ទីក្រុងវ៉ាស៊ីនតោន ៖ យោងតាមសេចក្តីរាយការណ៍របស់សារព័ត៌មានចិនកាលពីថ្ងៃពុធបានឲ្យដឹងថា លោក Jack Ma អគ្គនាយករបស់ក្រុមហ៊ុនAlibaba បាននិយាយថា ក្រុមហ៊ុនលោកមិនអាចសម្រេចការសន្យាបង្កើតការងារ១លានកន្លែងក្នុងសហរដ្ឋអាមេរិកបានឡើយ ព្រោះតែជម្លោះពាណិជ្ជកម្មរវាងសហរដ្ឋអាមេរិក និងប្រទេសចិន។
គួរបញ្ជាក់ដែរថា លោក Ma បានជួបជាមួយនឹងលោកប្រធានាធិបតីដូណាល់ ត្រាំ (Donald Trump) កាលពីពីរឆ្នាំមុន និងបានប្រាប់ពីគម្រោងរបស់ក្រុមហ៊ុនលោកក្នុងការនាំអាជីវកម្មអាមេរិកតូចៗចំនួន១លានអាជីវកម្មទៅលើវេទិការបស់ក្រុមហ៊ុនដើម្បីលក់ផលិតផលជូនដល់អតិថិជនចិនក្នុងរយៈពេល៥ឆ្នាំខាងមុខនេះ។
លោក Ma បាននិយាយថា ៖« ការប្តេជ្ញានេះគឺយោងទៅលើកិច្ចសហប្រតិបត្តិការដ៏ជិតដិតរវាងសហរដ្ឋអាមេរិកនិងប្រទេសចិន និងលើកត្តាដែលសមហេតុសមផលនិងមិនលំអៀងនៃការធ្វើពាណិជ្ជកម្មទ្វេភាគី ប៉ុន្ដែស្ថានការណ៍បច្ចុប្បន្នបានបំផ្លាញការអះអាងដំបូងទៅហើយនិងមិនមានវិធីក្នុងការសម្រេចការសន្យានេះបានទេ »។
លោកMaបានឲ្យដឹងកាលពីថ្ងៃអង្គារថា ភាពតានតឹងផ្នែកពាណិជ្ជកម្មរវាងសហរដ្ឋអាមេរិក និងប្រទេសចិន អាចកើតមានឡើងដល់ទៅ២០ឆ្នាំ ហើយនឹងស្មុគស្មាញសម្រាប់ភាគីដែលជាប់ទាក់ទិន ។
លោកក៏បានឲ្យដឹងថា ជម្លោះនេះនឹងប៉ះពាល់ដល់ក្រុមហ៊ុនចិននិងបរទេសភ្លាមៗ ខណៈដែលលោកព្យាករណ៍ថា អាជីវកម្មចិនអាចនឹងប្តូរទីតាំងផលិតកម្មទៅកាន់ប្រទេសដទៃដើម្បីជៀសវាងពន្ធទាំងនេះ ។
គួរបញ្ជាក់ដែរថា កាលពីថ្ងៃចន្ទ លោកប្រធានាធិបតីត្រាំបានប្រកាសថា នឹងដាក់ពន្ធ ១០%លើផលិតផលចិនចំនួន២០០ប៊ីលានដុល្លារបន្ថែម និងបានគំរាមថា នឹងដាក់ពន្ធលើផលិតផលចិន២៦៧ប៊ីលានដុល្លារបន្ថែមទៀត ប្រសិនបើប្រទេសចិនដាក់ពន្ធឆ្លើយតប ។
មួយថ្ងៃកន្លងមក ប្រទេសចិនបានឆ្លើយតបជាមួយនឹងពន្ធលើផលិតផលអាមេរិកប្រមាណ ៦០ប៊ីលានដុល្លារដូចដែលបានគ្រោងទុក ប៉ុន្តែបន្ទាបកម្រិតពន្ធ ៕
ចែករំលែកព័តមាននេះ