រាជធានីភ្នំពេញ៖ ដោយសារតែជីវភាពទីទ័លក្ររកព្រឹកខ្វះល្ងាចបានជំរុញឲ្យតារាចម្រៀងដែលល្បីល្បាញតាមរយៈបទ «មេមាយសប្បាយចិត្ត» នាងរ័ត្ន រចនា បានហក់ចូលវិស័យសិល្បៈចម្រៀងអាជីពរហូតមកដល់ពេលបច្ចុប្បន្ន ។ បើទោះបីជាបានប្រឡូកក្នុងអាជីពកាន់ក្បាលមេក្រូច្រៀងគ្រប់ទីកន្លែងអស់រយៈពេលជិត២០ឆ្នាំមកក៏ដោយ ប៉ុន្តែរ័ត្ន រចនា…
រាជធានីភ្នំពេញ៖ ដោយសារតែជីវភាពទីទ័លក្ររកព្រឹកខ្វះល្ងាចបានជំរុញឲ្យតារាចម្រៀងដែលល្បីល្បាញតាមរយៈបទ «មេមាយសប្បាយចិត្ត» នាងរ័ត្ន រចនា បានហក់ចូលវិស័យសិល្បៈចម្រៀងអាជីពរហូតមកដល់ពេលបច្ចុប្បន្ន ។ បើទោះបីជាបានប្រឡូកក្នុងអាជីពកាន់ក្បាលមេក្រូច្រៀងគ្រប់ទីកន្លែងអស់រយៈពេលជិត២០ឆ្នាំមកក៏ដោយ ប៉ុន្តែរ័ត្ន រចនា ត្រូវមហាជនស្គាល់ និងមានការចាប់អារម្មណ៍ខ្លាំងនាពេលចុងក្រោយនេះប៉ុណ្ណោះ តាមរយៈការបង្ហោះបទចម្រៀង«មេម៉ាយសប្បាយចិត្ត»ដែលនាងបានច្រៀងក្នុងកម្មវិធីមួយ ។
រ័ត្ន រចនា បានសម្តែងក្តីសប្បាយចិត្ត ដ្បិតអាជីពសិល្បៈចម្រៀងដែលនាងបានប្រឡូកអស់ជាច្រើនឆ្នាំ ត្រូវគេទទួលស្គាល់ និងឲ្យតម្លៃពីទឹកដមសំនៀងរបស់នាងនាពេលនេះ។ ជាកូនស្រីដែលមានឪពុកម្តាយជាអ្នកខេត្តស្វារៀងនាង រ័ត្ន រចនា បានឲ្យដឹងកាលពីពេល ថ្មីៗកន្លងមកថា មុនចាប់ឈោងក្នុងវិស័យសិល្បៈរហូតមកដល់នាពេលនេះ រូបនាងធ្លាប់បានទទួលការបណ្តុះបណ្តាលពីសាលាចម្រៀង ។ ដោយសារតែជីវភាពមានការខ្វះខាត ទើបធ្វើឲ្យនាងសម្រេចចិត្តបញ្ចប់ការសិក្សាត្រឹមថ្នាក់ទី៧ នៅសាលាចតុមុខក្នុងអាយុ១១ឆ្នាំ ។
នាងបន្ថែមថា «ដោយសារមានទេពកោសល្យពីធម្មជាតិ ហើយចង់រកប្រាក់ដោះស្រាយជីវភាពផងនោះ នាងខ្ញុំក៏បានផ្សងព្រេងជិះកង់ដើរសុំគេច្រៀងនៅតាមទីកន្លែងនានា ។ ប៉ុន្តែគ្រប់កន្លែងទាំងអស់មិនបានទទួលឲ្យនាងខ្ញុំចូលច្រៀងឡើយ ដោយសារតែនាងខ្ញុំនៅក្មេងពេក ជាហេតុធ្វើឲ្យនាងខ្ញុំបានខិតខំតែងខ្លួន និងពាក់ស្បែកជើងខ្ពស់ៗឲ្យមើលទៅដូចជាមនុស្សពេញវ័យ ដើម្បីបានច្រៀងគ្រាន់ដោះស្រាយជីវភាព »។
