រាជធានីភ្នំពេញ ៖ ទទួលស្គាល់ការពិត ហើយសម្រាប់អតីតគណបក្សសង្គ្រោះជាតិ ដែលជាបក្សប្រឆាំងបានអះអាងខ្លួនបំភ្លៃស្ថានការណ៍ ដើម្បីចង់ឲ្យមានការផ្លាស់ប្តូរ ។ នេះបើតាមអតីតនាំពាក្យគណបក្សនេះ ។
លោកយ៉ែម ប៉ុញ្ញាឬទ្ធិ អតីតអ្នកនាំពាក្យគណបក្សសង្គ្រោះជាតិបានបញ្ជាក់លើបណ្តាញសង្គមហ្វេសប៊ុកយ៉ាងដូច្នេះថា ៖«បំភ្លៃស្ថានការណ៍ ដើម្បីបង្វែរគោលដៅគោលបំណងរបស់យើង ដែលតែងតែចង់បាននូវការផ្លាស់ប្ដូរជាវិជ្ជមាន» ។ លោកបានបន្តថា ប្រជារាស្ត្រខ្មែរដែលបានតាមដានស្ថានការណ៍ស្រុកទេសយើងបានចូលរួម និងទទួលបានព័ត៌មានពិតពីសង្គមសេដ្ឋកិច្ចនយោបាយប្រាកដជាយល់ថាវាអយុត្តិធម៌ណាស់ ដែលគណបក្សកាន់អំណាចបានធ្វើមកលើគណបក្សសង្គ្រោះជាតិ ជាពិសេសការបំផ្លាញប្រជាធិបតេយ្យ និងការរំលោភសិទ្ធិមនុស្សនៅកម្ពុជានោះ ។
លោកបន្ថែមថា «កម្ពុជាជារបស់យើងទាំងអស់គ្នាពុំមែនជារបស់បុគ្គលណាមួយ ឬក្រុមគ្រួសារណាមួយ ឬបក្សណាមួយនោះទេ ។ ការចូលរួមរបស់កូនខ្មែរគ្រប់រូបដោយកម្លាំងចិត្តដោយការលះបង់គ្រប់យ៉ាង ដោយការទទួលខុសត្រូវគ្មានការបង្ខិតបង្ខំគ្មានការជួលទិញដូរ គឺពិតជាកម្លាំងមួយដ៏ខ្លាំងក្លារឹងមាំសម្រាប់ប្រជាជាតិខ្មែរយើង» ។
សូមជម្រាប កាលពីពេលគណបក្សប្រឆាំងមិនទាន់ត្រូវបានតុលាការរំលាយចុងឆ្នាំ២០១៧កន្លងមកនេះ គណបក្សនេះបានធ្វើនយោបាយដោយនាំមកនូវការផ្លាស់ប្តូរដោយវិជ្ជាមាន ។ បក្សប្រឆាំងបានរិះគន់ចំៗទៅលើកគោលនយោបាយកាន់អំណាចពាក់ព័ន្ធនឹងព្រៃឈើ អំពើពុករលួយ បក្សពួកជាដើម ។ នៅក្នុងពិធីសំណេះសំណាលជាមួយពលរដ្ឋនៅសហរដ្ឋអាមេរិក សម្តេចតេជោ ហ៊ុន សែន បានប្រកាសទទួលស្គាល់ការរិះគន់របស់ក្រុមប្រឆាំង ប៉ុន្តែសម្តេចថា ក្នុងការដឹកនាំមិនមានត្រូវទាំងអស់នោះទេ ៕
ចែករំលែកព័តមាននេះ