រាជធានីភ្នំពេញ ៖ បណ្ដាប្រទេសលើពិភពលោកកំពុងដើរឆ្ពោះទៅរកសេដ្ឋកិច្ចតាមបច្ចេកវិទ្យាទំនើប ហើយក្នុងនោះប្រទេសតាមដងទន្លេមេគង្គក៏បានខិតខំប្រឹងប្រែងរួមគ្នាក្នុងការកំណែទម្រង់សេដ្ឋកិច្ចឲ្យក្លាយទៅជាប្រទេសសេដ្ឋកិច្ចឌីជីថល និងត្រូវផ្លាស់ប្តូរពីសេដ្ឋកិច្ចបែបបុរាណ ទៅជាសេដ្ឋកិច្ចតាមបែបទំនើបដែរ ។
បើតាមប្រសាសន៍សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងក្នុងវេទិកាសេដ្ឋកិច្ចពិភពលោកលើទី២៧ នៅប្រទេសវៀតណាមកាលពីពេលថ្មីៗនេះ ចរន្តនៃការរីកចម្រើនវិទ្យាសាស្ត្រ និងបច្ចេកវិទ្យា ឬបដិវត្តន៍ឧស្សាហកម្មបានក្លាយទៅជាគន្លឹះមួយកំណត់និន្នាការវិវត្តន៍នៃសង្គមសេដ្ឋកិច្ចក្នុងគ្រប់ទិដ្ឋភាព ជាមួយនឹងការបង្កើតឡើងទាំងកាលានុវត្តភាព ទាំងបញ្ហាប្រឈម សម្រាប់សាកលភាវូបនីយកម្ម ។
សម្ដេចមានប្រសាសន៍ថា ៖« បដិវត្តន៍ឧស្សាហកម្មទី៤កំពុងបង្ហាញពីការរីកចម្រើន នៃបច្ចេកវិទ្យានៅក្នុងពិភពលោក ដែលជះឥទ្ធិពលយ៉ាងខ្លាំងលើការកំណត់ឡើងវិញនូវកត្តាផលិតកម្ម ទំនាក់ទំនងផលិតកម្ម ឥរិយាបថ ការប្រើប្រាស់ និងរចនាសម្ព័ន្ធសេដ្ឋកិច្ច ដូចជាការប្រើប្រាស់បច្ចេកវិទ្យា បញ្ញា សប្បនិម្មិត ការប្រើប្រាស់មនុស្សយន្តក្នុងសង្វាក់ផលិតកម្ម និងសង្វាក់ចែកចាយ ការបោះពុម្ព ការប្រើប្រាស់បច្ចេកវិទ្យា ជីវវិទ្យា ជាដើម ដែលបច្ចេកវិទ្យាទាំងនេះបានផ្លាស់ប្តូរយ៉ាងលឿនដែលមិនធ្លាប់មានពីមុនមកក្នុងវិស័យផលិតកម្ម »។
សម្ដេចតេជោបន្ដថា នាពេលបច្ចុប្បន្នទេសចរណ៍រមណីយកម្ម បានក្លាយទៅជា កាតាលីករកំណើនថ្មីមួយតាមរយៈការបង្កើនផលិតភាព និងប្រសិទ្ធភាពការងារ ហើយសហគ្រាសធុនតូច និងមធ្យមមានលទ្ធភាពផ្សារភ្ជាប់ទៅនឹងសង្វាក់ផលិតកម្មតំបន់ និងពិភពលោក ព្រមទាំងអាចស្វែងរកនវានុវត្តន៍នៅក្នុងទំនិញ និងសេវាថ្មីៗ ដែលអនុញ្ញាតឲ្យប្រទេសអភិវឌ្ឍន៍តិចតួច ឬប្រទេសកំពុងអភិវឌ្ឍន៍ អាចផ្សារ ភ្ជាប់បច្ចេកវិទ្យាថ្មីៗ ដើម្បីមានឱកាសអាចហក់ឡើងរំលងឧស្សាហកម្មបែបប្រពៃណី ចូលក្នុងឧស្សាហកម្មបែបទំនើប ។
