រាជធានីភ្នំពេញ ៖ សេចក្តីរាយការណ៍បឋមឱ្យដឹងថា កាលពីថ្ងៃទី២០ ខែតុលាកន្លងទៅកម្លាំងនគរបាលអន្តោប្រវេសន៍ប្រចាំច្រកព្រលានយន្តហោះអន្តរជាតិភ្នំពេញ សហការជាមួយមន្ត្រីគយ និងមន្ទីរប្រឆាំងគ្រឿងញៀនក្រសួងមហាផ្ទៃ បានខ្លួនជនជាតិចិនម្នាក់ពាក់ព័ន្ធនឹងថ្នាំញៀនជិត២គីឡូក្រាមដែលបម្រុងនាំចេញទៅក្រៅប្រទេស ។
ជនសង្ស័យឈ្មោះ Yu Wei Yi ភេទប្រុសអាយុ៣២ឆ្នាំ កាន់លិខិតឆ្លងដែនលេខ ៤៦២៩២៣បម្រុងធ្វើដំណើរចេញពីប្រទេសកម្ពុជាទៅកាន់ទីក្រុងហុងកុង ប្រទេសចិន ។ សេចក្តីរាយការណ៍ឲ្យដឹងទៀតថា បុរសជនជាតិរូបនេះត្រូវបានឃាត់ខ្លួន ក្រោយពីសមត្ថកិច្ចឆែកឆេររកឃើញមានសារធាតុញៀនលាក់ក្នុងកញ្ចប់រុំជាប់នៅភ្លៅទាំងសងខាងនិងដងខ្លួនសរុបចំនួន៤កញ្ចប់ ជាគ្រឿងញៀនប្រភេទមេតំហ្វេតាមីន ដែលមានទម្ងន់១.៩៩៤,៧២ក្រាម ។
លោកនាយឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិ ទទួលការងារប្រយុទ្ធប្រឆាំងគ្រឿងញៀន បានមានប្រសាសន៍តាមទូរស័ព្ទថា សមត្តកិច្ចរបានឃាត់ខ្លួនបុរសជនជាតិចិនម្នាក់នោះមែន ដែលបម្រុងនាំយកសារធាតុញៀនជិត២គីឡូក្រាមទៅកាន់ទីក្រុងហុងកុង ប្រទេសចិន ។
តាមចម្លើយជនសង្ស័យបានសារភាពនៅចំពោះមុខសមត្ថកិច្ចថា ថ្នាំញៀននោះខ្លួនបានទទួលពីមនុស្សម្នាក់ជាជនជាតិចិនដូចគ្នា ប្រគល់ឲ្យរូបគេនាំចេញពីប្រទេសកម្ពុជាទៅកាន់ទីក្រុងហុងកុងតាមជើងយន្តហោះ ។ ពេលទៅដល់ហុងកុងមានមនុស្សចាំទទួលយក តែមិនទាន់បានចេញផងក៏ត្រូវសមត្ថកិច្ចកម្ពុជាចាប់ខ្លួនតែម្តង ។ ជនសង្ស័យនិងវត្ថុតាង ត្រូវបានសមត្ថកិច្ចមន្ទីរប្រឆាំងគ្រឿងញៀន កសាងសំណុំរឿងបញ្ជូនទៅសាលាដំបូងរាជធានីភ្នំពេញ ៕
ចែករំលែកព័តមាននេះ