រាជធានីភ្នំពេញ ៖ លោក សុខ ឥសាន អ្នកនាំពាក្យគណបក្សប្រជាជនកម្ពុជាបានអះអាងថា បណ្តាប្រទេសណាដែលលើកយកប្រធានបទពីបញ្ហារបស់កម្ពុជាមកវែកញែកជាការរំលោភសិទ្ធិរបស់កម្ពុជា ។
ការលើកឡើងរបស់អ្នកនាំពាក្យបក្យកាន់អំណាចនេះ បន្ទាប់ពីបណ្តាប្រទេសមួយចំនួនបានលើកយកបញ្ហារបស់កម្ពុជាទៅពិភាក្សាតាមសំណើររបស់ក្រុមប្រឆាំង ។ លោកសុខ ឥសានបានគូសបញ្ជាក់ឲ្យដឹងនៅថ្ងៃទី២៤ កញ្ញានេះថា«ការជជែកវែកញែកពីបញ្ហាកម្ពុជាដោយអ្នកនៅក្រៅកម្ពុជា គឺជាការរំលោភសិទ្ធិរបស់កម្ពុជា» ។ លោកបន្តថា កន្លងទៅដើម្បីបម្រើមហិច្ឆតាមនោគមន៍វិជ្ជារបស់ខ្លួន ពួកបរទេសបានបង្កើតអង្គការចាត់តាំងផ្សេងៗជាយន្តការធ្វើសកម្មភាពដោយយកប្រធានបទសិទ្ធិមនុស្ស និងលទ្ធិប្រជាធិបតេយ្យមកបិទបាំងពីមុខ ដើម្បីជជែកវែកញែកពីបញ្ហាផ្សេងៗរបស់បណ្តាប្រទេសធ្វើខ្លួនដូចជា យកចិត្តទុកដាក់នឹងប្រទេសទាំងនោះណាស់ ផ្តល់មតិយោបល់អញ្ចេះអញ្ចុះតាមតែចិត្តចង់របស់ខ្លួន ។
លោកបន្ថែមថា បើមានប្រទេសណាមិនធ្វើតាមខ្លួនទេ ខ្លួននឹងបញ្ជាឲ្យកូនដឹងរបស់ខ្លួនដាក់ពិន្ទុយ៉ាងទាប ដើម្បីឲ្យមើលឃើញថា ប្រទេសទាំងនោះមានការរំលោភសិទ្ធិមនុស្សរំលោភលទ្ធិប្រជាធិបតេយ្យ ។ ឥឡូវគេធ្វើជាឡេះសម្រាប់ដាក់របស់ដែលហៅថា ទណ្ឌកម្មសេដ្ឋកិច្ច ឬនយោបាយជាដើម ជាគំនាបចាប់បង្ខំឲ្យធ្វើតាមខ្លួនផងដែរ ។
អ្នកនាំពាក្យបក្សកាន់អំណាចបានលើកឡើងទៀតថា ការធ្វើបែបគំនិតអាណានិគមន៍នេះត្រូវពិភពលោភទាំងមូលមើលឃើញថា គឺជាវប្បធម៌លូកដៃចូលកិច្ចការផ្ទៃក្នុង និងជាការឈ្លានពានបែបថ្មីមកលើបណ្តាប្រទេសលើសកលលោក ក្នុងចេតនាបម្រើមហិច្ឆតាមនោគមន៍វិជ្ជាចង់ត្រួត្រាតែប៉ុណ្ណោះ ។
សូមជម្រាបថា ការលើកឡើងរបស់អ្នកនាំពាក្យបក្សកាន់អំណាចនេះ បន្ទាប់ពីបណ្តាលប្រទេសមហាអំណាចមួយចំនួនបានលើកប្រធានបទស្តីពីបញ្ហារបស់កម្ពុជាពាក់ព័ន្ធនឹងសិទ្ធិមនុស្ស ។ លើសពីនេះការលើកឡើងបញ្ហាសិទ្ធិមនុស្ស និងលទ្ធិប្រជាធិបតេយ្យនេះភាគីច្រើនកើតចេញពីក្រុមអតីតគណបក្សប្រឆាំងនៅក្នុងកិច្ចប្រជុំនានានៅក្រៅប្រទេស ៕
ចែករំលែកព័តមាននេះ