រាជធានីភ្នំពេញ ៖ មនុស្សប្រុសស្រីចំនួន៨នាក់ ក្នុងនោះមានម្នាក់ជាអតីតសង្ឃ រួមទាំងកាំភ្លើងវែង២៨ដើម សុទ្ធតែថ្មីសន្លាង កាលពីព្រឹក ថ្ងៃទី៣០ កញ្ញា ត្រូវបានកម្លាំងសមត្ថកិច្ចនាយកដ្ឋាននគរបាលប្រឆាំងភេរវកម្ម និងឧក្រិដ្ឋកម្មឆ្លងដែន នាំខ្លួនទៅកាន់សាលាដំបូងរាជធានីភ្នំពេញធ្វើការសាកសួរ ដើម្បីចោទប្រកាន់ជាផ្លូវការ ។
ទាក់ទិននឹងការបញ្ជូនខ្លួនមនុស្ស៨នាក់ ទៅកាន់សាលាដំបូងរាជធានីនេះ ជារឿងក្តៅពុំុទាន់មានប្រភពព័ត៌មានពីស្ថាប័នណាមួយបញ្ជាក់ឲ្យបានច្បាស់លាស់ថា ជាករណីអ្វីនោះនៅឡើយទេ សូម្បីមន្ត្រីសមត្ថកិច្ចនៃនាយកដ្ឋាននគរបាលប្រឆាំងភេរវកម្ម និងឧក្រិដ្ឋកម្មដែលចាប់ខ្លួនមនុស្សទាំង៨នាក់ និងរកឃើញកាំភ្លើង២៨ដើមក៏ស្ងាត់ឈឹង បិទមាត់មិនហ៊ាននិយាយសូម្បីតែមួយម៉ាត់ ។
ទោះជាយ៉ាងនេះក្តី សំណុំរឿងមនុស្ស៨នាក់នោះ បានស្ថិតនៅដៃលោក អ៊ុំ សុភក្តិ ព្រះរាជអាជ្ញារងនៃអយ្យការអមសាលាដំបូងរាជធានីកំពុងធ្វើការសាកសួរ ទោះបីថ្ងៃអាទិត្យជាថ្ងៃសម្រាកការងារក្តី ព្រោះជារឿងក្តៅបំផុត ។ លោកព្រះរាជអាជ្ញារងកាន់សំណុំរឿងនេះ បានមានប្រសាសន៍ ប្រាប់កោះសន្តិភាពយ៉ាងខ្លីថា លោកកំពុងតែសួរ (រឿងភេរវកម្ម) ។
ការឃាត់មនុស្ស៨នាក់នេះពិតជាពាក់ព័ន្ធរឿងភេរវកម្មមែនហើយ ព្រោះពេលសមត្ថកិច្ចបញ្ជូនជនសង្ស័យទៅកាន់សាលាដំបូងរាជធានី បានសង្កេតឃើញប្រើប្រាស់រថយន្ត២គ្រឿង សុទ្ធតែពណ៌ខ្មៅ រថយន្ត១គ្រឿងឃ្លុបជិត បំពាក់ដោយសារ៉ែន និង១គ្រឿងប្រភេទ២បាំង ដឹកសម្ភារ ឬវត្ថុតាង ។ គេបានសង្កេតឃើញទៀតថា រថយន្តឃ្លុប១គ្រឿងនោះ គឺដឹកជនសង្ស័យទាំង៨នាក់ និងរថយន្ត២បាំង១គ្រឿង កន្ទុយខាងក្រោយដឹកកាំភ្លើង២៨ដើម ដែលជាវត្ថុតាងរឹបអូសពីជនសង្ស័យទាំង៨នាក់ ។
រថយន្តទាំង២គ្រឿង បានបើកចូលទៅក្នុងបរិវេណសាលាដំបូង ដោយមានការប្រុងប្រយ័ត្នខ្ពស់ ពីសំណាក់មន្ត្រីនគរបាលនាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន ។ នៅពេលរថយន្តទាំង២គ្រឿងចូលដល់ក្នុងអគារសាលាដំបូង ទ្វាររបងក៏ត្រូវបានបិទជិត ដោយឆ្មាំការពារតុលាការ ។
