ដាក់លក់រញ៉េរញ៉ៃ និងចតយានយន្តគ្មានសណ្តាប់ធ្នាប់នៅតែជាបញ្ហា
- ប៉ៃលិន
ខេត្តប៉ៃលិន ៖ កាលពីវេលាម៉ោង៦និង៣០នាទីព្រឹកថ្ងៃទី២៦ ខែកញ្ញា ឆ្នាំ២០១៨ នេះ អាជ្ញាសមត្ថកិច្ចដឹកនាំដោយលោក ចក់ រិទ្ធី អភិបាលរងក្រុងប៉ៃលិន…
ខេត្តប៉ៃលិន ៖ កាលពីវេលាម៉ោង៦និង៣០នាទីព្រឹកថ្ងៃទី២៦ ខែកញ្ញា ឆ្នាំ២០១៨ នេះ អាជ្ញាសមត្ថកិច្ចដឹកនាំដោយលោក ចក់ រិទ្ធី អភិបាលរងក្រុងប៉ៃលិន ចុះរៀបចំសណ្តាប់ធ្នាប់ផ្សារសា មគ្គីហៅប៉ាហ៊ី ដែលអាជីវករ និងប្រជាពលរដ្ឋដាក់លក់រហូតដល់លើចំណីផ្លូវ ហើយចតម៉ូតូរញ៉េរញ៉ៃ ពាសពេញចិញ្ចើមផ្លូវ បង្កឱ្យស្ទះចរាចរណ៍ជាញឹកញាប់ តែប្រជាពលរដ្ឋរស់នៅក្បែរផ្សារខាងលើបានលើកឡើងថា ការចុះរៀបចំនេះដូចជាវែកចកក្នុងបឹង បន្ទាប់ពីអាជ្ញាធរចេញផុត គេចូលមកដាក់លក់ បង្កឱ្យស្ទះចរាចរណ៍តាមផ្លូវជុំវិញផ្សារដដែល ។
ប្រភពព័ត៌មានពីលោក ចក់ រិទ្ធី អភិបាលរងក្រុងប៉ៃលិន បានឱ្យដឹងថា លោកតែងតែដឹកនាំសមត្ថកិច្ចប៉េអឹមក្រុង រួមជាមួយនឹងនគរបាលក្រុងចុះធ្វើការរៀបចំសណ្តាប់ធ្នាប់ផ្សារជាញឹកញាប់ ឱ្យតែឃើញអាជីវករដាក់លក់រញ៉េរញ៉ៃ និងចតយានយន្តគ្មានសណ្តាប់ធ្នាប់ ។
លោកបន្តទៀត ថា ទាំងអ្នកលក់ក៏ដូចជាអ្នកចតម៉ូតូ រថយន្ត ឱ្យតែឃើញកន្លែងក្បែរផ្សារស្រឡះល្អ តែងតែឈប់ចត ដើម្បីដើរចូលទៅក្នុងផ្សារ ជាហេតុបង្កឱ្យកកស្ទះចរាចរណ៍យ៉ាងខ្លាំង ។ តែខាងលោកមិនបណ្តោយឱ្យផ្លូវផ្សារទទួលការកកស្ទះ នាំឱ្យមានការរិះគន់ពីប្រជាពលរដ្ឋនោះឡើយ គឺក្រោយពីសង្កេតឃើញ បែបនេះ ក៏ដឹកនាំកម្លាំងចុះរៀបចំភ្លាមៗតែម្តង ។
ចំណែកប្រជាពលរដ្ឋរស់នៅក្បែរៗផ្សារខាងលើ បានឱ្យដឹងថា ការរៀបចំសណ្តាប់ធ្នាប់ផ្សារ ឱ្យផ្លូវជុំវិញផ្សារដំណើរការទៅល្អនោះមិនអាចធ្វើដោយស្រួលនោះទេ ព្រោះសកម្មភាពនេះដូចជាគេវែកចកក្នុងបឹងអញ្ចឹង ព្រោះអីបន្ទាប់ពីអាជ្ញាធរត្រឡប់ទៅផ្ទះវិញ គេនាំគ្នាចតម៉ូតូ និងដាក់លក់រញ៉េរញ៉ៃដដែល ពោលគឺគ្មានខ្លាចញញើតឡើយ ។
ប្រជាពលរដ្ឋបញ្ជាក់ទៀតថា ការចុះរៀបចំផ្លូវចូលក្នុងផ្សារនេះ អាជ្ញាធរក្រុងបានធ្វើជាញឹក ញាប់មកហើយ តែហាក់ដូចជាមិនទទួលបានផ្លែផ្កាអ្វីនោះទេ លើសពីនេះ អ្នកលក់នៅក្បែរៗចិញ្ចើម ផ្លូវគេមិនខ្លាច ដោយសារតែមានអ្នកដើរយកភាស៊ី និងបង់ថ្លៃរទេះលក់ដល់អ្នកគ្រប់គ្រងផ្សារផងដែរ ទើបការលក់ដូរចេះតែបង្កភាពអត់សណ្តាប់ធ្នាប់បែបនេះ ៕
ចែករំលែកព័តមាននេះ