រាជធានីភ្នំពេញ ៖ ក្រសួងអប់រំ យុវជន និងកីឡា បានព្រមានចាត់វិធានការតាមផ្លូវច្បាប់ ចំពោះជនទាំងឡាយណាដែលទទួលសំណូក និងអ្នកសូក ដើម្បីប្រឡងជាប់ចូលក្របខណ្ឌក្រសួងអប់រំនៅពេលខាងមុខនេះ ។…
រាជធានីភ្នំពេញ ៖ ក្រសួងអប់រំ យុវជន និងកីឡា បានព្រមានចាត់វិធានការតាមផ្លូវច្បាប់ ចំពោះជនទាំងឡាយណាដែលទទួលសំណូក និងអ្នកសូក ដើម្បីប្រឡងជាប់ចូលក្របខណ្ឌក្រសួងអប់រំនៅពេលខាងមុខនេះ ។
ការព្រមាននេះ ខណៈដែលក្រសួងបានប្រកាសជ្រើសរើសគ្រូគ្រប់កម្រិតរាប់ពាន់នាក់នៅពេលខាងមុខនេះ ។ ជាងនេះទៀត បន្ទាប់ពីមានជនខិលខូចមួយចំនួនបានដើរប្រាប់ធានាថា សន្យាជួយដល់បេក្ខជនឲ្យជាប់ក្នុងការប្រឡងគ្រូបង្រៀន ។
យោងតាមសេចក្តីប្រកាសព័ត៌មានរបស់ក្រសួងអប់រំ យុវជន និងកីឡា ចេញផ្សាយនៅថ្ងៃទី២ ខែតុលា បានឲ្យដឹងថា កាលពីពេលថ្មីៗនេះ មានការលេចឮព័ត៌មានថាមានករណីបុគ្គលមួយចំនួន បានដើរសន្យាជួយដល់បេក្ខជនប្រឡងជ្រើសរើសចូលបម្រើជាគ្រូបង្រៀនគ្រប់កម្រិត ឲ្យបានប្រឡងជាប់ដោយថ្នូរនឹងថវិកាមួយចំនួន ។
ក្រសួងអប់រំ យុវជន និងកីឡា បញ្ជាក់យ៉ាងដាច់អហង្ការថា ដំណើរការប្រឡងជ្រើសរើសគ្រូគ្រប់កម្រិត នឹងប្រព្រឹត្តទៅដោយគោរពតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន ។
ក្រសួងក៏បានអំពាវនាវដល់មាតាបិតា អាណាព្យាបាល និងបេក្ខជនទាំងអស់ កុំចាញ់បោកពាក្យភូតកុហករបស់ជនឆ្លៀតឱកាសណាមួយដែលនាំឲ្យចាត់បង់ថវិកា និងទ្រព្យសម្បត្តិ ជាអសារបង់ និងសូមអំពាវនាវដល់បេក្ខជនទាំងអស់ ខិតខំបញ្ចេញសមត្ថភាពនិងគោរពបទប្បញ្ញតិ្តនានាក្នុងដំណើរការប្រឡងជ្រើសរើស ។ សេចក្តីប្រកាសព័ត៌មានបន្តថា «ដើម្បីឈានទៅទប់ស្កាត់នូវបាតុភាពមិនប្រក្រតី និងចាត់វិធានការទាន់ពេលវេលាចំពោះជនឆ្លៀតឱកាសណាមួយនោះ ក្រសួងស្នើសុំកិច្ចសហការពីមាតាបិតា អាណាព្យាបាល បេក្ខជននិងសាធារណជនទាំងអស់ មេត្តាជួយផ្តល់ព័ត៌មាននិងអត្តសញ្ញាណជនប្រព្រឹត្តកំហុសទាំងនោះ មកក្រសួងតាមគ្រប់មធ្យោបាយ ដោយក្រសួងសូមធានារក្សានូវការសម្ងាត់ក្នុងការផ្តល់ព័ត៌មាន» ។ក្រសួងអប់រំ នឹងចាត់វិធានការយ៉ាងម៉ឺងម៉ាត់ ចំពោះជនទាំងឡាយណា ដែលបានប្រព្រឹត្តនូវអំពើខុសច្បាប់ខាងលើឲ្យមកទទួលទោសតាមច្បាប់ជាធរមាន ។
សូមជម្រាបថា កន្លងមកក៏មានពាក្យលេចឮថា មានការសន្យាដើម្បីឲ្យបេក្ខជនជាប់ក្នុងការប្រឡងជាគ្រូបង្រៀនគ្រប់កម្រិតផងដែរ ហើយជនខិលខូចបានបិទបាំងយ៉ាងជិតបំផុត ។ ទោះជាយ៉ាងណាក្តី ពាក្យលេចឮនោះមិនអាចជាការពិតទាំងស្រុងនោះទេ ព្រោះថាបើបេក្ខជនមិនមានសមត្ថភាពឬចេះទេ មិនអាចប្រឡងជាប់ឡើយ ៕
ចែករំលែកព័តមាននេះ