ប្រទេសតង់ហ្សានី ៖ នាវាដឹកអ្នកដំណើរ១គ្រឿងបានលិចកាលពីថ្ងៃទី២០ កញ្ញា ក្នុងបឹង VICTORIA ប្រទេសតង់ហ្សានី ។ អ្នកទទួលខុសត្រូវជាន់ខ្ពស់តង់ហ្សានីម្នាក់គូសបញ្ជាក់ថា រដ្ឋាភិបាលខ្លាចអ្នកស្លាប់មានដល់២០០នាក់ ដែលដំណាក់កាលនេះចំនួនអ្នកស្លាប់មាន៤២នាក់ ។
ក្រុមហ៊ុន TEMESA ម្ចាស់នាវានេះគូសបញ្ជាក់ថា ប្រតិបត្តិការរុករកអ្នកនៅរស់រានមានជីវិត បានផ្អាករហូតដល់ព្រឹកព្រលឹមថ្ងៃទី២១ កញ្ញា ។ នាវាឈ្មោះ MV NYERERE នោះបានលិចនាវេលារសៀល ត្រង់កន្លែងមួយចម្ងាយតែប៉ុន្មានម៉ែត្រប៉ុណ្ណោះពីផែលើកោះ UKEREWI ។
លោក GEORGE NYARMAHA ដែលដឹកនាំក្រុមប្រឹក្សាស្រុក UKEREWI តំបន់ MWANZA អះអាងថា គេពុំទាន់ដឹងពីចំនួនពិតប្រាកដនៃអ្នកដំណើរជិះលើនាវានេះឡើយ រូចនាវាក៏ដឹកទំនិញនានាផងដែរ ។
មូលហេតុនៃគ្រោះថ្នាក់នោះពុំទាន់ដឹងក្នុងពេលភ្លាមៗ ប៉ុន្តែការលិចនាវាបែបនេះជារឿយៗមកពីការដឹកលើសចំណុះ ។ កាលពីឆ្នាំ១៩៩៦ការលិចនាវាដឹកអ្នកដំណើរមួយគ្រឿងក្នុងបឹង VICTORIA ដែរនាតំបន់ជាមួយគ្នា បណ្ដាលឲ្យមនុស្សស្លាប់ដល់៥០០នាក់ ៕
ចែករំលែកព័តមាននេះ