រាជធានីភ្នំពេញ ៖ លោក ម៉ារ៉ា ប៊ុណ្ណា ជាតារាចម្រៀងផង សម្តែងផង ដែលមានការចេញថតសមរម្យដែរ តាមផលិតកម្មភាពយន្តផ្សេងៗ ប៉ុន្តែគេស្ទើរស្មានមិនដល់ពេលដឹងថា លោកជួបបញ្ហាក្នុងចិត្តដោយជីវភាពខ្វះខាតប្រឈមខ្លាំង ដោយទ្រាំការទប់ទល់មិនបាន ទើបលោកទម្លាយឲ្យគេដឹង ដើម្បីឲ្យធូរក្នុងចិត្ត។
តារាចម្រៀងលោក ម៉ារ៉ា ប៊ុណ្ណា បានបង្ហាញអារម្មណ៍តូចចិត្តយ៉ាងខ្លាំង បន្ទាប់ពីរថយន្តទីកូ ដែលលោកអះអាងថា សន្សំលុយទិញផង ខ្ចីគេបង្គ្រប់ទិញផងទាំងលំបាក ប៉ុន្តែក្រោយពេលរថយន្តនេះខូចខ្ទេចខ្ទី ព្រោះតែបុព្វហេតុមួយ បែរជាគ្មានអ្នកជួយគិតគូរដល់លោកទាល់តែសោះ។ លោកថា រាល់ថ្ងៃក្រោយពីអស់រថយន្តទីកូដែលជាយានប្រចាំថ្ងៃ សូម្បីតែម៉ូតូក៏គ្មានជិះដែរ ដោយចង់ទៅណាមកណាបានត្រឹមតែពឹងមិត្តភក្តិ និងហៅតុកតុកគិតគីឡូ។
លោក ម៉ារ៉ា ប៊ុណ្ណា និយាយបន្តថា រថយន្តទីកូដែលអ្នកណាក៏បង្អាប់ថា មិនសមនឹងជិះសម្រាប់រូបលោកជាអ្នកសិល្បៈនោះ លោកអាចទិញវាបានដោយការលំបាកយ៉ាងខ្លាំង ប៉ុន្តែទើបតែទិញ ទើបតែជិះ និងទើបតែបានកាត់តឱ្យប្លែក ដើម្បីត្រៀមថត MV ផង ស្រាប់តែលោកក៏ជួបគ្រោះថ្នាក់ក្នុងពេលដែលលោកធ្វើដំណើរពីខេត្ត ហើយមានបញ្ហារឿងអត់ងងុយនឹងការហែបក្សខ្លាំងពេក។
លោកថា គ្រោះថ្នាក់នៅក្នុងពេលនោះ បើលោកស្រវឹងដូចគេចោទមែន ប្រហែលជាស្លាប់បានបាត់ហើយ អ៊ីចឹងហើយទើបលោកកាន់តែសម្ដែងការអន់ចិត្តនៅពេលរថយន្តដែលមានតម្លៃថោក តែថ្លៃសម្រាប់លោក ត្រូវខ្ទេចមិនខុសពីសល់តែខ្មោចឡាន ស្រាប់តែមិត្តភក្តិ និងក្រុមការងារហែបក្សដែលលោកចុះជួយមិនបានឈឺឆ្អាល សូម្បីតែខលសួរសុខទុក្ខ។
លោកថា មិនចង់បានអ្វីពីគ្រោះថ្នាក់នេះទេ ប៉ុន្តែហោចណាស់ក៏បានដឹងថា រូបលោកអត់ងងុយ ហើយភ្លាត់រេចង្កូតជួបគ្រោះថ្នាក់ ដែលគួរតែចែករំលែកការយកចិត្តទុក្ខដាក់ឱ្យសមនឹងការលះបង់របស់លោកនៅក្នុងពេលនោះផងដែរ។
លោកនិយាយទៀតថា «ខ្ញុំរាល់ថ្ងៃមិនលាក់ទេ គឺអត់រថយន្តទីកូនឹងមួយ គឺអស់ម្ម៉ង ដោយសារតែឡានហ្នឹងខ្ញុំទិញយកមកទុកជិះផង និងទុកថត MV ផង ប៉ុន្តែមិនទាន់បានថតផង ក៏មានគ្រោះថ្នាក់ក្រោយពីត្រលប់ពីហែបក្ស ដែលធ្វើឱ្យលោកបង្ខំចិត្តលក់អេតចាយ ខណៈដែលលុយដែលយកមកទិញក៏ជំពាក់គេមិនទាន់សងអស់!»។
លោក ម៉ារ៉ា ប៊ុណ្ណា បានអះអាងថា ស្ថានភាពរបស់លោកនៅក្នុងពេលនេះ បើគ្មានមិត្តភក្តិទៅទទួលឱ្យទៅណា គឺមានតែហៅ PassApp ប៉ុណ្ណោះ ដោយលោកបានតាំងចិត្តទុកថា គ្រោះថ្នាក់ដែលបានកើតឡើង គឺដោយសារតែលោកសកម្មខ្លាំងពេកនៅក្នុងពេលនោះ ដោយសុខចិត្តទៅជួយធ្វើយុទ្ធនាការដល់ខេត្តឆ្ងាយៗ ហើយមិនបានសម្រាកគ្រប់គ្រាន់។
លោកបញ្ជាក់ថា ថ្ងៃរថយន្តមានគ្រោះថ្នាក់នោះ បើលោកស្រវឹងដូចការចោទប្រកាន់ គឺប្រហែលជាស្លាប់បាត់ហើយ។ លោក ម៉ារ៉ា ប៊ុណ្ណា បានថ្លែងទាំងតូចចិត្តថា គឺជារឿងលំបាកយ៉ាងណាស់ ដែលលោកសឹងតែមិនមានទីផ្សារសិល្បៈ ហើយត្រូវខ្ទេចរថយន្តទាំងស្រុង ក្នុងពេលលុយកាក់ដែលយកមកទិញក៏មានទាន់សងគេអស់៕
ចែករំលែកព័តមាននេះ