រាជធានីភ្នំពេញ ៖ កាលពីវេលាម៉ោង៨និង៣៥នាទីយប់ថ្ងៃទី២៤ ខែកញ្ញា ឆ្នាំ២០១៨ នៅមុខព្រលានយន្តហោះអន្តរជាតិភ្នំពេញ ស្ថិតនៅភូមិក្បាលដំរី ២សង្កាត់កាកាបទី២ ខណ្ឌពោធិ៍សែនជ័យ រថយន្តម៉ាកព្រូសបុករបាំងថ្មខូចអស់២ផ្ទាំង បណ្តាលឲ្យខ្ទាតទៅប៉ះម៉ូតូមួយគ្រឿងរងរបួសធ្ងន់អ្នកបើកបរម៉ូតូម្នាក់ ។
រថយន្តខាងលើម៉ាកព្រូស ពណ៌ខ្មៅ បើកបរដោយយុវជនម្នាក់នឹងនាក់រួមដំណើរម្នាក់បើកក្នុងទិសដៅពីកើតទៅលិច។ ចំណែកជនរងគ្រោះឈ្មោះសៀក ហេងភេទប្រុស អាយុ៤១ឆ្នាំ មុខរបរជាងកាត់កញ្ចក់ ស្នាក់នៅភូមិ ជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ មានស្រុកកំណើតនៅស្រុក ស្រីសន្ធរ ខេត្តកំពង់ចាម ជិះម៉ូតូម៉ាកហុងដាឌ្រីម ស៊េរី២០១១ ពណ៌ខ្មៅ ពាក់ស្លាកលេខ កណ្តាល ១M-៧២៦១ បើកបរដោយបុរសម្នាក់ ក្នុងទិសដៅដៅពីកើតទៅលិចស្របគ្នា។
តាមប្រភពព័ត៌មានពីកន្លែងកើតហេតុបាននិយាយថា នៅមុនពេលកើតហេតុ គេឃើញរថយន្ត ព្រមទាំងម៉ូតូរងគ្រោះបើកស្របគ្នាក្នុងទិសដៅពីកើតទៅលិចក្នុងល្បឿនយ៉ាងលឿន ដោយម៉ូតូរងគ្រោះបើកបរពីក្រោយរថយន្ត លុះមកដល់ចំណុចកើតហេតុ រថយន្តខាងលើបានបើកបុករបាំងថ្មពុះចែកទ្រូងផ្លូវបណ្ដាលឱ្យខូចចំនួនពីរផ្ទាំង បន្ទាប់មករថយន្តខាងលើបានខ្ទាតចេញមកខាងផ្នែកខាងស្ដាំទទឹងផ្លូវបណ្តាលឲ្យប៉ះម៉ូតូដួលអ្នកបើកបរម៉ូតូបោកនឹងថ្នល់រងរបួសធ្ងន់។
ប្រភពព័ត៌មានពីកន្លែងកើតហេតុបានបន្តទៀតថាខណះពេលគ្រោះថ្នាក់ភ្លាមៗជនរងគ្រោះត្រូវបានរថយន្តសង្គ្រោះគ្លីនិកឯកជនបានដឹកយកទៅព្យាបាលភ្លាមៗផងដែរ ហើយអ្នកបើកបររថយន្ត និងអ្នករួមដំណើរបានចុះពីលើរថយន្តរត់គេចខ្លួនបាត់។
ក្រោយពេលកើតហេតុនគរបាលប៉ុស្តិ៍កាកាបទី២បានមកដល់កន្លែងកើតហេតុបានទាក់ទងទៅជំនាញចរាចរណ៍ខណ្ឌពោធិ៍សែនជ័យ ដោយសារតែរថយន្តខាងលើប៉ះពាល់ដល់សម្បត្តិសាធារណៈ ជំនាញចរាចរណ៍ខណ្ឌពោធិ៍សែនជ័យបានប្រគល់អោយជំនាញចរាចរណ៍រាជធានីភ្នំពេញធ្វើការវាស់វែងនិងស្ទូចរថយន្តយកទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញរង់ចាំកាដោះថ្ងៃក្រោយ ៕
ចែករំលែកព័តមាននេះ