ខណៈថង់សម្រាមកំពុងរាយប៉ាយពេញលើផ្ទៃទឹកនៅឃុំកំពង់ឃ្លាំង(មានវីដេអូ)
- សៀមរាប
ខេត្តសៀមរាប ៖ អង្គការមូលនិធិទំពាំងស្នងឬស្សីដែលធ្វើការងារទាក់ទងនឹងសង្គម និងការអប់រំបានមើលឃើញពីផលប៉ះពាល់ធំធេងដែលបណ្ដាលមកពីថង់សំរាមប្លាស្ទិកនៅតាមបឹងទន្លេសាបជាច្រើន ខណៈភ្ញៀវបរទេសទៅជិះទូកដើរលេងកម្សាន្តមើលទេសភាពបឹងធម្មជាតិ ជាពិសេសពលរដ្ឋរស់នៅលើផ្ទៃទឹកនោះ គ្មានចេះសំអាត ។ ដូច្នេះទើបធ្វើឱ្យមានការរាយប៉ាយពេញផ្ទៃបឹងទន្លេសាបនេះតែម្តងធ្វើឱ្យភ្ញៀវបរទេសធ្វើការរិះទៅលើអាជ្ញាធរ ហើយថង់ប្លាស្ទិកដែលមិនរលាយ…
ដូច្នេះទើបធ្វើឱ្យមានការរាយប៉ាយពេញផ្ទៃបឹងទន្លេសាបនេះតែម្តងធ្វើឱ្យភ្ញៀវបរទេសធ្វើការរិះទៅលើអាជ្ញាធរ ហើយថង់ប្លាស្ទិកដែលមិនរលាយ ថែមទាំងបំពុលទឹកដែលឈានដល់បំផ្លាញប្រព័ន្ធជីវចម្រុះក្នុងទឹកថែមទៀតផង ។ អង្គការមួយនេះក៏បានធ្វើការងារជាមួយសហគមន៍កំពង់ឃ្លាំង ដោយប្រមូលពលរដ្ឋនៅតំបន់នេះ និងព្រះសង្ឃព្រមទាំងសមត្ថកិច្ចជួយដួសសំរាមដែលអណ្ដែតលើផ្ទៃទឹកនោះយកទៅដាក់នៅលើទីទួលណាមួយដែលមិនអាចប៉ះពាល់ដល់ភ្ញៀវបរទេស ឬប្រជាពលរដ្ឋនៅតំបន់នោះព្រមទាំងយកសំរាមទាំងនោះទៅកែច្នៃបង្កើត ទៅជាវត្ថុសិល្បៈផ្សេងៗទៀតផងដែរ ។ ហើយអង្គការក្នុងស្រុកមួយនេះដោយមើលឃើញពីការបំពុលបរិស្ថានក្នុងបឹងទន្លេសាបកាន់តែច្រើនទៅៗបានរៀបចំគម្រោងសម្អាតបរិស្ថាន ដើម្បីសង្គ្រោះបឹងទន្លេសាបពីការបំពុលដោយសារថង់ប្លាស្ទិក ។
សូមបញ្ជាក់ផងដែរថា ភូមិសាស្ដ្រឃុំកំពង់ឃ្លាំងនេះ គឺជាតំបន់លិចទឹកដែលស្ថិតនៅក្នុងស្រុក សូទ្រនិគម ខេត្តសៀមរាបដែលមានចម្ងាយផ្លូវប្រមាណជាង៧០គីឡូម៉ែត្រពីទីក្រុងសៀមរាប និងប្រវែង១៤គីឡូម៉ែត្រពីផ្សារដំដែក ហើយផ្ទះរបស់ប្រជាពលរដ្ឋរាប់រយខ្នងត្រូវស្ថិតនៅលើផ្ទៃទឹកបឹងទន្លេសាប ដែលលាតសន្ធឹងល្វឹងល្វើយនារដូវវស្សា ។
លោកស៊ា សុផល ប្រធានអង្គការមូលនិធិទំពាំងស្នងឬស្សីបានឱ្យដឹងថា គម្រោងខាងលើមានឈ្មោះថា«ការសំអាតបឹងទន្លេសាប» ដោយអង្គការលោកបានជ្រើសរើសឃុំកំពង់ឃ្លាំងជាគោលដៅដំបូងសម្រាប់ការអនុវត្ត ។ លោកថា គម្រោងនេះមានបំណងជួយសង្គ្រោះបឹងទន្លេសាប និងប្រព័ន្ធជីវចម្រុះទាំងអស់ដែលមាននៅក្នុងបឹងដ៏ធំមួយនេះ ។ លោកពន្យល់ថា ហេតុផលដែលអង្គការលោកចាប់ដៃគូជាមួយសហគមន៍កំពង់ឃ្លាំងដោយសារអង្គការនេះមើលឃើញពីការតាំងចិត្ត និងការចូលរួមខ្ពស់របស់សហគមន៍ គឺថ្នាក់ដឹកនាំមានផែនការច្បាស់លាស់ និងចង់បំបាត់សំរាមចេញពីសហគមន៍ពួកគេ ។
សកម្មភាពសំអាតសំរាមដែលធ្វើឡើងនៅថ្ងៃទី១៥ តុលា មានមនុស្សប្រមាណ១០០នាក់ ភាគច្រើនជាសិស្សានុសិស្ស ព្រះសង្ឃ និងចាស់ព្រឹទ្ធចារ្យ ។ រូបភាពនេះធ្វើឱ្យលោកស៊ា សុផល រីករាយ និងមានកម្លាំងចិត្តក្នុងការជួយសហគមន៍នេះកាន់តែខ្លាំងឡើង ។ លោកទូច សុផុន មេឃុំកំពង់ឃ្លាំងដែលចូលរួមយ៉ាងសកម្មក្នុងពិធីសំអាតបរិស្ថានបឹងទន្លេសាបនៅថ្ងៃនោះ បានឱ្យដឹងថា កន្លងមកឃុំក៏ធ្លាប់បានរៀបចំកម្មវិធីសម្អាតបានច្រើនលើកដែរ ហើយតែងមានសិស្សានុសិស្សជាច្រើនចូលរួម ។
បញ្ហាចោទសម្រាប់កំពង់ឃ្លាំង គឺពលរដ្ឋក្នុងសហគមន៍នេះមិនទាន់យល់ដឹងពីផលប៉ះពាល់សំរាមតែម្ដង ធ្វើឱ្យពួកគេទុកដាក់កាកសំណល់ផ្សេងៗមិនបានត្រឹមត្រូវ ។ លោកកន្លងមកលោកធ្លាប់ចុះអប់រំច្រើនដែរទាក់ទងនឹងសំរាម ហើយលោកសង្ឃឹមថា ពលរដ្ឋនឹងយល់ពីបញ្ហាទាំងនេះ ក្រោមគម្រោងសំអាតបឹងទន្លេសាប ដែលមានអង្គការចុះជួយជាបន្ដបន្ទាប់ ។ លោក ទូច សុផុន ជឿជាក់ថា ភ្ញៀវទេសចរអាចនឹងទៅទស្សនាភូមិលិចទឹកកំពង់ឃ្លាំង កាន់តែច្រើន ប្រសិនបើតំបន់នេះលែងមានសំរាមតទៅទៀត ៕
ចែករំលែកព័តមាននេះ