សហរដ្ឋអាមេរិក-កូរ៉េ ៖ ប្រភពអាមេរិក២និយាយកាលពីថ្ងៃទី៨ តុលាថា សហរដ្ឋអាមេរិកប្រឆាំងចំពោះការបង្កើតតំបន់ហាមហោះហើរ តាមបណ្ដោយព្រំដែនរវាងកូរ៉េទាំង២ ដែលក្រុងសេអ៊ូល និងក្រុងព្យុងយ៉ាង ព្រមព្រៀងគ្នាបង្កើតចាប់ពីដើមខែខាងមុខនេះទៅ។
វាពុំមែនជាលើកដំបូងទេ ដែលមានការខ្វែងគំនិតគ្នារវាងកូរ៉េខាងត្បូង និងសហរដ្ឋអាមេរិក ចាប់តាំងពីមានការចរចាគ្នាឡើងវិញ ជាមួយកូរ៉េខាងជើងមក ទោះបីប្រទេសទាំង២អះអាងជាសាធារណៈថា ដើរលើផ្លូវតែមួយជាមួយគ្នា ដើម្បីបញ្ចៀសស្រមោលនៃសង្គ្រាមនុយក្លេអ៊ែរមួយនៅឧបទ្វីបកូរ៉េក្ដី។
កិច្ចព្រមព្រៀងយោធាដែលចុះហត្ថលេខា កាលពីខែមុននាឱកាសនៃទស្សនកិច្ច របស់ប្រធានាធិបតីកូរ៉េខាងត្បូង លោក MOON JEA IN នៅក្រុងព្យុងយ៉ាង ធ្វើឲ្យក្រុងវ៉ាស៊ិនតោនមានការបារម្ភ ព្រោះខ្លាចផ្នែកការពាររបស់កូរ៉េខាងត្បូងចុះខ្សោយ មុនពេលមានការរីកចម្រើនជាក់ស្ដែងនានាលើការរំសាយនុយក្លេអ៊ែរ។
កិច្ចព្រមព្រៀងនោះគ្រោងបញ្ចប់រាល់អំពើប្រទូស្តរ៉ាយគ្នា បង្កើតតំបន់ហាមការហោះហើរ ដោះមីននៅតាមពំដែន ហើយបំផ្លាញចោលបណ្ដាប៉ុស្តិ៍យោធា ស្ថិតក្នុងតំបន់ហាមមិនឲ្យមានកងទ័ព។
ប្រភពអាមេរិកទាំង២ដែលមិនបញ្ចេញឈ្មោះនិយាយថា សហរដ្ឋអាមេរិកប្រឆាំងជាពិសេសការបង្កើតតំបន់ហាមការហោះហើរ ដែលរារាំងខ្លួននិងសម្ព័ន្ធមិត្តកូរ៉េខាងត្បូង ធ្វើសមយុទ្ធយោធានានានៅក្បែរព្រំដែន។តំបន់បែបនេះដែលបណ្ដាយន្តហោះចម្បាំងត្រូវហាមមិនឲ្យហោះចូល ត្រូវចូលជាធរមានចាប់ពីថ្ងៃទី១វិច្ឆិកាទៅ ហើយលាតសន្ធឹងក្នុងចម្ងាយ៤០គីឡូម៉ែត្រសងខាងខ្សែបន្ទាត់ព្រំដែន៕
ចែករំលែកព័តមាននេះ