រាជធានីភ្នំពេញ៖ ជនសង្ស័យ ប្រុស ស្ត្រីដែលនគរបាលអះអាងថា ជាមុខសញ្ញាប្លន់ ត្រូវបានកម្លាំងនគរ
បាលខណ្ឌឬស្សីកែវ ស្រាវជ្រាវឃាត់ខ្លួនជាបន្ទាប់ពីធ្វើសកម្មភាពវាយប្លន់យកម៉ូតូមួយគ្រឿងមិនបានសម្រេចកាលពី៣ថ្ងៃមុន ។
ការឃាត់ខ្លួនក្រុមចោរប្លន់នេះធ្វើឡើងនៅវេលាម៉ោង ប្រមាណ៧និង១៥នាទីព្រឹក ថ្ងៃទី២១ ខែកញ្ញាឆ្នាំ ២០១៨ នៅចំណុចបន្ទប់ជួលលេខ១០៤ តាមផ្លូវរថភ្លើង ក្នុងភូមិបាក់ទូក សង្កាត់ទួលសង្កែ ទី១ ខណ្ឌឬស្សីកែវ ពេលដែលជនសង្ស័យជួបប្រមូលផ្តុំគ្នាប្រើប្រាស់គ្រឿងញៀន។
ក្នុងការឃាត់ខ្លួន សមត្ថកិច្ចដកហូតបានឧបករណ៍សម្រាប់ប្រើប្រាស់គ្រឿងញៀន និងដែកសម្រាប់កាច់កម៉ូតូមួយចំនួនផងដែរ ។
ជនសង្ស័យខាងលើដែលត្រូវឃាត់ខ្លួនរួមមាន ១-ឈ្មោះ ឌុច ម៉ុង តារា ភេទប្រុស អាយុ៣៦ឆ្នាំមានលំនៅភូមិបឹងសាឡាង សង្កាត់ បឹងសាឡាង ខណ្ឌឬស្សីកែវ ២-ឈ្មោះស៊ឹម បញ្ញា ភេទប្រុស អាយុ១៨ឆ្នាំ មានលំនៅសង្កាត់ផ្សារចាស់ ខណ្ឌដូនពេញ ៣-ឈ្មោះទី គា ភេទប្រុស អាយុ២១ឆ្នាំ ៤-យឹម សុជាតា ភេទស្រី អាយុ១៨ឆ្នាំ បម្រើការនៅខារ៉ាអូខេ និង៥-ឈ្មោះសម្បត្តិ នីតា ភេទស្រី អាយុ១៨ឆ្នាំ ជាអ្នកសម្រើការខារ៉ាអូខេ ស្នាក់នៅផ្ទះជួលកន្លែងកើតហេតុ ។ ចំណែកជនរងគ្រោះឈ្មោះ ម៉េង សុជាតិ ភេទប្រុស អាយុ២៤ឆ្នាំ ជាបុគ្គលិកផ្ទះសំណាក់ទឹក មាស មានលំនៅសង្កាត់ទួលសង្កែ ខណ្ឌឬស្សីកែវ ។
តាមនគរបាលបានអោយដឹងថាជនសង្ស័យជាមុខសញ្ញាក្រុមចោរប្លន់ ដែលបានធ្វើសកម្មភាព ប្លន់យកម៉ូតូមួយគ្រឿងរបស់ជនរងគ្រោះម៉ាកហុងដាឌ្រីម សេរី២០១៨ ពាក់ស្លាកលេខ ព្រៃវែង ១M-៧៦០៤ មិនបានសម្រេចកាលពីវេលាយប់ រំលងអាធ្រាត្រចូលថ្ងៃទី១៩ ខែ កញ្ញា ឆ្នាំ ២០១៨ នៅចំណុចផ្លូវលេខ៧០ កែងផ្លូវរថភ្លើង។
ជនសង្ស័យមានគ្នា៣នាក់ បានធ្វើសកម្មភាពវាយប្លន់យកបានកាបូបរបស់ជនរងគ្រោះក្នុងនោះមានលុយចំនួន៨០ដុល្លារ។
តាមព័ត៌មានអោយដឹងទៀតថា នៅមុនពេលកើតហេតុ ជនរងគ្រោះបានជិះម៉ូតូធ្វើដំណើរ ទៅរកទិញទឹកសុទ្ធ នៅពេលត្រឡប់មកវិញត្រូវក្រុមជនសង្ស័យធ្វើសកម្មភាពវាយប្លន់យកម៉ូតូពេលនោះជនរងគ្រោះបានរត់គេចខ្លួន ហើយកម្លាំងនគរបាលជិះល្បាតក៏បានជួយអន្តរាគមន៍ ធ្វើអោយក្រុមជនសង្ស័យរត់គេចខ្លួនចោលម៉ូតូមួយគ្រឿងដែលប្លន់បាន និងបន្សល់ទុកម៉ូតូមួយគ្រឿងដែលជិះធ្វើសកម្មភាពម៉ាកស៊ុយហ្សូគី មីអូ ពណ៌ខ្មៅ ពាក់ស្លាកលេខ ភ្នំពេញ១AD-៧៨០២ មួយគ្រឿង ។
ដោយមានការស្រាវជ្រាពីកម្លាំងនគរបាលខណ្ឌឬស្សីកែវ និងប៉ុស្តិ៍ទួលសង្កែទី១ ក៏ឈានទៅឃាត់ខ្លួនជនសង្ស័យ បានចំនួន៥នាក់តែម្តង ៕
ចែករំលែកព័តមាននេះ