ខេត្តព្រៃវែង ៖ ហេតុការណ៍ភ្ញាក់ផ្អើល១បានធ្វើឲ្យប្រជាពលរដ្ឋ និងក្រុមអ្នកដំណើរនាំគ្នាចោមរោមមើលយ៉ាងកកកុញ ចុងក្រោយទើបដឹងថា ជាទំនាស់រឿងស្នេហាត្រីកោណដែលបុរសជាប្តីបានលួចទៅមានប្រពន្ធទី២ ហើយត្រូវប្រពន្ធដឹងហៅមកលែងលះគ្នានៅស្រុកកំណើត តែពេលឆ្លងផុតស្ពានអ្នកលឿង បុរសជាប្តីបានបើករថយន្តបំបុករបាំងដែកអមសងខាងផ្លូវ ធ្វើឲ្យភ្ញាក់ផ្អើលដល់អ្នកស្រុកតែម្តង…
ខេត្តព្រៃវែង ៖ ហេតុការណ៍ភ្ញាក់ផ្អើល១បានធ្វើឲ្យប្រជាពលរដ្ឋ និងក្រុមអ្នកដំណើរនាំគ្នាចោមរោមមើលយ៉ាងកកកុញ ចុងក្រោយទើបដឹងថា ជាទំនាស់រឿងស្នេហាត្រីកោណដែលបុរសជាប្តីបានលួចទៅមានប្រពន្ធទី២ ហើយត្រូវប្រពន្ធដឹងហៅមកលែងលះគ្នានៅស្រុកកំណើត តែពេលឆ្លងផុតស្ពានអ្នកលឿង បុរសជាប្តីបានបើករថយន្តបំបុករបាំងដែកអមសងខាងផ្លូវ ធ្វើឲ្យភ្ញាក់ផ្អើលដល់អ្នកស្រុកតែម្តង ។
ហេតុការណ៍នេះបានកើតឡើងកាលពីវេលាម៉ោង៤និង៣០នាទីរសៀលថ្ងៃទី១ តុលានេះ នៅលើកំណាត់ផ្លូវជាតិលេខ១ ត្រង់ចំណុចខាងលិចស្ថានីយថ្លឹងទំងន់អ្នកលឿង ដែលស្ថិតក្នុងភូមិ១ ឃុំព្រែកខ្សាយ(ខ) ស្រុកពាមរក៍ ខេត្តព្រៃវែង ។
ប្រភពព័ត៌មានពីមន្ត្រីអាវុធហត្ថស្រុកពាមរក៍បានឲ្យដឹងថា រថយន្តដែលបើកបំបុករបាំងដែកអមសងខាងផ្លូវនៃម៉ាកហាយព្រីត ពណ៌ទឹកមាស ពាក់ស្លាកលេខភ្នំពេញ ២R -១៦៧០ បើកបរដោយបុរសម្នាក់ឈ្មោះ ហ៊ាង សុហេង អាយុ៣៧ឆ្នាំ មុខរបរជាវិស្វករ និងរួមដំណើរដោយស្ត្រីម្នាក់ជាប្រពន្ធឈ្មោះ ភីម សុភ័ណ្ឌ អាយុ៣៣ឆ្នាំ អ្នកទាំង២មានទីលំនៅក្នុងបុរីពិភពថ្មី ខណ្ឌពោធិ៍សែនជ័យ រាជធានីភ្នំពេញ ។ ប្រភពដដែលបានបន្តទៀតថា យោងតាមចម្លើយរបស់ស្ត្រីជាប្រពន្ធបានអះអាងថា រូបនាង និងប្តីបានរៀបការជាមួយគ្នាជិត៧ឆ្នាំហើយ តែមិនមានកូននឹងគ្នា តែក៏មិនដែលឈ្លោះប្រកែកគ្នាដែរ ។ ប៉ុន្តែថ្មីៗនេះនាងបានតាមដានដឹងថា ប្តីលួចទៅមានស្រីកំណាន់ម្នាក់ទៀត ហើយនាងបានប្រាប់ឲ្យប្តីផ្តាច់ទំនាក់ទំនងពីស្រីនោះ តែប្តីមិនព្រមបែរជាសុំនាងយកទាំង២ទើបធ្វើឲ្យនាងខឹង និងឈឺចាប់ខ្លាំង ក៏ហៅប្តីឲ្យបើកឡានជូនមកស្រុកកំណើត នៅផ្សារកំពង់សឹង្ហ ស្រុកព្រះស្តេច ដើម្បីលែងលះគ្នា ។
ស្ត្រីរូបនេះបានបន្តថា ពេលចេញពីភ្នំពេញមកអ្នកទាំង២មិនបានឈ្លោះគ្នាទេ តែពេលឆ្លងស្ពានអ្នកលឿងផុតនាងនឹកឃើញប្តីប្រពន្ធស្រឡាញ់គ្នារៀបការរួមរស់ជាមួយគ្នាជិត៧ឆ្នាំ បែរជាមកត្រូវលែងលះគ្នាបែបនេះ គិតចុះគិតឡើងឈឺចិត្តពេកនាងក៏យកខ្នើយក្នុងឡានមកខ្ទប់មុខយំ ស្រាប់តែលឺសំឡេងបុកគ្រាំង ពេលដកខ្នើយចេញ ក៏ឃើញឡានបុករបាំងដែកបាត់ទៅហើយ ទើបនាងស្រវាសោឡានកាច់ពន្លត់ ហើយក៏ត្រូវប្តីនាងដណ្តើមយកវិញ និងចាប់នាងអូសចេញពីឡាន រួចបើកឡានត្រឡប់ទៅភ្នំពេញវិញបាត់ទុកនាងឲ្យនៅលើថ្នល់កន្លែងកើតហេតុតែម្នាក់ឯង ក្រោមក្រសែភ្នែកអ្នកស្រុកចោមរោមមើលរាប់រយនាក់ ។
ដោយឡែកនគរបាលចរាចរណ៍ស្រុកពាមរក៍បានឲ្យដឹងថា គ្រោះថ្នាក់ចរាចរណ៍នេះមិនបានបណ្តាលឲ្យមានគ្រោះថ្នាក់ដល់នរណាម្នាក់ទេ ក្រៅតែពីធ្វើឲ្យខូចរបាំងដែកអមសងខាងផ្លូវ អស់២ផ្ទាំង តែទោះជាយ៉ាងណាស្ត្រីខាងលើបានសន្យាធ្វើការជួសជុលសងវិញទាំងអស់ ៕
ចែករំលែកព័តមាននេះ