមហ៊ុនខាងលើជួលឲ្យពួកគាត់កន្លងមក ស្ថិតនៅជាប់នឹងអគារដែលក្រុមហ៊ុន ស៊ាង ឈុនហេង សាងសង់លើដីឆ្នេរឯករាជ្យ ហើយបានជួលទៅឲ្យជនជាតិចិនក្នុង១ខែមានតម្លៃរហូតដល់ទៅ៧០.០០០ដុល្លារ ក្នុងរយៈពេលប្រមាណជាង១០ឆ្នាំ ។ ដូច្នេះក្រោយពីបញ្ចប់ទៅតាមការកំណត់ខាងលើ ក្រុមហ៊ុន ស៊ាង ឈុនហេង នឹងមានគម្រោងជួលខ្យូស(តូប)ខាងលើឲ្យទៅចិន ដែលកំពុងតែដំណើរការសាងសង់សណ្ឋាគារក្បែរនោះក្នុងតម្លៃខ្ពស់ ដែលអាជីវករដូចពួកគាត់មិនមានសមត្ថភាពជួលដូចជនជាតិចិននោះទេ ។
បញ្ហាចំពោះមុខនៅឯឆ្នេរសមុទ្រនេះ ពិតជាមានរឿងរ៉ាវច្រើនរៀបរាប់មិនអស់ សូម្បីតែសណ្ឋាគារ ផ្ទះសំណាក់ ដែលធ្លាប់ជួលស្នាក់នៅមានតម្លៃចាប់ពី១៥ដុល្លារ ទៅ២០ឬ៣០ដុល្លារ បានឡើងរហូតដល់ទាបបំផុតក៏៥០ដុល្លារដែរ ហើយដើររកអស់មួយកំណាត់យប់ទើបបាន ។
សណ្ឋាគារនិងផ្ទះសំណាក់ដែលពីមុនសម្បូរ តែពេលនេះវាបានក្លាយទៅជាកាស៊ីណូរបស់ថៅកែចិនអស់ទៅហើយ ។ អ្វីដែលគួរឲ្យកត់សម្គាល់នៅពេលយប់ គឺទីតាំងកាស៊ីណូបានបង្ហាញឧត្តមភាពគ្រប់ទីកន្លែង និងប្រៀបដូចជាក្រុងម៉ាកាវដូច្នេះដែរ ។អ្នកខ្លះបានបញ្ចេញមតិថា ថ្វីបើកម្ពុជាមិនទាន់មាន«ទីក្រុងចិន»ដូចនៅតាមប្រទេសនានា តែវាហាក់ដូចជារំកិលទៅរកទីក្រុងចិនមួយរួចទៅហើយ ដែលទាមទារឲ្យមានការគ្រប់គ្រងប្រកបដោយចីរភាព ៕
ចែករំលែកព័តមាននេះ