ខេត្តប៉ៃលិន ៖ កសិករម្នាក់នៅភូមិតាង៉ែនលើ សង្កាត់ប៉ៃលិន ក្រុងប៉ៃលិន បានរៀនបច្ចេកទេសផលិតស្រាមួយប្រភេទពីផ្លែតាង៉ែនហៅមៀនប៉ៃលិន ហើយជាលទ្ធផល កំពុងទទួលបានការគាំទ្រពីអតិថិជនទូទាំងខេត្ត និងរហូតដល់រាជធានីភ្នំពេញផងដែរ ហើយបច្ចុប្បន្ននេះ…
ខេត្តប៉ៃលិន ៖ កសិករម្នាក់នៅភូមិតាង៉ែនលើ សង្កាត់ប៉ៃលិន ក្រុងប៉ៃលិន បានរៀនបច្ចេកទេសផលិតស្រាមួយប្រភេទពីផ្លែតាង៉ែនហៅមៀនប៉ៃលិន ហើយជាលទ្ធផល កំពុងទទួលបានការគាំទ្រពីអតិថិជនទូទាំងខេត្ត និងរហូតដល់រាជធានីភ្នំពេញផងដែរ ហើយបច្ចុប្បន្ននេះ ផលិតផលមួយនេះត្រូវបានទទួលស្គាល់ពីមន្ទីរ និងក្រសួងសិប្បកម្ម និងឧស្សាហកម្មទៀតផង ។
លោក វួច ធុច អ្នកផលិតស្រាមៀនប៉ៃលិនបានឲ្យដឹងថា លោកបានរៀនបច្ចេកទេសផលិតស្រាបៀរពីជនជាតិស្កតឡែនម្នាក់ ខណៈដែលអ្នកជំនាញរូបនោះមកកាន់ខេត្តប៉ៃលិន ដើម្បីបង្រៀនរបៀបផលិតស្រាទំពាំងបាយជូរ និងស្រាផាសិន ដល់សមគន៍កសិកម្មផ្លែមៀនប៉ៃលិន ។ លោកបន្ដថា ក្រោយពេលចេះចប់ត្រឡប់មកផ្ទះវិញ លោកក៏សាកល្បងផលិតស្រា ដោយយកផ្លែតាង៉ែនចំនួន២០គីឡូក្រាម ដាក់ទឹក១០លីត្រ លាយជាមួយនឹងដំបែ រួចផ្អាប់រយៈពេល៦ខែ ក៏ចម្រោះចេញជាស្រា ហើយដាក់ឱ្យបងប្អូនប្រជាពលរដ្ឋនៅក្នុងភូមិទទួលទានសាកល្បង ស្រាប់តែពួកគាត់ប្រាប់ថា មានរសជាតិផ្អែមឈ្ងុយ មិនពិបាកផឹក អាចទទួលយកបាន ។ ដោយសារតែមានការគាំទ្រ ក្រោយមកលោកក៏បានផលិតចំនួន១០០ដបទៀត ហើយបង្ហោះនៅលើទំព័រហ្វេសប៊ុក ឃើញថាមានការចាប់អារម្មណ៍ខ្លាំងពីបងប្អូន និងធ្វើឲ្យកេរ្ដិ៍ឈ្មោះផលិតផលមួយនេះកាន់តែមានគេស្គាល់ ។
លោកបញ្ជាក់ថា ៖« ក្រោយមានការគាំទ្រខ្លាំង ក៏ឃើញខាងមន្ទីរឧស្សាហកម្ម និងសិប្បកម្ម បានចុះមកត្រួតពិនិត្យ រួចយកទៅពិនិត្យបន្តនៅក្រសួងទៀត ហើយជាលទ្ធផល ក្រសួងបញ្ជាក់ថា ស្រារបស់ខ្ញុំមិនប៉ះពាល់អ្វីដល់សុខភាពឡើយ ហើយថែមទាំងមានសារធាតុជួយសម្រួលដល់សរសៃឈាមក្នុងបេះដូង សម្រកខ្លាញ់ក្បាលពោះ ហូបបាយបាន សម្រានលក់ស្រួលថែមទៀត »។
អ្នកផលិតស្រារូបនេះលើកឡើងថា តាំងពីចាប់ផ្តើមផលិត និងចែកចាយមកដល់ពេលនេះ លោកលក់អស់ចំនួន១៥០ដបហើយ និងកំពុងបន្តផលិតថែមចំនួន១ពាន់ដបទៀត ដើម្បីដាក់លក់តាមហាងធំៗ និងតាមដេប៉ូចែកចាយមួយចំនួននៅទូទាំងខេត្តប៉ៃលិន ។
លោក វួច ធុច បញ្ជាក់ថា ៖« ដោយសារតែផលិតផលនេះមានការទទួលស្គាល់ពីមន្ទីរ និងក្រសួងជំនាញ ក៏ដូចជាការគាំទ្រពីបងប្អូន ពេលនេះយើងកំពុងតែប្រកាសរកដៃគូក្នុង និងក្រៅស្រុក ដើម្បីសហការគ្នាពង្រីកការផលិតឲ្យកាន់តែទំនើប ដើម្បីចែកចាយផងដែរ » ៕
ចែករំលែកព័តមាននេះ