ខេត្តសៀមរាប ៖ ស្លឹកគ្រៃ ត្រូវបានប្រជាកសិករនៅស្រុកបន្ទាយស្រីនាំគ្នាដាំស្លឹកគ្រៃ ហើយគេប្រើសម្រាប់ផ្សំគ្រឿងក្នុងមុខម្ហូប ប៉ុន្តែឥឡូវនេះក៏អាចយកប្រើជាថ្នាំព្យាបាលថ្លោះ គ្រេចសរសៃបានដែរ ហើយបច្ចុប្បន្នកំពុងរៀបចំចងក្រងជាក្រុមសម្រាប់ផលិតប្រេងស្លឹកគ្រៃ ដើម្បីផ្គត់ផ្គង់ទីផ្សារក្នុងស្រុកដែលកំពុងមានតម្រូវការខ្ពស់ផងដែរ។
ពួកគេរំពឹងថា ពួកគេនឹងទទួលការគាំទ្រពីទីផ្សារក្នុងស្រុក ហើយអាចជំនួសប្រេងស្លឹកគ្រៃនាំចូលពីខាងក្រៅស្រុកផងដែរ។ សូមបញ្ជាក់ផងដែរថា ស្លឹកគ្រៃ ត្រូវបានប្រជាពលរដ្ឋខ្មែរដាំនៅតាមផ្ទះជាទូទៅសម្រាប់ទុកផ្សំគ្រឿងក្នុងមុខម្ហូប ប៉ុន្តែដំណាំប្រភេទនេះងាយស្រួលនឹងដាំណាស់នៅលើដីទីទួល ហើយវាក៏មិនសូវត្រូវការទឹកច្រើនផងដែរ។
តាមប្រភពពីពលរដ្ឋម្នាក់គឺអ្នកស្រី ម៉ៅ មុខរបរកសិករ រស់នៅក្នុងឃុំព្រះដាក់ ស្រុកបន្ទាយស្រី រៀបរាប់ប្រាប់ថា ចំពោះការដាំគល់ស្លឹកគ្រៃនេះនៅស្រុកបន្ទាយស្រីមានច្រើនគ្រួសារណាស់ដែលមានរបរដាំស្លឹកគ្រៃសម្រាប់ផ្គត់ផ្គង់ទីផ្សារ ដើម្បីយកទៅលក់នៅក្រុងសៀមរាប ហើយទំនេរពីដាំដំណាំក៏នាំគ្នាចុះធ្វើស្រែផងដែរ គ្រាន់ទប់ទល់ជីវភាពបន្ថែមក្នុងក្រុមគ្រួសារផងដែរ ប៉ុន្តែដោយការដាំដុះមានបរិមាណច្រើនធ្វើឱ្យស្លឹកក្រៃមានតម្លៃថោក។
ចំណែកអង្គការ អាគ្រីស៊ុត មានទីតាំងស្ថិតនៅស្រុកបន្ទាយស្រី បានចាប់ផ្តើមចងក្រងកសិករមួយក្រុមដើម្បីផលិតប្រេងស្លឹកគ្រៃ ដោយសម្លឹងឃើញទីផ្សារខ្ពស់នាពេលអនាគត ដើម្បីស្រោចស្រង់ទីផ្សារស្លឹកគ្រៃឡើងវិញ អង្គការបានជួយរៀបចំរោងចម្រាញ់ប្រេងស្លឹកគ្រៃដោយរំពឹងថា មានទីផ្សារល្អនឹងគេផងដែរ រីឯកសិករដែលមកបង្កើតជាក្រុមនោះ គឺមានទីតាំងស្ថិតនៅក្នុងឃុំឃុនរាម ស្រុកបន្ទាយស្រី ខេត្តសៀមរាប។
ជុំវិញការលើកឡើងខាងលើ កញ្ញា គង់ រដ្ឋា បុគ្គលិកផ្នែកទីផ្សារនៃអង្គការរៀបរាប់ថា ហេតុដែលអង្គការរៀបចំការផលិតប្រេងស្លឹកគ្រៃនេះឡើង គឺដោយសារអង្គការសង្កេតឃើញថា ១-ការដាំដុះពួកគេកំពុងជួបបញ្ហាទីផ្សារ ហើយមានតម្លៃទាបផងដែរ។ ២-ដោយសារតំបន់នោះដាច់ស្រយាល ឆ្ងាយពីទីក្រុង ផលដំណាំផ្សេងៗមិនសូវមានទីផ្សារ ហើយក៏ពិបាកនាំកសិផលទៅលក់នៅទីផ្សារជាដើម។
កញ្ញាបញ្ជាក់ថា គម្រោងចម្រាញ់ប្រេងស្លឹកគ្រៃចាប់ផ្តើមដំណើរការនៅដើមឆ្នាំ២០១៨ជាមួយក្រុមកសិករ២០គ្រួសារ។ យ៉ាងណាបច្ចុប្បន្នប្រេងស្លឹកគ្រៃកំពុងស្ថិតក្នុងដំណាក់កាលសាកល្បង និងធ្វើតេសនៅឡើយ ហើយទាក់ទងនឹងតម្លៃមិនទាន់កំណត់នោះទេ។
ប្រធានក្រុមកសិករលោក ខឹម សម្រេច បានឱ្យដឹងថា ដំបូងការចងក្រងក្រុមលោកមានតែ២០នាក់តែប៉ុណ្ណោះ ដោយសារទីផ្សារមិនទាន់ដើរត្រឹមត្រូវ។ ប្រសិនបើទីផ្សារដើរនោះលោកនឹងបង្កើនសមាជិកក្រុម និងបង្កើនការផលិតដើម្បីបំពេញតម្រូវការទីផ្សារ។ ហើយប្រេងស្លឹកគ្រៃនេះមានអត្ថប្រយោជន៍ច្រើន និងជួយកសិករក្រីក្រក្នុងតំបន់ដាច់ស្រយាល ជាងនេះទៀតនោះ គឺលើកទឹកចិត្តពួកគេធ្វើយ៉ាងណាមានមុខរបរក្នុងស្រុក ដោយមិនចាំបាច់ចំណាកស្រុកទៅក្រៅប្រទេស៕
ចែករំលែកព័តមាននេះ