ខេត្តសៀមរាប ៖ រ៉ឺម៉កកង់បីរបស់ខ្មែរទូទាំងខេត្តសៀមរាបមានចំនួនជាង១ពាន់គ្រឿង កំពុងព្រួយបារម្ភពីការរកចំណូល ខណៈកង់បីឥណ្ឌាកំពុងវាយលុកនៅខេត្តសៀមរាបកើនឡើងប្រមាណជាង៥០០គ្រឿងព្រោះកន្លងមកមិនធ្លាប់មាននៅលើទឹកដីប្រវត្តិសាស្ត្រនៃខេត្តនេះទេ ទើបតែចូលមកវិនិយោគប្រហែលប៉ុន្មានឆ្នាំនេះ ធ្វើឱ្យអ្នករត់ម៉ូតូកង់បីខ្មែរចង់នាំគ្នាធ្វើបាតុកម្មម្តងៗផងដែរ ។
បើតាមការរៀបរាប់របស់លោក រិទ្ធ ដែលរស់នៅក្នុងសង្កាត់ស្លក្រាម ក្រុងសៀមរាបបានប្រាប់ថា កាលពីមុនលោកប្រើកង់បីខ្មែរដល់ប្តូរមកទិញកង់បីឥណ្ឌាវិញវាស្រួលរកលុយជាងកង់បីខ្មែរព្រោះគ្រាន់តែភ្ញៀវផ្ញើសារមកតាម Pass App Tasi លឿនទាន់ចិត្ត និងជាការពេញនិយមរបស់អតិថិជននាពេលបច្ចុប្បន្នក៏ទៅដល់គោលដៅតែម្តង ។ បើភ្ញៀវជិះប៉ុន្មាននាក់ទៅទីណាក៏ដោយក៏គិតតែ១គីឡូម៉ែត្រតម្លៃត្រឹមតែ១២០០រៀលប៉ុណ្ណោះ មិនដូចកង់បីរបស់ខ្មែរទេ ហើយណាមួយវាប្រើហ្គាស់ទៀត ដូច្នេះវាស្រួលរកលុយជាងកង់បីខ្មែរ ។ លោករៀបរាប់បន្តថា កាលនៅប្រើកង់បីខ្មែរក្នុង១ថ្ងៃរកបានយ៉ាងតិច៣ទៅ៥ម៉ឺនរៀលក្នុង១ថ្ងៃដល់មកទិញប្រើកង់បីឥណ្ឌាវិញរកបានក្នុង១ថ្ងៃឈានដល់ជាង១០ម៉ឺនរៀល ហើយគ្មានតថ្លៃដូចកង់បីខ្មែរទេ ព្រោះវាមើលឃើញទាំងអស់គ្នាមិនអាចកោរអ្នកជិះបានទេ។
ចំណែកលោក សិទ្ធ ដែលមានស្រុកកំណើតនៅខេត្តព្រៃវែងវិញ ហើយគាត់បានមកស្នាក់នៅជួលផ្ទះគេក្នុងសង្កាត់ស្វាយដង្គំ ក្រុងសៀមរាបដែលប្រើកង់បីខ្មែរប្រចាំនៅម្តុំផប់ស្ទ្រីតបានរៀបរាប់ប្រាប់កោះសន្តិភាពនៅរសៀលថ្ងៃទី៥ ខែតុលា ឆ្នាំ២០១៨នេះថា លោកបានប្រើកង់បីខ្មែរនេះអស់រយៈពេលជិត៣ឆ្នាំមកហើយមិនដែលពិបាកដូចសព្វថ្ងៃនេះទេ ព្រោះកាលពីមុនធ្លាប់រកចំណូលក្នុង១ថ្ងៃពី៥ទៅ៩ម៉ឺនរៀលមិនដែលមាននរណាម្នាក់តថ្លៃទេ ឥឡូវមហាតថ្លៃ ហើយរកតែ៥ម៉ឺនរៀលចូលផ្ទះសឹងមិនបានដូចអូសប្ញស្សីច្រាស់ចុងអញ្ចឹង ព្រោះទៅដល់កន្លែងណាឃើញសុទ្ធតែកង់បីឥណ្ឌាសឹងទាំងអស់ ។