ប្រភពព័ត៌មានក្រៅផ្លូវការបានបង្ហើបឲ្យដឹងថា ២ទៅ៣ថ្ងៃមុននេះកម្លាំងសមត្ថកិច្ចនៃនាយកដ្ឋាននគរបាលប្រឆាំងភេរវកម្ម និងឧក្រិដ្ឋកម្មឆ្លងដែន បានបើកយុទ្ធនាការយ៉ាងសម្ងាត់មួយ បង្ក្រាបករណីក្រុមភេរវករ មានគោលដៅប៉ុនប៉ងធ្វើភេរវកម្ម បង្កចលាចលមកលើរាជរដ្ឋាភិបាលអាណត្តិថ្មីនេះ ។
ប្រភពមិនទាន់ច្បាស់ការណ៍ដដែលថា ការបង្ក្រាបនោះគឺដំបូងមានការចាប់ខ្លួនសង្ឃ១អង្គ គង់នៅវត្តពោធិ៍ សង្កាត់ស្នោ ខណ្ឌពោធិ៍សែនជ័យ រាជធានីភ្នំពេញ ដែលភិក្ខុសង្ឃអង្គនោះ មានសាច់ញាតិនៅក្រៅប្រទេស ហើយសុទ្ធតែជាសមាសភាព បម្រើឲ្យគោលនយោបាយបក្សប្រឆាំងយ៉ាងដាច់ក្បាលដាច់កន្ទុយ ។
បន្ទាប់ពីសមត្ថកិច្ចចាប់ឃាត់ខ្លួនសង្ឃអង្គនោះ សាកសួរបានដឹងចម្លើយគ្រប់គ្រាន់ហើយ ពាក់ព័ន្ធមានការលាក់ទុកកាំភ្លើងជាច្រើនដើម ក៏បាននាំខ្លួនភិក្ខុសង្ឃទៅយកកាំភ្លើងវែងចំនួន២៨ដើម ដែលលាក់ទុកនៅអាស្រមមួយ ក្នុងភូមិព្រៃស្នួល សង្កាត់ពន់សាំង ខណ្ឌព្រែកព្នៅ រាជធានីភ្នំពេញ ។
ប្រភពព័ត៌មានមិនទាន់ជាផ្លូវការនិងសម្ងាត់នេះបានឲ្យដឹងទៀតថា ក្រោយពីឃាត់ខ្លួនភិក្ខុសង្ឃ១អង្គហើយ គ្មានអ្វីត្រូវហ៊ានលាក់បាំងទៀតឡើយ ក៏ឈានទៅបកស្បែកបន្តរកឃើញថា ករណីខាងលើនេះជាការរៀបចំធ្វើភេរវកម្មមួយ ទើបសមត្ថកិច្ចបានបន្តនីតិវិធីផ្សឹកភិក្ខុសង្ឃនោះ និងតាមចាប់ខ្លួនបក្សពួកបន្ថែមទៀត ដល់ខេត្តសៀមរាប បានសរុបប្រុស៧នាក់ និងស្ត្រីម្នាក់ ។
ប្រភពព័ត៌មានពីមនុស្សដែលស្និទ្ធ និងអតីតភិក្ខុសង្ឃវត្តពោធិ៍អង្គនោះបានបង្ហើបឲ្យដឹងថា រឿងមនុស្សទាំង៨នាក់ ពាក់ព័ន្ធលាក់ទុកកាំភ្លើងសង្គ្រាមជាង២០ដើម ទំនងសុទ្ធតែត្រូវចាញ់បោកគេទេ ។ នេះបើតាមការពិនិត្យមើលសមាសភាពពួកគេ មិនអាចធ្វើអ្វីទៅបាន ដោយគ្មានខ្សែរយៈ គ្មានការរៀបចំគ្មានការចាត់តាំង ឬ ផ្តល់លុយកាក់មធ្យោយដល់ពួកគេនោះទេ ។ ប៉ុន្តែយ៉ាងណាក្តីសំណុំរឿងនេះ បានស្ថិតនៅដៃសមត្ថកិច្ចអស់ហើយ គ្រាន់តែគ្មានការអនុញាតឲ្យទម្លាយព័ត៌មានជាសាធារណៈនៅឡើយ តែប៉ុណ្ណោះ…មិនយូរទេគង់តែធ្លាយ ។
នៅវេលាម៉ោង៦ល្ងាចថ្ងៃដដែល ចៅក្រមស៊ើបសួរលោក អុឹម វណ្ណៈ បានសម្រេចចោទប្រកាន់ពីបទប៉ុនប៉ងភេរវកម្ម បង្កើតអបគមន៍ និងលាក់អាវុធដោយគ្មានការអនុញ្ញាត ។ ជនជាប់ចោទទាំង៨នាក់ ក៏ត្រូវបានចេញដីកាឃុំខ្លួនបណ្តោះអាសន្ននៅពន្ធនាគារព្រៃ.សផងដែរ ៕
ចែករំលែកព័តមាននេះ