រាជធានីភ្នំពេញ ៖ នៅព្រឹកថ្ងៃទី១៦ តុលានេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាអនុញ្ញាតឲ្យប្រតិភូសមាគមនាវាយុវជនអាស៊ីអាគ្នេយ៍កម្ពុជាចូលជួបសម្តែងការគួរសម និងស្តាប់ដំបូន្មាន ។
ក្រុមយុវជនដឹកនាំដោយលោកស្រ៊ាន គឹមលី ប្រធានប្រតិភូ និងជាប្រធានសមាគមនាវាយុវជនអាស៊ីអាគ្នេយ៍កម្ពុជាដែលនឹងទៅចូលរួមកម្មវិធីនាវាយុវជនអាស៊ីអាគ្នេយ៍ និងជប៉ុនលើកទី៤៥ នៅប្រទេសជប៉ុននាថ្ងៃទី២២ ខែតុលាខាងមុខនេះ ។ ជំនួបរវាងសម្តេចប្រមុខរាជរដ្ឋាភិបាលនឹងប្រតិភូសមាគមនាវាយុវជនអាស៊ីអាគ្នេយ៍ធ្វើឡើងនៅវិមានសន្តិភាព ។ ជំនួបនេះផងដែរបន្ទាប់ពីក្រុមយុវជននេះបានជួបថ្នាក់ដឹកនាំរដ្ឋសភា ព្រឹទ្ធសភា និងបណ្តាក្រសួងស្ថាប័ននានាដើម្បីទទួលយកដំបូន្មានល្អក្នុងការចែករំលែកបងពិសោធន៍ក៏ដូចជា ដំណេះដឹង ដើម្បីទៅផ្សាយដល់បណ្តាប្រទេសផ្សេងៗដែលខ្លួនបានសំចត ។
ក្នុងជំនួបជាមួយថ្នាក់ដឹកនាំរដ្ឋសភា ព្រឹទ្ធសភា និងថ្នាក់ដឹកនាំក្រសួងនានាក្រុមយុវជនអាស៊ីអាគ្នេយ៍កម្ពុជាបានលើកឡើងថា គណៈប្រតិភូយុវជនទាំងអស់ក្នុងការខិតខំរៀនសូត្រ និង ការរឹតចំណងមិត្តភាពចែករំលែកនូវវប្បធម៌នៃប្រទេសនីមួយៗក្នុងការជួយដល់សង្គមជាតិ ។ ក្នុងរយៈពេល៥២ថ្ងៃនេះកម្មវិធីនាវាយុវជនអាស៊ីអាគ្នេយ៍ដែលមានយុវជនមកពីប្រទេសក្នុងអាស៊ានរួមនឹងប្រទេសជប៉ុនដែលជាអ្នកបង្កើតកម្មវិធីនេះ និងធ្វើដំណើរតាមនាវាពីប្រទេសជប៉ុន ឆ្លងកាត់ប្រទេសប្រ៊ុយណេ ហ្វីលីពីន ថៃ និងប្រទេសវៀតណាម ។
សូមបញ្ជាក់ថា កម្មវិធីនាវាយុវជនអាស៊ីអាគ្នេយ៍-ជប៉ុន បង្កើតឡើងដោយប្រទេសជប៉ុន គឺនៅឆ្នាំ១៩៧៤ ។ ចំណែកសមាគមនាវាយុវជនអាស៊ីអាគ្នេយ៍កម្ពុជាបង្កើតឡើងនៅឆ្នាំ២០០៤ ដែលរហូតមកដល់ពេលនេះមានយុវជនកម្ពុជាចំនួន៥៦០នាក់ ហើយបានចូលរួមជាមួយកម្មវិធីនាវាយុវជនអាស៊ីអាគ្នេយ៍ជប៉ុននេះ ៕
ចែករំលែកព័តមាននេះ