រាជធានីភ្នំពេញ៖ តារាសម្តែង និងចម្រៀងរតនៈ ពិសី បានបង្ហាញការអន់ចិត្ត ហើយត្រៀមខ្លួនដើរចេញពីវិថីសិល្បៈ បន្ទាប់ពីនាងរងការព្រមានពីក្រសួងវប្បធម៌ និងវិចិត្រសិល្បៈ ចំពោះការនិយមបង្ហាញភាពសិចស៊ីជាបន្តបន្ទាប់ ។
រតនៈ ពិសី បានស្ថិតនៅក្នុងបញ្ជីខ្មៅរបស់ក្រសួងវប្បធម៌ និងវិចិត្រសិល្បៈក្នុងចំណោមតារា៣ដួងទៀត ក្រោមការឃ្លាំមើលពីក្រសួង ក្នុងករណីដែលនាងនៅតែបន្តភាពសិចស៊ីទៀត នោះនឹងទទួលរងការពិន័យហាមប្រាមមិនឲ្យបន្តការងារសិល្បៈមួយឆ្នាំ ដូចទៅនឹងករណីកញ្ញាសេង សូណា និងកញ្ញាដេននី ក្វាន់ ដែរ។
យ៉ាងណាក៏ដោយបើទោះបីជារតនៈ ពិសី មិនជាប់បម្រាមប្រឡូកសិល្បៈពីក្រសួងដូចជាសេង សូណា ក៏ដោយ ប៉ុន្តែតារារូបនេះបង្ហាញពីគម្រោងក្នុងការដើរចេញពីសិល្បៈ បើទោះបីជាសកម្មភាពសិល្បៈរបស់នាងមានស្ទើរមិនដាច់រយៈក៏ដោយ ។ រតនៈ ពិសី បានបង្ហោះសារប្រាប់ដល់ប្រិយមិត្តគាំទ្រថា «ការ៉ង់ទី … ប្រហែលមិនដល់មួយឆ្នាំទៀតទេ ខ្ញុំប្រហែលជាឈប់ដើរលើផ្លូវសិល្បៈមួយនេះដោយខ្លួនឯងហើយ …! លាហើយពុកម៉ែ បងប្អូន ដែលតែងតែផ្ដល់ការគាំទ្រ និងការកក់ក្ដៅដល់នាងខ្ញុំរហូតមក ជួយស៊ែ ឲ្យពិភពលោកដឹងផង »។
ជាការកត់សម្គាល់តាមរយៈសារដែលរតនៈ ពិសី បានបង្ហោះនេះគេនៅមិនទាន់ដឹងច្បាស់ទេថា គម្រោងដើរចេញពីសិល្បៈរបស់នាងអាចក្លាយជាការណ៍ពិត ឬយ៉ាងណាឡើយ ខណៈពេលដែលមានការសង្ស័យថា អត្ថន័យដែលនាងបានបង្ហោះនោះអាចជាពាក្យបញ្ចើចបញ្ចើរឆ្លើយតបទៅនឹងការព្រមានពីក្រសួងប៉ុណ្ណោះ។
រតនៈ ពិសី បានបង្ហោះសារនាពេលនេះមានអ្នកសិល្បៈមួយចំនួនបាននាំគ្នាលើទឹកចិត្ត ដើម្បីឲ្យនាងបន្តការងារសិល្បៈនេះ ក្នុងពេលដែលមានប្រិយមិត្តមួយចំនួនបានសម្តែងការគាំទ្រឲ្យនាងដើរចេញពីវិថីនេះផងដែរ ។
បន្ទាប់ពីរងការព្រមានពីក្រសួងវប្បធម៌ និងវិចិត្រសិល្បៈរួចមក រតនៈ ពិសី ធ្លាប់បានអះអាងប្រាប់សារព័ត៌មាននៅក្នុងស្រុកមួយថា នាងទទួលស្គាល់នូវការពិន័យរបស់ក្រសួង ប៉ុន្តែមិនមែនមានន័យថា នាងត្រូវដកខ្លួនចាកឆ្ងាយពីវិស័យសិល្បៈនោះទេ ពោលគឺនៅតែសម្ដែង និងចេញមុខនៅតាមទូរទស្សន៍ និងបទចម្រៀងដូចមុនដដែល គ្រាន់តែមិនសូវស្លៀកពាក់លេចលើលេចក្រោមខ្លាំងដូចមុន ។
ចំណុចនេះត្រូវបានគេកត់សម្គាល់ឃើញថា បើក្នុងករណីដែល រតនៈ ពិសី ពិតជាចាកចេញពីការងារសិល្បៈប្រាកដមែននោះគឺអាចមានមូលហេតុផ្សេងដែលវា អាចពាក់ព័ន្ធបញ្ហាផ្ទាល់ខ្លួន ឬក៏ការសម្រេចចិត្តរៀបការ ៕
ចែករំលែកព័តមាននេះ