បើតាមនាងរ័ត្ន រចនា មុននឹងចាប់ផ្តើមអាជីពចម្រៀង នាងបានទទួលការបណ្តុះបណ្តាលពីក្លឹបចម្រៀងរបស់លោកមិញ សុធីវណ្ណ ហៅតូ ។ បន្ទាប់ពីទទួលបានបណ្តុះបណ្តាលរួចមកអាជីពដំបូងដែលនាងច្រៀងនោះគឺនៅហាងមួយម្តុំរង្វង់មូលផ្សារដើមថ្កូវ ហើយបន្ទាប់មកក៏មានការច្រៀងនៅហាង ផ្សេងៗទៀតជាច្រើន ខណៈពេលបច្ចុប្បន្ននាងជាអ្នកចម្រៀងប្រចាំហាងមួយកន្លែងនៅម្តុំទួលគោក ។
បើទោះបីជាប្រឡូកក្នុងវិស័យចម្រៀងនេះប្រមាណ២០ឆ្នាំមកហើយក្តី ប៉ុន្តែរ័ត្ន រចនា មិនត្រូវបានគេទទួលស្គាល់ពីទឹកដមសំឡេងរបស់នាងឲ្យបានទូលំទូលាយពីទស្សនិកជនឡើយ ។ ប៉ុន្តែនាងត្រូវបានគេទទួលស្គាល់ខ្លាំង បន្ទាប់ពីវីដេអូដែលនាងបកស្រាយបទ«មេម៉ាយសប្បាយចិត្ត»នៅលើបណ្តាញសង្គមហ្វេសប៊ុក ក្នុងនោះមានអ្នកចូលទស្សនា និងចែកចាយរាប់ម៉ឺននាក់ ។
រ័ត្ន រចនា បានបញ្ជាក់ថា «ជាធម្មតាមេក្រុមរបស់នាងខ្ញុំតែងតែ live វីដេអូនៅពេលដែលក្រុមបានចេញទៅសម្តែងនៅក្នុងកម្មវិធី ផ្សេងៗ ប៉ុន្តែការបង្ហោះកន្លងមកនោះហាក់មិនសូវទទួលបានការចាប់អារម្មណ៍ខ្លាំងឡើយ ។ ទើបតែការlive បទ «មេម៉ាយសប្បាយចិត្ត» នេះប៉ុណ្ណោះដែលមានការចាប់អារម្មណ៍ខ្លាំង និងមានអ្នកចែកចាយច្រើនតាមហ្វេសប៊ុក ដែលជាហេតុធ្វើឲ្យនាងខ្ញុំបានទទួលការចាប់អារម្មណ៍ខ្លាំងពីមហាជន »។
បើតាម រ័ត្ន រចនា បន្ទាប់ពីការចាប់អារម្មណ៍នោះមក នាងក៏មានការងារធ្វើច្រើនជាងមុន ដោយត្រូវគេអញ្ជើញឲ្យឡើងច្រៀងតាមស្ថានីយទូរទស្សន៍ និងច្រៀងក្នុងកម្មវិធី ផ្សេងៗ ។ ពិសេសភាពល្បីល្បាញ និងការទទួលស្គាល់ពីទឹកដមសំឡេងរបស់នាងនាពេលនេះ ម្ចាស់ផលិតកម្មមួយបានទាក់ទងឲ្យនាងចូលច្រៀង ។ នាងនៅមិនទាន់ហ៊ានបញ្ចេញថា ជាផលិតកម្មណាមួយនៅឡើយទេ ដោយត្រូវរង់ចាំបទចម្រៀងចេញជាផ្លូវការសិន នោះនាងនឹងបញ្ជាក់ប្រាប់តែម្តង ។
ក្នុងនាមជាកូនទី៤ក្នុងចំណោមបងប្អូន៦នាក់ក្នុងគ្រួសារ រ័ត្ន រចនា បានសម្តែងក្តីរំភើបយ៉ាងខ្លាំងក្នុងពេលដែលសមត្ថភាពច្រៀងរបស់នាងត្រូវបានគេទទួលស្គាល់យ៉ាងទូលំទូលាយនាពេលនេះ ។ បើទោះបីជាការទទួលស្គាល់នេះវាអាចមានរយៈពេលវែង ឬខ្លីនោះ នាងក៏នៅតែសប្បាយចិត្ត ដោយសារតែនាងបានអស់ចិត្ត ព្រោះប្រឡូកក្នុងវិស័យសិល្បៈប្រមាណ២០ឆ្នាំមកនេះ ទើបតែពេលនេះនាងអាចទទួលបានគាំទ្រខ្លាំងបំផុតពីទស្សនិកជន ៕
ចែករំលែកព័តមាននេះ