ដើម្បីសង្គមគ្រួសារ សហគមន៍ និងសង្គមជាតិអាចរីកចម្រើនទៅបានលុះត្រាតែប្រជាជនចេះយោគយល់លះបង់ ចេះសហការ រួបរួមសាមគ្គីគ្នា ហើយមុននឹងធ្វើអ្វីត្រូវគិតប្រយោជន៍រួមជាធំ ។លោកហេង ចាន់ថន និស្សិតបរិញ្ញាបត្រជាន់ខ្ពស់នៅសាកលវិទ្យាល័យភូមិន្ទភ្នំពេញបានលាតត្រដាងថា ក្រៅម៉ោងសិក្សាខ្ញុំតែងធ្វើការងារដែលមានប្រយោជន៍រួម ទោះការងារនោះ អ្នកខ្លះគិតថា តូចតាចក៏ដោយ តែវាជាចំណូលចិត្តរបស់ខ្ញុំ។
ខ្ញុំធ្លាប់ជានិស្សិតស្ម័គ្រចិត្តក្នុងសកម្មភាពវាស់វែងដីធ្លីជូនប្រជាពលរដ្ឋនៅខេត្តកំពង់ស្ពឺ ការងារទាំងនេះបានជួយដល់ប្រជាជនឱ្យពួកគាត់ទទួលបានប្លង់កម្មសិទ្ធិលើទំហំដីដែលបានកាន់កាប់។ ក្រៅពីនេះនៅឯខេត្តពោធិ៍សាត់ ខ្ញុំបានទៅជួយពន្យល់ណែនាំដល់ប្អូនៗជាសិស្សានុសិស្សនៅវិទ្យាល័យឱ្យដឹងពីអត្ថប្រយោជន៍នៃការសិក្សានៅមហាវិទ្យាល័យពីរបៀបតម្រង់ទិសមុខវិជ្ជាដែលត្រូវរៀននៅមហាវិទ្យាល័យ និងប្រាប់ពីភាពខុសប្លែកគ្នាខ្លះៗរវាងការរៀននៅវិទ្យាល័យ និងមហាវិទ្យាល័យឱ្យបានច្រើនកុំឱ្យពួកគាត់ធ្វេសប្រហែស ។
និស្សិតរូបនេះនិយាយទៀតថា ចំពោះនិស្សិតដូចគ្នា ឬសិស្សជំនាន់ក្រោយខ្ញុំបានជួយផ្តល់យោបល់ ជួយបង្រៀន និងជួយបង្ហាញខ្លះៗពីរបៀបរស់នៅទីក្រុង ។ កត្តាទាំងនេះបានធ្វើឱ្យយើងទាំងអស់គ្នាកើនចំណេះ មានបទពិសោធន៍ មានភាពស្និទ្ធស្នាល ចេះជួយគ្នា មានការយោគយល់អធ្យាស្រ័យ ជាពិសេសធ្វើឱ្យយើងចេះគោរព អាណិតស្រឡាញ់គ្នាទៅវិញទៅមកឈានទៅមានការរីកចម្រើនដល់សង្គមគ្រួសារ សហគមន៍ និងសង្គមជាតិ៕
ចែករំលែកព័តមាននេះ