លោកបានរៀបរាប់បន្តថា សព្វថ្ងៃនេះសូម្បីតែភ្ញៀវបរទេសក៏ចេះតថ្លៃដែរកុំថា តែភ្ញៀវខ្មែរយើងមានអ្នកខ្លះ បានចេញទៅដឹកភ្ញៀវអ្នកខ្លះនៅដេកលើម៉ូតូចាំភ្ញៀវអផ្សុកក៏នាំគ្នាចុចទូរស័ព្ទលេងក៏មាន ។ លោកបានបញ្ជាក់បន្ថែមថា បើរត់នៅក្នុងក្រុងភ្ញៀវជិះម្នាក់ឬ៤នាក់ទៅតាមទីជិត ឬឆ្ងាយ ។ បើចេញពីផ្សារចាស់ទៅបេនឡាន យើងយក១៥០០០រៀល ប៉ុន្តែអ្នកជិះឱ្យតែ១ម៉ឺនរៀលក៏ខ្ញុំទៅដែរ បើយើងមិនទៅមានគេទៅដូច្នេះបានន័យថា ទីផ្សារនៅក្នុងក្រុងសៀមរាបមានការប្រកួតប្រជែងគ្នាព្រោះ គ្មានកំណត់ចែកវេនគ្នាទេ ។
ប៉ុន្តែបើភ្ញៀវខ្មែរជិះអង្គរយើងទា៣០០០០រៀល អ្នកខ្លះឱ្យអ្នកខ្លះតថ្លៃបានត្រឹមតែ២០០០០រៀល។ ចំពោះភ្ញៀវបរទេសវិញយើងអាចទាបានចាប់ពី១០ទៅ១៥ដុល្លារព្រោះវាមិនមែនជិះតែត្រឹមអង្គរតូចទេ គឺពួកគាត់ជិះទៅដល់វង់តូចទៀត ហើយយើងនៅអង្គុយរង់ចាំនៅលើឬ ម៉ូតូមិនអាចទៅរកម៉ូយបានទៀតទេ ។
សូមបញ្ជាក់ផងដែរថា វត្តមានកង់បីឥណ្ឌាបានចូលវាយលុកមកក្នុងទីផ្សារប្រទេសកម្ពុជាជាង៥០០គ្រឿង ក្នុងរយៈពេលចុងក្រោយនេះមានសន្ទុះកើនឡើងគួរឱ្យកត់សម្គាល់ ហើយកង់បីខ្មែរគិតត្រឹមឆ្នាំ២០១៨ មានចំនួនជាង១ពាន់គ្រឿង។ ករណីនេះបានធ្វើឱ្យអ្នករត់កង់បីខ្មែរបោះបង់ចោលកង់បីចាស់ដែលធ្លាប់ប្រើប្រាស់អស់រយៈពេលជាច្រើនឆ្នាំមួយចំនួនបាននាំគ្នាមកទិញកង់បីឥណ្ឌាដែលប្រើបច្ចេកវិទ្យាទំនើបដូចជា ប្រើហ្គាស់ និង Pass App Tasi លឿនទាន់ចិត្ត និងជាការពេញនិយមរបស់អតិថិជននាពេលបច្ចុប្បន្ន ។
ជុំវិញមជ្ឈដ្ឋាននានាក្នុងខេត្តសៀមរាបបាននាំគ្នានិយាយថា ជាមួយនឹងការសម្រុកទិញកង់បីឥណ្ឌានាពេលនេះធ្វើជាមធ្យោបាយដឹកជញ្ជូនបានបង្កើតទីផ្សារប្រកួតប្រជែងកាន់តែខ្លាំងឡើងសម្រាប់មធ្យោបាយដឹកជញ្ជូនទៅថ្ងៃខាងមុខ ។ ព្រោះថា កង់បីឥណ្ឌាកាន់តែកើនឡើងពីមួយថ្ងៃទៅមួយថ្ងៃគួរឱ្យកត់សម្គាល់ដែលធ្វើឱ្យចំណូលពីរបរនេះថមថយជាងពេលមុនជាងពាក់កណ្ដាលឯណោះ ។
ប្រជាពលនៅក្នុងក្រុងសៀមរាបបាននាំគ្នារអ៊ូរថា បើកង់បីឥណ្ឌានាំចូលមកមិនឈប់ឈរបែបនេះធ្វើឱ្យប៉ះពាល់សតិអារម្មណ៍ដល់អ្នករត់កង់បីខ្មែរ រកចំណូលទទួលទានមិនបានផងថែមទាំងខ្ចីលុយពីអង្គការមកទិញកង់បី ដើម្បីរត់សងគេ ប៉ុន្តែឥឡូវបែរជាខកបំណង ហើយមួយចំនួនដែលគ្នាបានទិញកង់បីឥណ្ឌាវិញបារម្ភពីទីផ្សារកង់បីឥណ្ឌាទៅថ្ងៃមុខអាចជួបនឹងបញ្ហាទីផ្សារដូចកង់បីខ្មែរដែរ ឬយ៉ាងណា? ៕
ចែករំលែកព័តមាននេះ