សម្ដេចតេជោបន្តទៀតថា ជាមួយនឹងក្តីរំពឹងនេះ បដិវត្តន៍ឧស្សាហកម្មនឹងនាំមកនូវការអភិវឌ្ឍជាវិជ្ជមានសម្រាប់ប្រជាជាតិទាំងមូល ហើយបដិវត្តន៍ក៏នឹងនាំមកនូវក្ដីកង្វល់ច្រើន និងបញ្ហាប្រឈមមួយចំនួនដូចជា ការបាត់បង់ការងារ ការទាមទារឲ្យមានមនុស្សមានកម្រិតអប់រំ និងជំនាញខ្ពស់ ហើយការទទួលបានផលប្រយោជន៍កាន់តែមិនស្មើគ្នាដោយសារភាពមិនស្មើនឹងគ្នានៃឱកាសទទួលបានចំណេះដឹង និងបច្ចេកវិទ្យា ។
ទន្ទឹមនឹងនេះ សម្ដេចមានប្រសាសន៍ថា ៖« ប្រព្រឹត្តិកម្ម និងបទល្មើសដែលកើតឡើងដោយបច្ចេកវិទ្យា ក៏នឹងនាំមកនូវអសន្តិសុខសង្គមបានផងដែរ ដូច្នេះត្រូវមានការគ្រប់គ្រងការប្រើប្រាស់បច្ចេកវិទ្យាឲ្យមានប្រសិទ្ធភាពខ្ពស់ »។
សម្ដេចបន្ថែមថា ៖« ដើម្បីចាប់យកនូវការអភិវឌ្ឍន៍ និងការកាត់បន្ថយកង្វល់ ខ្ញុំយល់ថា អាស៊ានគួរតែអនុវត្តន៍នូវវិធានការមួយចំនួន ដូចជាបង្កើតចក្ខុវិស័យអាស៊ានរួម រួមមានឧស្សាហកម្មដែលមានលក្ខណៈគ្រប់ជ្រុងជ្រោយ និងបរិយាបន្នដោយផ្អែកលើគំនិតផ្ដួចផ្ដើមរបស់អាស៊ានដែលមានស្រាប់ ព្រមទាំងបញ្ចូលកម្មវិធីអភិវឌ្ឍន៍សំខាន់ៗលើផ្នែកបច្ចេកវិទ្យា ការអភិវឌ្ឍធនធានមនុស្ស ក្របខ័ណ្ឌគតិយុត្ត ហេដ្ឋារចនាសម្ព័ន្ធផ្នែកទន់និងរឹងរបស់ព័ត៌មានវិទ្យានិងកម្មវិធីកែទម្រង់របស់អាស៊ាន និងប្រទេសជាសមាជិកនីមួយៗផងដែរ » ។
ការវិវត្តនៃវិស័យបច្ចេកវិទ្យានេះ នៅរយៈពេល៥ឆ្នាំខាងមុខ អ្វីដែលរាជរដ្ឋាភិបាលប្រមើលមើល និងមានទស្សនវិស័យក្នុងការអភិវឌ្ឍប្រទេសជាតិ សេដ្ឋកិច្ច និងសង្គម គឺចង់ប្រែក្លាយកម្ពុជាឆ្ពោះទៅរកប្រទេសសេដ្ឋកិច្ចឌីជីថល ។
យោងតាមការចេញផ្សាយដោយនិយ័តករ ទូរគមនាគមន៍កម្ពុជាបានឲ្យដឹងថា ពាក់កណ្តាលឆ្នាំ២០១៨នេះ ស្ថិតិនៃអ្នកប្រើប្រាស់អ៊ីនធើរណេតក្នុងប្រទេសកម្ពុជា មានប្រមាណ១០,៩លាននាក់ និងអ្នកប្រើបណ្ដាញសង្គមជាង៧លាននាក់ ៕
ចែករំលែកព័តមាននេះ